សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមការបញ្ជាក់ពីមន្រ្តីជាន់ខ្ពស់បស់មន្ទីរប្រឆាំងគ្រឿងញៀននៃអគ្គស្នងការដ្ឋាននគរបាលជាតិបានឱ្យដឹងថា នៅព្រឹកថ្ងៃទី១៩ ខែសីហា ឆ្នាំ២០២៣នេះ នឹងធ្វើសន្និសីទសារព័ត៌មានជាសាធារណៈ បង្ហាញអំពីប្រតិបត្តិការនិងឧក្រិដ្ឋជនដែលចាប់ខ្លួនបាន ពាក់ព័ន្ធករណីរំដោះអ្នកទោសដែលជាមេខ្លោងគ្រឿងញៀននៅខេត្តសៀមរាប។
គួររម្លឹកថា ខ្មាន់កាំភ្លើងមួយក្រុមមានគ្នា៥នាក់ប្រដាប់ដោយអាវុធគ្រប់ដៃ និងមានតកាណុងផង បានសម្រុកចូលរំដោះអ្នកទោសជនជាតិចិនម្នាក់ ឈ្មោះ Chen hsin han អាយុ៤៥ឆ្នាំ ជាប់ទោសពាក់ព័ន្ធករណីគ្រឿងញៀនដែលចំនួនទោសជាង៥០ឆ្នាំ ហើយមន្ដ្រីពន្ធនាគារបានបញ្ជូនទៅពេទ្យធ្មេញមួយកន្លែង។ ហេតុការណ៍នេះ បានបង្កឱ្យមានការភ្ញាក់ផ្អើលនៅព្រឹកថ្ងៃទី១៧ ខែសីហា ឆ្នាំ២០២៣នៅចំណុចគ្លីនិកធ្មេញជុំចិន្តា ក្នុងភូមិតាភុល សង្កាត់ស្វាយដង្គំ ក្រុងសៀមរាប ខេត្តសៀមរាប។
សេចក្ដីរាយការណ៍ជំហានដំបូង បានឱ្យដឹងថា មន្ដ្រីពន្ធនាគារចំនួន៤នាក់ បានបញ្ជូនពិរុទ្ធជនជនជាតិចិនខាងលើ ទៅគ្លីនិកធ្មេញ លុះពេលកំពុងអង្គុយចាំពេទ្យធ្វើធ្មេញ ស្រាប់តែមានជនមិនស្គាល់មុខ៥នាក់ មានពាក់ស្រោមមុខ ស្រោមដៃ និងប្រដាប់ដោយអាវុធដែលតកាណុង បានភ្ជង់ទៅកាន់មន្ដ្រីពន្ធនាគារ ហើយជនសង្ស័យបានចូលទៅរំដោះអ្នកទោសចេញទៅបាត់។ ពេលធ្វើសកម្មភាពនោះ ក្រុមខ្មាន់កាំភ្លើងបានយកខ្សែរូតចងរឹតដៃមន្ដ្រីពន្ធនាគារទាំង៤នាក់នោះថែមទៀត។
ក្រោយរំដោះអ្នកទោសបានហើយក្រុមខ្មាន់កាំភ្លើងបានឡើងជិះរថយន្ដមួយគ្រឿង ម៉ាក Lexus 330 ពណ៌ផ្សែងបារី ពាក់ផ្លាកលេខភ្នំពេញ2AA-4315 គេចខ្លួនបាត់ស្រមោល។ រំលងបានប៉ុន្មានម៉ោងក្រោយមក រថយន្ដដែលក្រុមខ្មាន់កាំគ្លើងជិះធ្វើសកម្មភាពនោះ ត្រូវបានគេប្រទះឃើញយកទៅប្លុងចោល។ ក្នុងនោះសមត្ថកិច្ចជំនាញប្រទះឃើញកាំភ្លើងខ្លីចំនួន៥ដើម និងសម្ភារមួយចំនួនទៀត។ បច្ចុប្បន្នកម្លាំងសមត្ថកិច្ចពាក់ព័ន្ធទាំងអស់ កំពុងរួមដៃគ្នាដើម្បីស្រាវជ្រាវស្វែងរកក្រុមឧក្រិដ្ឋជន។
គួរបញ្ជាក់ថា ក្នុងប្រតិបត្តិការរយៈពេលពីរថ្ងៃនេះ ធ្វើឡើងក្រោមការបញ្ជាផ្ទាល់ពី នាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ ដោយកម្លាំងអង្គភាពជំនាញជាច្រើនស្ថាប័ន បានរួមដៃគ្នាយ៉ាងស្អិតរមួត ដើម្បីឈានដល់ការចាប់ខ្លួនឧក្រិដ្ឋជនដែលពាក់ព័ន្ធករណីនេះ។ សរុបតុល្យការចុងក្រោយនេះ ឧក្រិដ្ឋជនចំនួន៨នាក់ហើយដែលត្រូវបានចាប់ខ្លួន៕
ដោយ៖ សហការី
