សារព័ត៌មាន នគរវត្ត តែងតែនាំមុខគេជានិច្ច
ខេត្តសៀមរាប ៖ សម្តេចធិបតី ហ៊ុន ម៉ាណែត ថ្លែងថា ពិភពលោកកាន់តែសុវត្ថិភាព ស្រស់បំព្រង និងកក់ក្តៅជាងមុន ប្រសិនបើស្ត្រីក្លាយជាអ្នកដឹកនាំ កាន់តែច្រើន ជាមួយនឹងការគៀបសង្កត់ពីកត្តាផ្សេងៗ ដូចជា កត្តាប្រពៃណី កត្តាសេដ្ឋកិច្ច និងកង្វះការយល់ដឹង។
សម្តេចធិបតី ហ៊ុន ម៉ាណែត ថ្លែងបែបនេះ នៅព្រឹកថ្ងៃទី០៥ ខែវិច្ឆិកា ឆ្នាំ២០២៣ ក្នុងឱកាសអញ្ជើញជាអធិបតីក្នុងពិធីបើកមហាសន្និបាត មិត្តកាយឫទ្ធិនារីតំបន់អាស៊ីប៉ាស៊ីហ្វិក ក្រោមប្រធានបទ “ស្រមៃមើលឱកាស” ដែលពិធីនេះប្រារព្ធធ្វើឡើងនៅសណ្ឋារគារសុខាខេត្តសៀមរាប។
សម្តេចធិបតី ហ៊ុន ម៉ាណែត ថ្លែងបន្តថា ស្រ្តីរាប់លាននាក់លើពិភពលោក ត្រូវបានរារាំងមិនឱ្យទទួលបានឱកាស ក្នុងការអភិវឌ្ឍខ្លួនឯង និងការចូលរួមនៅក្នុងសង្គម សេដ្ឋកិច្ច ឱ្យបានពេញលេញនូវសក្តានុពលរបស់ខ្លួន។ នេះជាការខាតបង់ដ៏គួរឱ្យសោកស្តាយនូវមូលធនមនុស្សដែលជាកម្លាំងចលករដ៏រឹងមាំ ប្រកបដោយចីរភាព សម្រាប់សង្គមជាតិ ប្រសិនពួកគាត់ជាស្ត្រី ទទួលបាននូវឱកាសពេញលេញ។
ទន្ទឹមនោះ សម្តេចធិបតី ថ្លែងបញ្ជាក់ថា ដើម្បីឆ្លើយតបនឹងបញ្ហានេះ រាជរដ្ឋាភិបាលកម្ពុជា បាននិងកំពុងអនុវត្តសមភាពយេនឌ័រ និងបង្កើតភាពអង់អាចដល់ស្ត្រី និងក្មេងស្រីនៅគ្រប់វិស័យ ជាអាទិភាពនៅក្នុងរបៀបវារៈគោលនយោបាយរបស់ខ្លួន តាមរយៈយុទ្ធសាស្ត្របញ្ចកោណដំណាក់កាលទី១ ពង្រឹងភាពជាពលរដ្ឋក្នុងសង្គម ដែលមានអរិយធម៌ខ្ពស់ ប្រកបដោយសីលធម៌ សមធម៌ និងបរិយាប័ន្ន៕
ដោយ ៖ សហការី
