សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ ៖ បើយោងតាមការឱ្យដឹងពី លោក វ៉ី សំណាង អភិបាល នៃគណៈអភិបាលខេត្តកំពង់ស្ពឺ ក្នុងឱកាសដឹកនាំប្រតិភូខេត្តជួបពិភាក្សាការងារ និងពិនិត្យច្រវ៉ាក់ផលិតកម្មតាមបណ្តារោងចក្រ សហគ្រាស នៅខេត្តក្វាងចូវ សាធារណៈរដ្ឋប្រជាមានិតចិន ថ្ងៃទី១៥ ខែសីហា ឆ្នាំ២០២៣ បានថ្លែងអោយដឹងថា, អ្នកវិនិយោគផ្នែករោងចក្រ សហគ្រាស នៃសាធារណរដ្ឋប្រជាមានិតចិន គ្រោងមកបង្កើតរោងចក្រ សហគ្រាសចំនួន ២៥កន្លែងបន្ថែមទៀត នៅក្នុងខេត្តកំពង់ស្ពឺ ដែលមានតម្រូវការកម្លាំងពលកម្មប្រមាណជា ២៣០០០កន្លែង លើតម្រូវការសរុបប្រមាណជាង ៥០,០០០កន្លែង នៅចុងឆ្នាំ២០២៣។
លោក វ៉ី សំណាង បានឱ្យដឹងថា ក្នុងដំណើរបំពេញបេសកកម្មនៅឯខេត្តក្វាងចូវ គណៈប្រតិភូបានជួបពិភាក្សាការងារ និងទស្សនៈកិច្ចផ្ទាល់នៅតាមបណ្តាសួនឧស្សាហកម្មធំៗ មានដូចជា:
ទី ១. សួនឧស្សាហកម្ម SITOY GROUP ស្ថិតនៅសង្កាត់ ហូវ ជៀក ក្រុងតុងហ្គ័ន (មាន ៤រោចក្រ សហគ្រាស) ដែលកំពុងផលិតកាបូបម៉ាកយីហោល្បីៗសម្រាប់នាំចេញទៅក្រៅប្រទេស ហើយម៉ាកយីហោទាំងអស់ នឹងត្រូវទៅបង្កើតរោងចក្រនៅខេត្តកំពង់ស្ពឺ។
លោក TERAS YEUNG អគ្គនាយកក្រុមហ៊ុន SITOY GROUP បានបញ្ជាក់ថា ក្រុមហ៊ុនរបស់លោកប្តេជ្ញាដោយភាពជឿជាក់ និងទៅបង្កើតសាខានៅខេត្តកំពង់ស្ពឺចំនួន ២រោងចក្រ ដោយផលិតកាបូបម៉ាកល្បីៗដែលមានតម្រូវការកម្លាំងពលកម្មជំហានដំបូងចំនួនប្រមាណ ៣,០០០កន្លែង។
ទី២. នៅសួនឧស្សាហកម្ម ហុង អ៊ី (មាន៦រោងចក្រ សហគ្រាស) កាត់ដេរលើផ្នែកសម្លៀកបំពាក់។ ប្រធានរោងចក្រសហគ្រាសទាំងនេះក៏នឹងត្រូវទៅបង្កើតសាខានៅខេត្តកំពង់ស្ពឺផងដែរ ដែលនឹងមានតម្រូវការកម្លាំងពលកម្មជំហានដំបូងប្រមាណ ៦,០០០កន្លែង។
ទី៣. សួនឧស្សាហកម្ម ហ្វីចូវ (មាន៤៤រោងចក្រ សហគ្រាស) ជារោងចក្រ ផលិតសម្លៀកបំពាក់ និងតម្បាញ, ផលិតស្បែកជើង, គ្រឿងបង្គុំអេឡិចត្រូនិក, ស្រោមទូរសព្ទ និងស្គ្រីនទូរសព្ទ, ជ្រលក់ពណ៌ក្រណាត់។ សួនឧស្សាហកម្មនេះមានរោងចក្រ សហគ្រាសចំនួន ១៧ ដែលនឹងត្រូវទៅបង្កើតនៅខេត្តកំពង់ស្ពឺ ដោយមានតម្រូវការកម្លាំងពលកម្មជំហានដំបូងប្រមាណ ១៤,០០០នាក់។
លោក វ៉ី សំណាង បានលើកឡើងដោយគូសបញ្ជាក់ថា ការសម្រេចចិត្តរបស់អ្នកវិនិយោគទាំងអស់នៅក្នុងជំនួបពិភាក្សាការងារជាមួយប្រតិភូខេត្តកំពង់ស្ពឺ បានបង្ហាញឱ្យឃើញពីការជឿជាក់លើការដឹកនាំរបស់រាជរដ្ឋាភិបាលកម្ពុជាក្រោមនយោបាយ ឈ្នះ-ឈ្នះ ដែលធ្វើឱ្យមានសុខសន្តិភាព ស្ថិរភាពនយោបាយពេញលេញ។
សូមបញ្ជាក់ថា , អ្នកវិនិយោគទុនបរទេស ក៏ដូចជាអ្នកវិនិយោគក្នុងស្រុក ការបណ្ដាក់ទុនរកស៊ី ចំណាយថវិកា ដោយយល់ឃើញថា ប្រទេសកម្ពុជា មានសន្តិភាព ដូច្នេះការរកស៊ី ជាទំនុកចិត្តរបស់ក្រុមហ៊ុន ។ តាមរយៈការវិនិយោគនេះផងដែរ មិនត្រឹមតែរាជរដ្ឋាភិបាល ទទួលបានចំណូលសម្រាប់សេដ្ឋកិច្ចជាតិប៉ុណ្ណោះទេ គឺបានស្រូបយកកម្លាំងពលកម្មក្នុងស្រុក ឱ្យប្រជាពលរដ្ឋខ្មែរ មានការងារធ្វើ ទទួលបានចំណូល ដោះស្រាយជីវភាពប្រចាំថ្ងៃ កាត់បន្ថយភាពក្រីក្រ ដែលយើងបានមើលឃើញស្រាប់ កម្ពុជាបច្ចុប្បន្ន មានការរីកចម្រើន ប្រជាពលរដ្ឋ ផ្លាស់ប្ដូរមុខមាត់ ជីវភាពក្នុងការរស់នៅប្រចាំថ្ងៃ ក្រោមដំបូលសន្តិភាព ៕
ដោយ ៖ សហការី
