សារព័ត៌មាន នគរវត្ត តែងតែនាំមុខគេជានិច្ច
ប្រទេសហ្វាំងឡង់បានប្រកាសថាខ្លួននឹងបិទព្រំដែនទាំងមូលរបស់ខ្លួនជាមួយរុស្ស៊ីក្នុងរយៈពេល ២ សប្តាហ៍ដើម្បីការពារជនភៀសខ្លួនមួយចំនួនធំខុសពីធម្មតាចូលមកប្រទេសហ្វាំងឡង់។យោងតាមទីភ្នាក់ងារសារព័ត៌មាន Reuters កាលពីសប្តាហ៍មុន ប្រទេសហ្វាំងឡង់បានបិទច្រកព្រំដែនស្ទើរតែទាំងអស់ជាមួយប្រទេសរុស្ស៊ី ដោយបន្សល់ទុកតែច្រកព្រំដែន Raja-Jooseppi នៅតំបន់អាក់ទិកដែលបើកចំហ។ ទោះជាយ៉ាងណាក៏ដោយ នៅថ្ងៃទី ២៨ខែវិច្ឆិកា រដ្ឋាភិបាលហ្វាំងឡង់បានប្រកាសថា ច្រកទ្វារព្រំដែនចុងក្រោយនឹងឈប់ដំណើរការចាប់ពីថ្ងៃទី ២៩ ខែវិច្ឆិកាដល់ថ្ងៃទី ១៣ ខែធ្នូ។
ឆ្មាំព្រំដែនហ្វាំងឡង់បាននិយាយថាអ្នកស្វែងរកសិទ្ធិជ្រកកោនប្រហែល ៩០០ នាក់មកពីប្រទេសកេនយ៉ា ម៉ារ៉ុក ប៉ាគីស្ថាន សូម៉ាលី ស៊ីរី និងយេម៉ែនបានចូលប្រទេសហ្វាំងឡង់ពីប្រទេសរុស្ស៊ីក្នុងខែវិច្ឆិកាដែលជាការកើនឡើងយ៉ាងខ្លាំង។
ការសម្រេចចិត្តរបស់ហ្វាំងឡង់ក្នុងការបិទច្រកព្រំដែនទាំង៨ចំពោះមនុស្សដែលចូលពីប្រទេសរុស្ស៊ីនឹងមានន័យថាមានតែទំនិញប៉ុណ្ណោះដែលត្រូវបានអនុញ្ញាតឱ្យឆ្លងកាត់រវាងប្រទេសទាំងពីរ។
ទីក្រុង Helsinki បានចោទប្រកាន់ទីក្រុងមូស្គូថាបានរុញប្រជាជនទៅព្រំដែន ជាការសងសឹកចំពោះហ្វាំងឡង់បង្កើនកិច្ចសហប្រតិបត្តិការការពារជាតិជាមួយសហរដ្ឋអាមេរិក។ យ៉ាងណាក៏ដោយ វិមានក្រឹមឡាំងបានបដិសេធការចោទប្រកាន់នេះ៕ ដោយ៖ ធីរីណា
រូបថត៖ Reuters
