សារព័ត៌មាន នគរវត្ត តែងតែនាំមុខគេជានិច្ច
ក្រុម Everton បានទទួលការកាត់ចេញចំនួន១០ពិន្ទុភ្លាមៗ បន្ទាប់ពីត្រូវបានរកឃើញថា បានបំពានច្បាប់នៃប្រាក់ចំណេញ និងនិរន្តរភាពរបស់ Premier League។ ការដាក់ទណ្ឌកម្មនេះគឺជាទណ្ឌកម្មកីឡាដ៏ធំបំផុតក្នុងប្រវត្តិសាស្ត្រនៃការប្រកួត ហើយទុកឱ្យ Everton ឈរនៅលេខរៀងទី១៩ក្នុងតារាង លើពិន្ទុគិតជាថ្មីចំនួន៤ពិន្ទុ។
ក្លិបបានប្រកាសថា នេះជាការតក់ស្លុត និងខកចិត្តបំផុតចំពោះសេចក្តីសម្រេចមិនសមាមាត្រ និងអយុត្តិធម៌ ខណៈក្លិបមានបំណងប្តឹងឧទ្ធរណ៍ប្រឆាំងនឹងការសម្រេចចិត្តនេះ។ ក្របខ័ណ្ឌ Premier League បានបញ្ជូនសំណុំរឿងEverton ទៅកាន់គណៈកម្មការឯករាជ្យមួយកាលពីខែមីនា ប៉ុន្តែមិនបានបង្ហាញពីភាពជាក់លាក់នៃការបំពានច្បាប់របស់ក្លិបនោះទេ។
Everton បានប្រកាសពីការខាតបង់ផ្នែកហិរញ្ញវត្ថុសម្រាប់រយៈពេល៥ឆ្នាំជាប់ៗគ្នាក្នុងខែមីនា បន្ទាប់ពីបានរាយការណ៍ថា មានឱនភាពចំនួន៤៤.៧លានផោនក្នុងឆ្នាំ២០២១–២០២២។ ក្លិបនៅ Premier League ត្រូវបានអនុញ្ញាតឱ្យបាត់បង់១០៥លានផោនក្នុងរយៈពេល៣ឆ្នាំ ហើយ Everton បានសារភាពថាបានបំពានច្បាប់ប្រាក់ចំណេញ និងនិរន្តរភាព (PSR) សម្រាប់រយៈពេលបញ្ចប់ឆ្នាំ២០២១–២០២២។
បន្ទាប់ពីសវនាការរយៈពេល៥ថ្ងៃនៅក្នុងខែតុលា គណៈកម្មការបានរកឃើញថា មានការពេញចិត្តចំពោះ Premier League ដែលការខាតបង់របស់ Everton ក្នុងអំឡុងពេលនោះមានចំនួន១២៤.៥លានផោន។
នៅក្នុងសេចក្តីថ្លែងការណ៍មួយរបស់ក្លិប Everton បានឲ្យដឹងថា “ក្លិបមិនទទួលស្គាល់ការរកឃើញថា ខ្លួនបរាជ័យក្នុងការអនុវត្តដោយស្មោះត្រង់បំផុតហើយវាមិនយល់ថានេះគឺជាការចោទប្រកាន់ដែលធ្វើឡើងដោយ Premier League ក្នុងអំឡុងពេលដំណើរការនីតិវិធី។ ទាំងភាពតឹងតែង និងភាពធ្ងន់ធ្ងរនៃទណ្ឌកម្មដែលដាក់ដោយគណៈកម្មការនេះ មិនមែនជាយុត្តិធម៌ ឬជាការឆ្លុះបញ្ចាំងសមហេតុផលនៃភស្តុតាងដែលបានដាក់ជូននោះទេ។ ក្លិបក៏នឹងតាមដានដោយចាប់អារម្មណ៍យ៉ាងខ្លាំងចំពោះការសម្រេចចិត្តដែលបានធ្វើឡើងនៅក្នុងករណីផ្សេងទៀតទាក់ទងនឹងប្រាក់ចំណេញ និងនិរន្តរភាពរបស់ Premier League”។
ការកាត់ពិន្ទុកើតឡើងនៅពេលដែលមានភាពមិនប្រាកដប្រជាខ្លាំងនៅក្រុមEverton។ កាលពីខែកញ្ញា ម្ចាស់ក្រុមហ៊ុន Farhad Moshiri បានយល់ព្រមលក់ភាគហ៊ុន៩៤% របស់គាត់នៅក្នុងក្លិបទៅឱ្យមូលនិធិវិនិយោគអាមេរិក 777 Partners។ ការកាន់កាប់នេះកំពុងឆ្លងកាត់ដំណើរការបទប្បញ្ញត្តិ ហើយមុននឹងសេចក្តីសម្រេចនេះ ប្រភពជាច្រើនបាននិយាយថា នឹងត្រូវបញ្ចប់នៅខែក្រោយ ៕
ដោយ៖ ភារៈ(រូបភាព ៖ BBC Sport)
