សារព័ត៌មាន នគរវត្ត តែងតែនាំមុខគេជានិច្ច
ទីក្រុងណាននីង ៖ ដើម្បីផ្លាស់ប្តូរនិងលើកកម្ពស់វិស័យពត៌មានរវាងកម្ពុជាចិនព្រមទាំងសហការលើការផ្សេព្វផ្សាយវិស័យទេសចរណ៍រវាងប្រទេសកម្ពុជា-ចិន សារព័ត៌មានដ៏មានឥទ្ធិពលរបស់ចិន Guangxi Daily បានចុះហត្ថលេខាជាមួយសារពត៌មានដ៏ល្បីរបស់កម្ពុជា ស៊ីស៊ីថាមស៍។ ក្នុងឱកាសនោះសារព័ត៌មានចំណាស់ជិត១សតវត្សរ៍របស់ចិននេះ ក៏បានប្រគល់ជូនលិខិតតែងតាំងអ្នកសារពត៌មានកម្ពុជាទាំង១៤រូបជាអ្នករាយការណ៏កិតិ្តយសរបស់ Guangxi Daily ប្រចាំតំបន់អាស៊ាន(ASEAN)។
លោក យ៉ាងធាន (Yangtian ) និពន្ធនាយករង Guangxi Daily និងលោកផ្លុង វិចិត្រ អគ្គនាយកកាសែត Commercial News និងស៊ីស៊ីថាមស៍ បានចុះហត្ថលេខាលើកិច្ចសហប្រតិបត្តិការប្រព័ន្ធផ្សព្វផ្សាយនេះ ធ្វើឡើងនាព្រឹកថ្ងៃទី២០ ខែមិថុនា ឆ្នាំ២០២៣ម្សិលមិញនេះ នៅទីស្នាក់ការធំរបស់កាសែត Guangxi Daily ក្នុងទីក្រុងណាននីងខេត្តគ័រងស៊ី។
ក្នុងពិធីចុះអនុស្សរណៈនេះដែរ ក៏មានការអញ្ជើញចូលរួមជាសាក្សីពីថ្នាក់ដឹកនាំជាន់ខ្ពស់របស់Guangxi Daily និងអ្នកសារពត៌មានជាន់ខ្ពស់១៤រូបមកពីស្ថាប័នសារពត៌មានធំៗរបស់កម្ពុជា ដូចជា៖ កាសែតនគរវត្ត( NorkorWat News ),Rasmei Kampuchea Daily ,Thmey Thmey ,Freshnews ,khmer Times,Kampuchea Thmey Daily,BTV , ,Commercial News និងCC Times ។
ជាមួយគ្នានោះ ប្រធានផ្នែកកិច្ចការអាស៊ាននៃGuangxi daily លោក ម៉រ យឹលី បានថ្លែងថា៖«ពិធីចុះហត្ថលេខាលើកិច្ចសហប្រតិបត្តិការប្រព័ន្ធផ្សព្វផ្សាយ និងពិធីចេញលិខិតតែងតាំងអ្នករាយការណ៏កិតិ្តយសរបស់Guangxi Daily ប្រចាំតំបន់ASEAN នេះ ជាការបង្ហាញនូវទំនាក់ទំនងអន្តរជាតិ និងការពង្រឹងកិច្ចសហប្រតិបត្តិការក្នុងប្រព័ន្ធផ្សព្វផ្សាយអន្តរជាតិនិងការផ្លាស់ប្តូរ។វាមានសារៈសំខាន់ជាវិជ្ជមាក្នុងការលើកកម្ពស់កិច្ចសហប្រតិបត្តិការប្រព័ន្ធផ្សព្វផ្សាយចិន-អាស៊ាន ការនិទានរឿងរបស់ចិន និងការផ្សព្វផ្សាយសំឡេងដ៏ល្អរបស់គ័រងស៊ី»។
