ឥណ្ឌូនេស៊ីដាក់ពង្រាយទាហាន និងប៉ូលិសជាង១៩.០០០នាក់ដើម្បីការពារកិច្ចប្រជុំកំពូលអាស៊ាន

ទាហាននិងប៉ូលិសឥណ្ឌូនេស៊ីសរុបជាង ១៩.០០០នាក់ នឹងត្រូវបានប្រមូលផ្តុំដើម្បីចូលរួមការពារកិច្ចប្រជុំកំពូលសមាគមប្រជាជាតិអាស៊ីអាគ្នេយ៍ (អាស៊ាន) លើកទី៤៣ ដែលនឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី៧ ខែកញ្ញា នៅរដ្ឋធានីហ្សាការតា។
នាថ្ងៃទី ១ខែកញ្ញា មេបញ្ជាការកងទ័ពជាតិឥណ្ឌូណេស៊ី (TNI) ឧត្តមសេនីយ៍ Yudo Margono និងអគ្គស្នងការនគរបាលជាតិឥណ្ឌូនេស៊ី (POLRI) ឧត្តមសេនីយ Listyo Sipit Prabowo បានអញ្ជើញជាអធិបតីត្រួតពិនិត្យកម្រិតនៃការត្រៀមលក្ខណៈដើម្បីធានាសន្តិសុខសម្រាប់កិច្ចប្រជុំកំពូលអាស៊ានលើកទី៤៣ ។ ភាគីទាំងពីរបានឯកភាពពង្រឹងទំនាក់ទំនង និងការសម្របសម្រួល បង្កើតការរួមសហការគ្នាដើម្បីធានាសុវត្ថិភាពនិងជោគជ័យនៃសន្និសីទ។
TNI បានបង្កើតកងកម្លាំងសន្តិសុខពិសេសមួយដើម្បីការពារព្រឹត្តិការណ៍ដ៏ធំនេះមានទាហានចំនួន 13.158 នាក់ ទន្ទឹមនឹងនេះដែរ POLRI រួមជាមួយកងកម្លាំងប៉ូលីសនៃទីក្រុង Jakarta, Banten និង West Java ក៏បានចាប់ផ្តើមយុទ្ធនាការសន្តិសុខដោយមានការចូលរួមពីប៉ូលិសចំនួន 6.182 នាក់។
នៅក្នុងការត្រួតពិនិត្យនោះ ឧត្តមសេនីយ៍ Yudo បាននិយាយថា TNI បានចល័តប្រព័ន្ធការពារសំខាន់ៗ (Alutsista) រួមទាំងរថយន្តការពារគ្រាប់កាំភ្លើង ឧទ្ធម្ភាគចក្រ អាវុធពិសេសរបស់អង្គភាពនុយក្លេអ៊ែរ – គីមី – ជីវសាស្រ្ត … ត្រៀមខ្លួននៅខាងក្រៅទីក្រុងហ្សាការតា ដើម្បីប្រឆាំងនឹងការគំរាមកំហែងផ្លូវអាកាសនិងសមុទ្រ។ កងទ័ពជើងទឹកឥណ្ឌូនេស៊ីបានបញ្ជូននាវាចម្បាំងទៅល្បាតជុំវិញឈូងសមុទ្រចាការតា។ ខណៈពេលដែលកងទ័ពអាកាសឥណ្ឌូនេស៊ី បានដាក់ពង្រាយយន្តហោះល្បាតដែនសមុទ្រ ដើម្បីត្រួតពិនិត្យដែនទឹក។ មានក្រុមការងារ TNI ប្រហែល 11 ដែលនឹងត្រូវបានដាក់ពង្រាយ រួមទាំងក្រុមការពារមនុស្សទន់ខ្សោយ ក្រុមសន្តិសុខពិសេស ក្រុមជម្លៀសបន្ទាន់ ក្រុមសន្តិសុខបណ្តាញ ក្រុមប្រព័ន្ធផ្សព្វផ្សាយ និងក្រុមសន្តិសុខអាកាសយានដ្ឋាននិងកំពង់ផែ… បុគ្គលិក 50 នាក់នៃកងកម្លាំងសន្តិសុខប្រធានាធិបតី ដែលតំណាងឱ្យអង្គភាពពិសេសជាច្រើននៃ TNI បានអនុវត្តការជួយសង្គ្រោះនិងការជម្លៀសមនុស្សសំខាន់ៗនៅតំបន់ព្រលានយន្តហោះ៕ ដោយ៖ ធីរីណា

ប្រភពរូបថត៖ VOV.VN