សារព័ត៌មាន នគរវត្ត តែងតែនាំមុខគេជានិច្ច
លោក Justin Trudeau ការទទួលបានជោគជ័យក្នុងការងារ ជួយនាំមកូនូវសុខសន្តិភាព សុភមង្គលដល់គ្រួសាររាប់លាននាក់ ប៉ុន្តែខ្លួនត្រូវបែកបាក់គ្រួសារដោយ
កត្តាផ្សេងៗ ដែលធ្វើឱ្យអ្នកទាំងពីរសម្រេចចែកផ្លូវគ្នា។
សារព័ត៌មាន Reuters នៅថ្ងៃព្រហស្បតិ៍ ទី៣ ខែសីហា ឆ្នាំ២០២៣បានផ្សាយថា នាយករដ្ឋមន្ត្រីកាណាដា លោក ចាស្ទីន ឌ្រូដូ (Justin Trudeau) និងភរិយារបស់លោក គឺអ្នកស្រី សូហ្វី (Sophie) នៅថ្ងៃពុធសប្ដាហ៍នេះ បាននិយាយថា អ្នកទាំង២ បានសម្រេចចិត្តចែកផ្លូវគ្នាហើយ នៅក្នុងការប្រកាសដ៏ភ្ញាក់ផ្អើលមួយដែលនឹងបិទបញ្ចប់ចំណងអាពាហ៍ពិពាហ៍រយៈពេលជាង១៨ឆ្នាំមកនេះ។
នៅក្នុងសេចក្ដីប្រកាសមួយ គូស្វាមីភរិយាទាំង២ ក៏បាននិយាយដោយស្មោះត្រង់ផងដែរពីភាពរកាំរកូសនៃទំនាក់ទំនងដែលធ្វើឱ្យអ្នកទាំង២មិនបានទៅណាមកណាជាមួយគ្នា នៅតាមទីសាធារណៈនារយៈពេលប៉ុន្មានឆ្នាំចុងក្រោយនេះ។ លោក ឌ្រូដូ មានអាយុ ៥១ឆ្នាំ និងអ្នកស្រី សូហ្វី ក្រេហ្គ័រ (Sophie Gregoire) មានអាយុ ៤៨ឆ្នាំ បានរៀបការជាមួយគ្នាក្នុងឆ្នាំ២០០៥ និងមានកូនចំនួន ៣នាក់ ក្នុងនោះកូនច្បងមានអាយុ១៥ឆ្នាំ កូនទី២ ១៤ឆ្នាំ និងកូនទី៣ មានអាយុ ៩ឆ្នាំ។
ការប្រកាសចែកផ្លូវគ្នារវាងលោក ឌ្រូដូ និងអ្នកស្រី សូហ្វី កើតមានឡើងតែមួយសប្ដាហ៍ប៉ុណ្ណោះ បន្ទាប់ពីលោក ឌ្រូដូ ធ្វើការរុះរើគណៈរដ្ឋមន្ត្រី ដើម្បីលើកកម្ពស់ប្រជាប្រិយភាពនៃគណបក្សរបស់លោក និងត្រៀមខ្លួនចូលរួមក្នុងការបោះឆ្នោតសកល ដែលគ្រោងនឹងធ្វើឡើងនៅខែតុលា ឆ្នាំ២០២៥៕ ដោយ៖ ធីរីណា
រូបថត៖ AFP
