សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង ៖ លោកវរសេនីយ៍ទោ ប៉ាន ចាន់រិទ្ធ នាយការិយាល័យនគរបាលប្រឆាំងគ្រឿងញៀន នៃស្នងការដ្ឋាននគរបាលខេត្តបាត់ដំបង បានឱ្យដឹងនៅថ្ងៃទី០៧ ខែសីហា ឆ្នាំ២០២៣នេះថា៖ មុខសញ្ញាគ្រឿងញៀនម្នាក់ យ៉ាងសកម្មនៅក្រុងបាត់ដំបង និងវត្ថុតាងមួយចំនួនជាក់ស្ដែង ត្រូវបានសមត្ថកិច្ចនគរបាលបង្រ្កាប និងឃាត់ខ្លួនបានហើយ ក្រោយលោកដឹកនាំកម្លាំងចុះស្រាវជ្រាវដោយផ្ទាល់អនុវត្តតាមនីតិវិធីច្បាប់។
លោកវរសេនីយ៍ទោ ប៉ាន ចាន់រិទ្ធ បានឱ្យដឹងទៀតថា ការឃាត់ខ្លួនជនសង្ស័យខាងលេីនេះ បានធ្វេីឡេីងកាលពីយប់ថ្ងៃទី០៦ ខែសីហាម្សិលមិញនេះ នៅចំណុចភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង។
ជនសង្ស័យចំនួន ០១នាក់ ឈ្មោះ ខន ឧត្តម ភេទប្រុស អាយុ១៩ឆ្នាំ មានទីលំនៅ ភូមិតាកុយ សង្កាត់ក្តុលដូនទាវ ក្រុងបាត់ដំបង ខេត្តបាត់ដំបង ។
ចំណែកវត្ថុតាងចាប់យកបានរួមមាន៖ ថ្នាំញៀនប្រភេទកេតាមីន (KETA MINE) ចំនួន ០៣ថង់ ទម្ងន់ ២៤, ៤៥ក្រាម (ទាំងសំបក) ,ថ្នាំញៀនប្រភេទអ៉ិចស្តាស៊ី (MD MA) ចំនួន ៤៤គ្រាប់ ទម្ងន់ ១៥, ២៥ ក្រាម ,ទូរស័ព្ទដៃចំនួន ០១គ្រឿង (ចាស់) ជញ្ជីញសម្រាប់ថ្លឹងថ្នាំញៀនលក់ចំនួន ០១គ្រឿង ,ម៉ូតូចំនួន ០១គ្រឿង ម៉ាកហុងដាស្កុបពី ពណ៌ខ្មៅ ស៊េរីឆ្នាំ២០២២ ពាក់ស្លាក លេខ បាត់ដំបង 1AR-4757 ដែលលេខតួ និងម៉ាស៊ីន MLHUK O4I7NS221377 និងថង់សម្រាប់ច្រកថ្នាំញៀនលក់មួយចំនួន។
គួរបញ្ជាក់ថា បច្ចុប្បន្នជនល្មើស រួមនិងវត្ថុតាងត្រូវបានកម្លាំងសមត្ថកិច្ចកំពុងកសាងសំណុំរឿងបញ្ជូនទៅអនុវត្តទោសតាមច្បាប់៕
ដោយ៖ សហការី
