សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ខណៈកំពុងជិះម៉ូតូតាមដងផ្លូវស្រាប់តែត្រូវរថយន្តម៉ាកហុីយ៉ាន់ដាយបេីកបុកពីក្រោយនិងកិនបណ្ដាលឱ្យស្លាប់ភ្លាមៗនៅនឹងកន្លែងកើតហេតុកាលពីវេលាម៉ោង១០និង២៥នាទីព្រឹក ថ្ងៃទី០៤ ខែកក្កដា ឆ្នាំ២០២៣ ស្ថិតនៅត្រង់ចំណុចមុខផ្ទះកាហ្វេ៥០ម៉ែត្រ លើផ្លូវបេតុង៥០ម៉ែត្រ ស្ថិតក្នុងភូមិព្រែកប្រណាក សង្កាត់ជើងឯក ខណ្ឌដង្កោ រាជធានីភ្នំពេញ ។
សមត្ថកិច្ចបានឱ្យដឹងថា ភាគីម៉ូតូ មានឈ្មោះ ជូ សៀង ភេទប្រុស អាយុ៧៦ឆ្នាំ បើកបរម៉ូតូម៉ាក HONDA DREAM C125 ពណ៌ខ្មៅ ពាក់ផ្លាកលេខ ភ្នំពេញ 1FD-8928 (ស្លាប់បាត់បង់ជីវិតនៅកន្លែងកើតហេតុ)។ ចំណែកភាគីរថយន្ត អ្នកបើកបរមិនស្គាល់អត្តសញ្ញាណព្រោះបានរត់គេចខ្លួនបាត់ បន្សល់ទុករថយន្តចំនួន០១គ្រឿង ម៉ាក HYUNDAI ពណ៌ស ពាក់ស្លាកលេខ ភ្នំពេញ 3E-2325 ជាប្រភេទរថយន្តដឹកទំនិញ។
តាមប្រភពព័ត៌មានពីកន្លែងកេីតហេតុបានឱ្យដឹងថា មុនកេីតហេតុគេឃេីញបុរសរងគ្រោះភាគីខាងម៉ូតូធ្វេីដំណេីរតាមបណ្ដោយផ្លូវ៥០ម៉ែត្រក្នុងទិសដៅពីលិចទៅកេីតក្នុងល្បឿនល្មម ខណៈមកដល់ចំណុចកេីតហេតុស្រាប់តែភាគីរថយន្តបង្កម៉ាកហុីយ៉ាន់ដាយដែលបេីកស្របទិសគ្នាយ៉ាងលឿនមកបុកពីក្រោយពេញទំហឹង បណ្ដាលឱ្យបុរសរងគ្រោះភាគីខាងម៉ូតូដួល និងត្រូវរថយន្តកិនចំក្បាលបណ្ដាលឱ្យបែកខួរស្លាប់ភ្លាមមួយរំពេច ។
ក្រោយកើតហេតុ គ្រោះថ្នាក់ចរាចរណ៍ខាងលើត្រូវបានប្រគល់ជូនការិយាល័យចរាចរណ៍ផ្លូវគោករាជធានីភ្នំពេញដេីម្បីដោះស្រាយតាមច្បាប់ ។ ចំណែកសពជនរងគ្រោះ ត្រូវបានប្រគល់ឱ្យទៅក្រុមគ្រួសារយកទៅធ្វើបុណ្យតាមប្រពៃណី ៕
ដោយ ៖ ភារ៉ា ដង្កោ
