សារព័ត៌មាន នគរវត្ត តែងតែនាំមុខគេជានិច្ច
ទូរទស្សន៍កណ្តាលចិន (CCTV) ទើបតែបានផ្សាយព្រឹត្តិបត្រមួយនៅរសៀលថ្ងៃទី២៥ ខែកក្កដា ជាមួយនឹងខ្លឹមសារដែលរដ្ឋមន្ត្រីការបរទេស Qin Gang ត្រូវបានបណ្តេញចេញពីការងារ។
លោក Qin Gang មិនបានបង្ហាញខ្លួនជាសាធារណៈអស់រយៈពេលមួយខែមកហើយ។ គាត់បានបង្ហាញខ្លួនចុងក្រោយនៅថ្ងៃទី ២៥ ខែមិថុនា នៅពេលដែលគាត់បានទទួលអនុរដ្ឋមន្ត្រីការបរទេសរុស្ស៊ី Andrey Rudenko នៅទីក្រុងប៉េកាំង។
យោងតាមរបាយការណ៍ខ្លីរបស់ CCTV លោក Wang Yi ដែលជាអ្នកការទូតកំពូលរបស់ប្រទេសចិន និងជាប្រធានការិយាល័យនៃគណៈកម្មាធិការកណ្តាលសម្រាប់កិច្ចការបរទេសនៃបក្សកុម្មុយនិស្តចិន គឺជារដ្ឋមន្ត្រីការបរទេសថ្មីរបស់ប្រទេសនេះ។
របាយការណ៍មិនបានបញ្ជាក់ពីមូលហេតុនៃការបណ្តេញលោក Qin ចេញនើទេ។
ការសម្រេចចិត្តបណ្តេញលោក Qin ធ្វើឡើងនៅក្នុងសម័យប្រជុំពិសេសនៃគណៈកម្មាធិការអចិន្ត្រៃយ៍នៃសភាប្រជាជនចិនកាលពីថ្ងៃទី ២៥ ខែកក្កដា។ សម័យប្រជុំនេះធ្វើឡើងមួយថ្ងៃបន្ទាប់ពីការិយាល័យនយោបាយរបស់ប្រទេសចិនបានបើកកិច្ចប្រជុំដើម្បីពិភាក្សាអំពីបញ្ហាសេដ្ឋកិច្ច និងសង្គមជាច្រើន។
មុននេះ ទីភ្នាក់ងារសារព័ត៌មាន Xinhua បានរាយការណ៍ថា កិច្ចប្រជុំថ្ងៃទី ២៥ ខែកក្កដា នឹង “ពិចារណាលើសេចក្តីព្រាងវិសោធនកម្មច្បាប់ព្រហ្មទណ្ឌ និងសម្រេចលើការតែងតាំង និងការបណ្តេញមន្ត្រី”។
យោងតាមកាសែត South China Morning Post ការបណ្តេញលោក Qin ត្រូវបានធ្វើឡើងស្របតាមច្បាប់ស្តីពីការរៀបចំរដ្ឋសភានៃប្រទេសចិន ដែលចូលជាធរមានចាប់ពីខែមីនា ឆ្នាំ២០២១។ ច្បាប់នេះអនុញ្ញាតឱ្យគណៈកម្មាធិការអចិន្ត្រៃយ៍នៃសភាប្រជាជនចិនអាចតែងតាំង ឬបណ្តេញសមាជិកក្រុមប្រឹក្សារដ្ឋ (រដ្ឋាភិបាល) ដោយមិនចាំបាច់រង់ចាំសម័យប្រជុំថ្នាក់ជាតិ៕
ដោយ៖ ធីរីណា(រូបថត៖ Reuters)