ប្រធានផ្នែកកិច្ចការអាស៊ានរូបនេះ បានថ្លែងបន្ថែមថា៖ ដោយមានការណែនាំ និងការគាំទ្រយ៉ាងខ្លាំងពីនាយកដ្ឋានឃោសនានៃគណៈកម្មាធិការបក្សនៃតំបន់ស្វយ័ត ការិយាល័យកិច្ចការបរទេសប្រចាំតំបន់ និងស្ថានទូតចិនប្រចាំកម្ពុជា ដំណើរទស្សាកិច្ចរបស់អ្នកសារពត៏មានកម្ពុជារៀបចំដោយ Guangxi Daily ត្រូវបានប្រារព្ធឡើងតាមការគ្រោងទុក នៅថ្ងៃទី ១៥ខែមិថុនារហូតដល់ថ្ងៃទី២០ខែមិថុនា។ នេះជាទស្សនកិច្ចដៃគូរបរទេសលើកទីមួយដែល Guangxi Dailyបានរៀបចំឡើង ក្រោយពីជំងឺកូវីដ១៩ ។ ឆ្នាំនេះ គឺជាខួបលើកទី ៦៥ នៃការបង្កើតទំនាក់ទំនងការទូតរវាងចិន និងជាឆ្នាំមិត្តភាពចិន-កម្ពុជា ហើយក៏ជាខួបលើកទី ២០នៃពិព័រណ៍ចិន-អាស៊ាន ។ វានឹងធ្វើឱ្យមានការរួមចំណែកជាវិជ្ជមានដល់រួមគ្នាក្នុងការកសាងសហគមន៍ចិន-អាស៊ានឱ្យកាន់តែជិតស្និទ្ធជាមួយនឹងអនាគតរួមគ្នា។
ដោយឡែកលោក ផ្លុង វិចិត្រ អគ្គនាយកកាសែត Commercial News និងស៊ីស៊ីថាមស៍ បានមានប្រសាសន៍ថា៖ តាមរយៈការចុះហត្ថលេខានេះ នឹងជួយពង្រឹងកិច្ចសហប្រតិបត្តិការជាមួយGUANGXI DAILYឱ្យកាន់តែស្អិតរមួត រួមគ្នានិយាយពីរឿងល្អៗរបស់កម្ពុជានិងប្រទេសចិន ។ តាមរយៈសារព៌ត៏មានភាសាខ្មែរ នឹងនិយាយរឿងល្អៗពីចិន និងតាមរយៈ GUANGXI DAILY និយាយរឿងល្អៗពីកម្ពុជាដើម្បីធ្វើឱ្យប្រជាជននៃប្រទេសទាំងពីរបានស្គាល់។
លោក ផ្លុង វិចិត្រ ក៏បានថ្លែងអំណរគុណកាសែត GUANGXI DAILY ដែលបានអញ្ជើញ ក្រុមអ្នកសារព៌ត៏មានកម្ពុជាមកទស្សកិច្ចនៅខេត្តគ័រងស៊ីនេះ។ នៅថ្ងៃទី១៥ យើងបានមកដល់ទីក្រុងណាននីងហើយជា បន្ទាប់មកទៀត យើងបានធ្វើដំណើរទៅទីក្រុង ឈីងចូវ លីវចូវ និង តំបន់ទេសចរណ៌ដ៏ស្រស់ស្អាតនៅក្រុងគួយលីង។
លោកអគ្គនាយកស៊ីស៊ីថាមស៍ បានបន្តថា៖«ក្នុងរយៈពេលប្រាំមួយថ្ងៃនេះ យើងបានស្គាល់ខេត្ត GUANGXIកាន់តែច្បាស់ ជាពិសេសនោះ ពេលទៅទស្សនកិច្ចនៅកំពង់ផែវៃឆ្លាតឈីងចូវធ្វើអ្នកកាសែតកម្ពុជាមានការស្ងើចសរសើរជាខ្លាំងអំពីការរីកចម្រើនជឿនលឿនយ៉ាងខ្លាំងលើបច្ចេកវិទ្យាទំនើប។ ដំណើរទស្សកិច្ចលើកនេះធ្វើឱ្យពួកយើងបានស្វែងយល់អំពីយុទ្ធសាស្ត្រមួយចំនួនរបស់រដ្ឋាភិបាលចិនក្នុងការកាត់បន្ថយភាពក្រីក្រនិងលើកកម្ពស់ជីវភាពប្រជា ពល រដ្ឋ។ ទាំងនេះជាបទពិសោធល្អៗសំរាប់កម្ពុជាយកទៅសិក្សាផងដែរ»។បន្ថែមពីនេះ លោក ផ្លុង វិចិត្រ តំណាងឱ្យប្រតិភូសារព៌ត័មានកម្ពុជា បានថ្លែងអំណរគុណជូនលោកយ៉ាងធាន និពន្ធនាយករង Guangxi Daily ,លោកម៉រ យឹ លី ប្រធានផ្នែកកិច្ចការអាស៊ាននៃGuangxi daily អ្នកនាង MAO ZHILIN ប្រធានការលិយាល័យទំនាក់ទំនង GUANGXI DAILY ប្រចាំកម្ពុជា ដែលបានគាំទ្រ រៀបចំទស្សកិច្ចនេះឡើង និងធ្វើដំណើរទស្សកិច្ចលើកនេះទទួលបានជោគជ័យ៕
ដោយ៖ស តារា
