សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ កម្លាំងការិយាល័យនគរបាលព្រហ្មណ្ឌកម្រិតធ្ងន់ នៃស្នងការនគរបាលខេត្តព្រះសីហនុ កាលពីយប់រំលងអធ្រាត្រឈនចូលថ្ងៃទី២៨ ខែសីហា ឆ្នាំ២០២៣ ក្រោយទទួលព័ត៌មានថា មានករណីហិង្សាមួយ បានកើតឡើងរវាងជនជាតិវៀតណាម និងជនជាតិចិន ចំនួន២ក្រុម (ក្នុងនោះ១ក្រុមមានគ្នាម្នាក់ឯង និង១ក្រុមទៀតមានគ្នា១២នាក់) បានវាយប្រហារគ្នាផ្អេីលពេញក្រុងព្រះសីហនុ ស្ថិតនៅមុខអគារកាស៊ីណូ វ៉ាង ឆាវ ជាប់សាលាបឋមសិក្សាកម្មករ ស្ថិតនៅភូមិ៤ សង្កាត់៤ ក្រុង-ខេត្តព្រះសីហនុុ ក៏ចុះប្រតិបត្តិការបង្រ្កាប និងឃាត់ខ្លួនយកមកចាត់ការតាមច្បាប់។
របាយការណ៍របស់ស្នងការដ្ឋាននគរបាលខេត្តព្រះសីហនុ បានឲ្យដឹងថា ក្រោយពីទទួលដំណឹងភ្លាមការិយាល័យនគរបាលព្រហ្មទណ្ឌធ្ងន់ បានចុះទីតាំងកើតហេតុខាងលើ និងដោយមានការសម្របសម្រួលនីតិវិធីពីលោក ពេញ ពិសិដ្ឋ ព្រះរាអាជ្ញារង អមសាលាដំបូងខេត្តព្រះសីហនុ បានធ្វើស្រាវជ្រាវ ឆែកឆេរនៅក្នុងអគារកាស៊ីណូខាងលើ ឃាត់ខ្លួនបានមនុស្សចំនួន១៣នាក់ ពាក់ព័ន្ធករណីហិង្សា (វាយ គ្នាទៅវិញទៅមក)។
គួរជម្រាបជូនថា កំឡុងពេលចុះឆែកឆេរ កម្លាំងជំនាញបានរកឃើញ ជនសង្ស័យចំនួន២នាក់បន្ថែមទៀត ដែលកំពុងស្នាក់នៅក្នុងបន្ទប់លេខ 8515 នៃអគារខាងលើ ពាក់ព័ន្ធករណីកាន់កាប់អាវុធដោយខុសច្បាប់ (អាវុធខ្លីម៉ាក K54 ចំនួន១ដើម បង់១ គ្រាប់៤គ្រាប់ និងកាំបិតចំនួន៣ដើម)។
បច្ចុប្បន្នកម្លាំងជំនាញបានធ្វើការឃាត់ខ្លួន ជនសង្ស័យទាំង១៥នាក់ រួមទាំងវត្ថុតាងមកស្នងការដ្ឋាននគរបាលខេត្តព្រះសីហនុ ដើម្បីបន្តនីតិវិធីច្បាប់៕
ដោយ៖សហការី
