សារព័ត៌មាន នគរវត្ត តែងតែនាំមុខគេជានិច្ច
គ្រាប់បាល់បញ្ចូលទីក្នុងតង់ទី២របស់តារាឆ្នើម Lionel Messi បានជួយឲ្យអាហ្សង់ទីនឈ្នះអេក្វាឌ័រក្នុងផ្ទះ ១-០ កាលពីព្រឹកថ្ងៃព្រហស្បតិ៍ នេះដើម្បីធ្វើយុទ្ធនាការជម្រុះ World Cup ឆ្នាំ២០២៦របស់ពួកគេដំបូងទទួលបាន៣ពិន្ទុ។
ម្ចាស់ជើងឯកពិភពលោកអាហ្សង់ទីនមានប្រៀបក្នុងការគ្រប់គ្រងបាល់បានច្រើនជាងក្រុមភ្ញៀវ ប៉ុន្តែមានការខកចិត្តក្នុងការប្រយុទ្ធ ដោយសារពួកគេព្យាយាមរកគ្រាប់បាល់បញ្ចូលទី។ ទោះយ៉ាងណាក៏ដោយប្រធានក្រុម Messi បានបន្តទម្រង់លេងដ៏ល្អដែលគាត់កំពុងបង្ហាញជាមួយក្លិប Inter Miami ដោយស៊ុតបាល់ហ្វ្រីឃីកនៅនាទីទី៧៧។
ក្នុងវគ្គជម្រុះផ្សេងទៀត ប៉ារ៉ាហ្គាយបានស្មើ ០-០ ជាមួយប៉េរូ ខណៈដែលកូឡុំប៊ីបានឈ្នះ ១-០ ក្នុងផ្ទះលើវេណេហ្ស៊ុយអេឡា។ ការប្រកួតជម្រុះជុំទីមួយនៃ CONMEBOL បន្តនៅថ្ងៃសុក្រនៅពេលដែលអ៊ុយរ៉ាហ្គាយធ្វើជាម្ចាស់ផ្ទះទទួលក្រុមឈីលី មុនពេលប្រេស៊ីលទទួលបូលីវី។
គួរបញ្ជាក់ថា ការប្រកួតវគ្គជម្រុះ World Cup 2026 មាន១០ប្រទេសដែលត្រូវប្រកួតនៅតំបន់អាមេរិកខាងត្បូង ឬហៅថា CONMEBOL។ ការប្រកួតនេះត្រូវជ្រើសរើស៦ក្រុមដែលមានពិន្ទុខ្ពស់ជាងគេតាមលំដាប់មានសិទ្ធិទៅប្រកួតបន្ត ខណៈដែលក្រុមដែលឈរនៅលេខ៧ត្រូវប្រកួត Play-off ៕
ដោយ៖ ភារៈ(រូបភាព ៖ Reuters/CNA)
