សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា បានលើកឡើងពីគុណសម្បត្តិនៃសន្តិភាពចំពោះការអភិវឌ្ឍន៍និងផលប្រយោជន៍ទៅដល់សង្គមជាតិនិងពលរដ្ឋ។
ក្នុងពិធីជួបជាមួយនឹងកម្មករជាង ១ម៉ឺន ៦ពាន់នាក់នៅស្រុងគងពិសី ខេត្តកំពង់ស្ពឺព្រឹកថ្ងៃទី៤ ខែមិថុនា ឆ្នាំ២០២៣នេះ សម្ដេចតេជោ ហ៊ុន សែន បានអំពាវនាវទៅដល់កម្មករកម្មការិនីឲ្យបន្តចូលរួមការពារនូវសន្តិភាពនៅកម្ពុជាដែលរក្សាបានមកដល់បច្ចុប្បន្ន។
សម្ដេចតេជោបន្ថែមថាការរក្សាបាននៅសន្តិភាពបានផ្ដល់នូវការងារដែលមានស្ថេរភាព និងមានផលប្រយោជន៍ជាច្រើនទៀតសម្រាប់កម្មករកម្មការិនីទាំងអស់។
សម្ដេចបានលើកឡើងថាបើមានសង្គ្រាម អ្នកដែលរងគ្រោះមុនគេគឺប្រជាជន។
សម្ដេចថា៖ «នាយករដ្ឋមន្ត្រីមានកម្លាំងការពារទម្រាំវាយដល់ផ្ទះរបស់នាយករដ្ឋមន្ត្រីដល់កន្លែងរស់នៅរបស់នាយករដ្ឋមន្ត្រីប្រហែលជាស្លាប់មនុស្សអស់ជាច្រើន ហើយមានសង្គ្រាមតទៅទៀត។ អញ្ចឹងត្រូវធ្វើយ៉ាងម៉េចធានាឲ្យបានពីបញ្ហាសន្តិភាព»។
ជាមួយគ្នានេះសម្ដេចតេជោបានបញ្ជាក់ថា អ្នកដែលរកបានសន្តិភាព និងការពារសន្តិភាពបានគឺមានតែគណបក្សប្រជាជនកម្ពុជាមួយតែប៉ុណ្ណោះ។
សម្តេចតេជោ ហ៊ុន សែន បានបញ្ជាក់ថា ឱ្យតែនាយករដ្ឋមន្រ្ដី ដែលដឹកនាំដោយគណបក្សប្រជាជនកម្ពុជា នាយករដ្ឋមន្រ្ដីត្រូវបន្តធ្វើវេទិកាជួបជាមួយកម្មករកម្មការិនីបែបនេះ ដើម្បីបង្កើតជាវេទិកាក្នុងការដោះស្រាយបញ្ហានានាជូនដល់កម្មករនិយោជិតទាំងអស់ ៕
ដោយ ៖ សហការី
