សារព័ត៌មាន នគរវត្ត តែងតែនាំមុខគេជានិច្ច
អតីតគ្រូបង្វឹកក្លិប Barcelona លោក Gerardo Tata Martino នឹងជួបជុំជាមួយ Lionel Messi បន្ទាប់ពីត្រូវបានតែងតាំងជាអ្នកចាត់ការថ្មីរបស់ក្លិបInter Miami នៅលីកកំពូលអាមេរិក។ លោក Martino វ័យ៦០ឆ្នាំជំនួសអតីតខ្សែការពារលោក Phil Neville របស់ Manchester United ដែលត្រូវបានបណ្តេញចេញកាលពីថ្ងៃទី១ ខែមិថុនា។
គ្រូបង្វឹកសញ្ជាតិអាហ្សង់ទីនបានអវត្តមានពីការងារចាប់តាំងពីចាកចេញពីប្រទេសម៉ិកស៊ិកបន្ទាប់ពីការចាកចេញរបស់ពួកគេនៅវគ្គចែកពូល World Cup ឆ្នាំ២០២២។ សហម្ចាស់ក្លិបលោក David Beckham បាននិយាយថា “លោក Gerardo Tata Martino គឺជាឥស្សរជនដែលមានការគោរពយ៉ាងខ្លាំងនៅក្នុងកីឡារបស់យើងដែលកំណត់ត្រាបទពិសោធន៍ដ៏ល្អ។ យើងមានទំនុកចិត្តថាសមិទ្ធផលរបស់គាត់ក្នុងការប្រកួត និងបទពិសោធន៍ក្នុងនាមជាគ្រូបង្វឹកនឹងជម្រុញក្រុមរបស់យើង និងធ្វើឱ្យអ្នកគាំទ្ររបស់យើងរំភើបចិត្ត ហើយទន្ទឹងរង់ចាំមើលពីឥទ្ធិពលដែលគាត់នឹងមាននៅលើ និងក្រៅទីលាន”។
ក្លិបបានប្រកាសថា លោក Martino នឹងទទួលបន្ទុកជាគ្រូបង្វឹកនៅពេលទទួលបានឯកសារការងាររបស់គាត់។ ឆាប់ៗនេះគាត់នឹងភ្ជាប់ទំនាក់ទំនងជាមួយមិត្តរួមជាតិ Lionel Messi អាយុ៣៦ឆ្នាំដែលបានយល់ព្រមលើកិច្ចព្រមព្រៀងមួយនៅពេលគាត់ចាកចេញពី Paris St-Germain កាលពីថ្ងៃទី៧ ខែមិថុនា។
នេះជាលើកទី៣ហើយដែលម្ចាស់ពាន Ballon d’Or ៧សម័យ Messi និងលោក Martino បានធ្វើការជាមួយគ្នា ដោយធ្លាប់សហការគ្នានៅ Barcelona និងជាមួយក្រុមជម្រើសជាតិអាហ្សង់ទីន។ លោក Martino មានបទពិសោធន៍នៅសហរដ្ឋអាមេរិក និងបានដឹកនាំក្លិប Atlanta United ឈ្នះពានរង្វាន់ MLS Cup ក្នុងឆ្នាំ២០១៨ កំឡុងពេលស្នាក់នៅរយៈពេល២ឆ្នាំ។
ម្ចាស់ក្លិប Inter Miami លោក Jorge Mas បាននិយាយថា “យើងពិតជារីករាយណាស់ដែលអាចស្វាគមន៍ Gerardo Tata Martino មកកាន់ Inter Miami។ យើងមានអារម្មណ៍ថា គាត់ជាគ្រូបង្វឹកដែលផ្គូផ្គងមហិច្ឆតារបស់យើងក្នុងនាមជាក្លិប ហើយយើងមានសុទិដ្ឋិនិយមចំពោះអ្វីដែលយើងអាចសម្រេចបានរួមគ្នា។ គាត់បានបង្វឹកនៅកម្រិតខ្ពស់បំផុត ហើយយើងជឿថាបទពិសោធន៍នឹងមានប្រយោជន៍យ៉ាងខ្លាំងដល់យើង ខណៈដែលយើងមានបំណងប្រកួតប្រជែងដណ្តើមពាននៅទីនេះ”។
ក្រុម Inter Miami ឈរនៅបាតតារាង MLS ជាមួយនឹងការចាញ់១៣ដងពីការប្រកួតចំនួន១៨ក្នុងឆ្នាំ២០២៣ ហើយលោក Javier Morales ត្រូវបានគ្រប់គ្រងបណ្តោះអាសន្នចាប់តាំងពីការចាកចេញរបស់លោកNeville ៕
ដោយ៖ ភារៈ(រូបភាព ៖ BBC Sport)
