សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ សំណុំរឿងករណីអ្នកគ្រូពេទ្យ អយ ឆវឌ្ឍនី ដែលប្រេីហិង្សា(ទះកំផ្លៀង) លេីជនរងគ្រោះឈ្មោះ ហឿន សុខរតណី នឹងត្រូវបញ្ជូនទៅអយ្យការអមសាលាដំបូងចាត់ការបន្ត ទោះបីអ្នកគ្រូពេទ្យប្រឹងលួងលោមជនរងគ្រោះមកបញ្ចប់ហេីយក្ដី ។ បណ្ដឹងព្រហ្មទណ្ឌមិនអាចបញ្ចប់ត្រឹមការព្រមព្រៀងគ្នាណាមួយនោះទេ គឺត្រូវបញ្ជូនសំណុំរឿងរួមទាំងវត្ថុតាងទៅអយ្យការដេីម្បីចាត់ការបន្ត ។
លោកវរសេនីយ៍ នង សាប៊ុង ប្រធាននគរបាលប៉ុស្តិ៍ទួលសង្កែ១ បានបញ្ជាក់ប្រាប់ថា ករណីអ្នកគ្រូពេទ្យប្រេីហិង្សានោះលោកបានបញ្ជាអោយបញ្ជូនសំណុំរឿងទៅកាន់តុលាការហើយ គឺមិនអនុញ្ញាតអោយសម្របសម្រួលគ្នាទេ ។
ដោយឡែកនៅព្រឹកនេះ លោក ម៉ៅ បូរ៉ែន ដែលអះអាងថាជាជនរងគ្រោះដោយសារអ្នកគ្រូ អយ ឆវឌ្ឍនី ដែរនោះ បានអោយដឹងថា លោកក៏បានដាក់ពាក្យសុំរូបមន្តអនុវត្តសាលក្រមស្ថាពរដែលលោកបានឈ្នះក្ដីជនជាប់ចោទ អយ ឆវឌ្ឍនី ដែរ។
អ្នកគ្រូពេទ្យ អយ ឆវឌ្ឍនី ត្រូវតុលាការសម្រេចផ្ដន្ទាទោសដាក់ពន្ធនាគារ រយៈពេល ១ឆ្នាំ តែទោសនេះត្រូវព្យួរពីបទ ហិង្សាដោយចេតនា ។ តាមការផ្ដន្ទាទោសនេះ បេីសំណុំរឿងថ្មីដែល អ្នកគ្រូពេទ្យ អយ ឆវឌ្ឍនី ប្រេីហិង្សាត្រូវបញ្ជូនទៅតុលាការនោះគាត់ត្រូវប្រឈមមុខនឹងការជាប់ពន្ធនាគារដោយស្វ័យប្រវត្តិ ព្រោះទោសព្យួររបស់គាត់នៅជាធរមាននៅឡេីយទេ។
សូមបញ្ជាក់ជូនថា សំណុំរឿងករណី អ្នកគ្រូពេទ្យ អយ ឆវឌ្ឍនី ដែលប្រេីហិង្សា ( ទះកំផ្លៀង ) លេីជនរងគ្រោះឈ្មោះ ហឿន សុខរតណី ត្រូវបានបញ្ចប់កាលពីល្ងាចថ្ងៃទី៤ ខែកញ្ញា ឆ្នាំ២០២៣ , ដោយយុវជនឈ្មោះ ហឿន សុខរតណី បានបញ្ជាក់ប្រាប់អង្គភាពមជ្ឈមណ្ឌលព័ត៌មាន”នគរវត្ត’ យ៉ាងដូច្នេះថា : «រឿងខ្ញុំជាមួយអ្នកគ្រូពេទ្យនោះបានបញ្ចប់ហើយ គាត់អត់ទារសំណងពីខ្ញុំ ខ្ញុំក៏អត់ទារសំណង់ពីគាត់ សម្រេចថាមិនសងគ្នារៀងខ្លួន»។
ក្រុមអ្នកច្បាប់បានលើកឡើងថា, សំណុំរឿងមួយនេះ មិនមែនត្រូវបានបញ្ចប់ក្នុងដំណាក់កាលមន្ត្រីនគរបាលយុត្តិធម៌ឡើយ ទោះជាភាគីទាំងសងខាង ឯកភាពគ្នាទទួលសំណងឬមិនទទួល ក៏ស្ត្រីខាងលើនៅជាប់បណ្ដឹងអាជ្ញា ។ ដូច្នេះមន្ត្រីនគរបាលយុត្តិធម៌ ត្រូវតែកសាងសំណុំរឿងបញ្ជូនទៅអយ្យការ ទោះផុតកំណត់រយៈពេល៧ថ្ងៃ នៃបទល្មើសជាក់ស្ដែងក៏ដោយ គឹស្ត្រីម្ចាស់មន្ទីរពហុព្យាបាលនិងសម្ភពឥន្ទ្រទេវីទី១ គាត់មានតម្រុយពិរទ្ធភាព តាមរយៈការប្រព្រឹត្តទះកំផ្លៀងប្រាំដៃទៅលើជនរងគ្រោះ បំបាត់វត្ថុតាងពីកន្លែងកើតហេតុ ឱ្យសន្តិសុខរបស់ខ្លួនយកវត្ថុតាងម៉ូតូទៅចាក់សោទុក មានន័យថា គាត់មានបទល្មើសព្រហ្មទណ្ឌ ។ ក្នុងនោះ ខ្លួនដើរតួជាមន្ត្រីនគរបាលចរាចរណ៍ផង ជាមន្ត្រីនគរបាលយុត្តិធម៌ផង ជាតំណាងអយ្យការផង នឺងជាជនដែលបានប្រព្រឹត្តបទល្មើសព្រហ្មទណ្ឌ ដោយគ្មានការរាងចាល ។ ដូច្នេះ បើអធិការនគរបាលខណ្ឌឬស្សីកែវ អ្វីដែលគាត់អះអាងថា, ការសម្របសម្រួលគ្នានោះ ទោះជាឯកភាពគ្នាក៏ដោយ សំណុំរឿងត្រូវតែបញ្ជូនទៅអយ្យការ។ ចាំមើលស្ត្រីខាងលើ គាត់មានវាសនាបែបណា សម្រាប់តាមផ្លូវតុលាការ ខណៈដែលប្រទេសជាតិគ្រប់គ្រងដោយច្បាប់ ៕
ដោយ ៖ រ៉ារ៉ា
