សារព័ត៌មាន នគរវត្ត តែងតែនាំមុខគេជានិច្ច
ខ្សែបម្រើស្លាប Riyad Mahrez បានបញ្ចប់ការផ្ទេររបស់គាត់ពី Manchester City ទៅក្លិប Al-Ahli របស់ Saudi Pro League។ កីឡាករវ័យ៣២ឆ្នាំដែលនៅសេសសល់រយៈពេល២ឆ្នាំលើកិច្ចសន្យារបស់គាត់ គឺជាកីឡាករដ៏ល្បីបំផុតចុងក្រោយបង្អស់របស់ SPL (Saudi Pro League) ក្នុងកិច្ចព្រមព្រៀងដែលមានតម្លៃរហូតដល់៣០លានផោន។
Man City បានចំណាយ៦០លានផោនសម្រាប់ខ្សែបម្រើស្លាបសញ្ជាតិអាល់ហ្សេរី Mahrez ក្នុងឆ្នាំ២០១៨ ហើយគាត់បានស៊ុតបញ្ចូលទី១៥គ្រាប់ក្នុង៤៧ប្រកួតនៅក្នុងយុទ្ធនាការឈ្នះពានរង្វាន់៣ក្នុងមួយរដូវកាលរបស់ក្រុមមេឃខៀវកាលពីរដូវកាលមុន។
Mahrez បាននិយាយថា “ការលេងឱ្យ Manchester City គឺជាកិត្តិយស និងឯកសិទ្ធិ។ ខ្ញុំបានមក Man City ដើម្បីឈ្នះពានរង្វាន់ និងរីករាយជាមួយបាល់ទាត់របស់ខ្ញុំ ខ្ញុំសម្រេចបាននូវអ្វីៗទាំងអស់ និងអ្វីៗជាច្រើនទៀត។ ខ្ញុំបានបង្កើតអនុស្សាវរីយ៍ដ៏អស្ចារ្យអស់មួយជីវិត Manchester City នឹងក្លាយជាផ្នែកដ៏ធំ និងរីករាយនៃជីវិតរបស់ខ្ញុំជារៀងរហូត”។
Mahrez បានជួយ Man City ឈ្នះពានរង្វាន់ធំៗចំនួន១០ក្នុងអំឡុងពេល៥រដូវកាលជាមួយក្លិប ប៉ុន្តែជាកីឡាករជំនួសដែលមិនបានប្រើសម្រាប់ទាំងការប្រកួត FA Cup និង Champions League វគ្គផ្តាច់ព្រ័ត្រ។
លោក Txiki Begiristain នាយកផ្នែកកីឡាបាល់ទាត់របស់ Man City បាននិយាយថា “Riyad គឺជាកត្តាសំខាន់ក្នុងភាពជោគជ័យដ៏អស្ចារ្យរបស់យើងក្នុងរយៈពេល៥ឆ្នាំចុងក្រោយនេះ ហើយការរួមចំណែករបស់គាត់នឹងមិនត្រូវបានគេបំភ្លេចឡើយ។ គាត់ជាកីឡាករបាល់ទាត់ដ៏អស្ចារ្យម្នាក់ក្នុងការមើល និងបន្សល់ទុកនូវអនុស្សាវរីយ៍ល្អៗជាច្រើន។ មានខ្សែបម្រើស្លាបតិចតួចដែលមានកម្រិតជំនាញ និងបច្ចេកទេសរបស់គាត់នៅក្នុងបាល់ទាត់ពិភពលោក ហើយគាត់នឹងត្រូវខកខាន ប៉ុន្តែគ្រប់គ្នានឹងជូនពរគាត់ឱ្យល្អបំផុត នៅពេលគាត់ចាប់ផ្តើមជំពូកថ្មីក្នុងអាជីពរបស់គាត់”។
កីឡាករ Karim Benzema, N’Golo Kante និង Ruben Neves បានដើរតាម Cristiano Ronaldo ទៅកាន់ប្រទេសអារ៉ាប៊ីសាអ៊ូឌីតហើយក្នុងរដូវក្តៅនេះ ខណៈដែល Steven Gerrard ត្រូវបានតែងតាំងជាអ្នកចាត់ការក្លិប Al-Ettifaq ហើយ Michael Emenalo ត្រូវបានតែងតាំងជានាយកបាល់ទាត់របស់ SPL ។ រីឯ Jordan Henderson អតីតប្រធានក្រុម Liverpool បានបញ្ចប់ការផ្ទេរទៅកាន់ក្លិប Al-Ettifaq របស់លោកGerrard កាលពីថ្ងៃព្រហស្បតិ៍រួចហើយដែរ។
មូលនិធិវិនិយោគសាធារណៈរបស់ប្រទេស (PIF) ក៏បានកាន់កាប់ក្លិបឈានមុខគេចំនួន៤របស់ SPL រួមទាំង Al-Ahli ផងដែរ ដោយសារលីកមានគោលបំណងក្លាយជាក្រុមមួយក្នុងចំណោមក្លិបកំពូលទាំង៥នៅលើពិភពលោក។
Mahrez គឺជាកីឡាករតម្លៃខ្ពស់តែម្នាក់គត់ដែលខកខានដំណើរប្រកួតមិត្តភាពមុនរដូវកាលនៅអាស៊ីរបស់ Man City។ អនាគតរបស់ខ្សែការពារអង់គ្លេស Kyle Walker ខ្សែបម្រើព័រទុយហ្គាល់ Bernardo Silva និងខ្សែការពារអេស្ប៉ាញ Aymeric Laporte សុទ្ធតែជាប្រធានបទនៃការរំពឹងទុកនៅរដូវក្តៅនេះសម្រាប់ក្លិបមេឃខៀវក្នុងការប្រកួតមុនរដូវកាលនេះ។
របាយការណ៍នៅក្នុងប្រទេសអាឡឺម៉ង់បានស្នើថា ក្លិប Bayern Munich បានយល់ព្រមលើកិច្ចព្រមព្រៀងមួយសម្រាប់ Walker ប៉ុន្តែត្រូវបានគេគិតថា ពួកគេមានភាពទូលំទូលាយនៅឡើយ ដោយមិនមានការចរចាជាក់លាក់នោះទេ។
ចំណែកខ្សែការពារសញ្ជាតិព័រទុយហ្គាល់ Joao Cancelo ក៏ជាផ្នែកមួយនៃក្រុម Man City បន្ទាប់ពី Bayern Munich បានជ្រើសរើសមិនទទួលយកជម្រើសនៃការបង្វែរការខ្ចីជើងរយៈពេល៦ខែកាលពីរដូវកាលមុនទៅជាកិច្ចសន្យាអចិន្ត្រៃយ៍។ រីឯអ្នកចាំទី Zach Steffen អវត្តមានដោយសាររបួសជង្គង់ បើទោះបីជា Man City បើកចំហចំពោះការផ្ទេរកីឡាករអន្តរជាតិអាមេរិករូបនេះនៅរដូវក្តៅនេះក៏ដោយ ៕
ដោយ៖ ភារៈ(រូបភាព ៖ BBC Sport)
