🔴ចុងឆ្នាំ២០២៣ល្បីទៀតករណីគ្រូជោគជ័យជំពាក់លុយគេ ! ខណៈសហដើមចោទ លោក លន់ អុន និងលោកស្រី ទេស សុផា ទាមទារ អោយឈ្មោះ អ៊ុង លីហេង និងប្រពន្ធឈ្មោះ តាំង ហ្គេចលៀង សងប្រាក់ដើមសរុបចំនួន US$ ៧២០,០០០ (ចិតសិបពីរម៉ឺន) ដុល្លារអាមេរិក

ភ្នំពេញ ៖ អ្នកណាមិនល្បី ករណីស្ត្រីឈ្មោះ តាំង ហ្គេចលៀង ធ្លាប់បានប្រើភាសាអសីលធម៌មកលើអ្នកក្រ តាំងខ្លួនជាគ្រូជោគជ័យ ជាអ្នកចេះដឹង ទ្រព្យសម្បត្តិហូរហៀរ កន្លងមក ទីបំផុត ! ម៉េចក៏លេចចេញ ថា, លោកស្រី តាំង ហ្គេចលៀង និងស្វាមី ជំពាក់លុយគេដល់ទៅ US$ ៧២០,០០០ (ចិតសិបពីរម៉ឺន) ដុល្លារអាមេរិក ទៅវិញ ? ។

បើយោងតាមពាក្យបណ្តឹង របស់សហដើមចោទ សូមគោរពជូន លោកប្រធានសាលាដំបូងរាជធានីភ្នំពេញ ដែលមានឈ្មោះដូចខាងក្រោមបានបញ្ជាក់ថា:

១/ ឈ្មោះ លន់ អុន ភេទប្រុស កើតឆ្នាំ១៩៥៨ ជនជាតិខ្មែរ កាន់អត្តសញ្ញាណប័ណ្ណសញ្ជាតិខ្មែរលេខ 010203870 (01) ចុះថ្ងៃទី១៦ ខែសីហា ឆ្នាំ២០១៦ មានទីលំនៅបច្ចុប្បន្នស្ថិតនៅផ្ទះលេខ៣០អឺ០ ផ្លូវ៥១ ភូមិ២ សង្កាត់ផ្សារថ្មីទី ៣ ខណ្ឌដូនពេញ រាជធានីភ្នំពេញ។

២/ ឈ្មោះ ទេស សុផា ភេទស្រី កើតឆ្នាំ១៩៦១ មានទីលំនៅបច្ចុប្បន្នស្ថិតនៅភូមិផ្ទះលេខ១២E០ ផ្លូវ លេខ១០៧ សង្កាត់មនោរម្យ ខណ្ឌ៧មករា រាជធានីភ្នំពេញ។

សហចុងចម្លើយ៖ ឈ្មោះ អ៊ុង លីហេង ភេទប្រុស កើតឆ្នាំ១៩៧០ សញ្ជាតិខ្មែរ និងប្រពន្ធ ឈ្មោះ តាំង ហ្គេចលៀង ភេទស្រី កើតឆ្នាំ១៩៨៣ ជនជាតិខ្មែរ សញ្ជាតិខ្មែរ មានទីលំនៅបច្ចុប្បន្ន ស្ថិតនៅផ្ទះលេខ៨ ផ្លូវលេខ៤ ភូមិបឹងឈូក សង្កាត់និរោធ ខណ្ឌច្បារអំពៅ រាជធានីភ្នំពេញ ។

សូមគោរពជូន លោកប្រធានសាលាដំបូងរាជធានីភ្នំពេញ ក្នុងមាន ៖
ក. ខ្លឹមសារនៃសាលក្រមដែលសហដើមចោទទាមទារឲ្យតុលាការចេញ ,
១/ បង្គាប់ឲ្យសហចុងចម្លើយ សងប្រាក់ដើមសរុបចំនួន US$ ៧២០,០០០ (ចិតសិបពីរម៉ឺន) ដុល្លារអាមេរិក មកឲ្យសហដើមចោទឈ្មោះ លន់ អុន និងឈ្មោះ ទេស សុផា។

២/ បង្គាប់ឲ្យសហចុងចម្លើយ បង់អាត្រាការប្រាក់ចំនួន ៥% (ប្រាំ) ភាគរយ ក្នុងមួយឆ្នាំគិតចាប់ពី ឆ្នាំ២០០៩ រហូតមកដល់បច្ចុប្បន្ន មកឲ្យសហដើមចោទឈ្មោះ លន់ អុន និងឈ្មោះ ទេស សុផា។

៣/ បង្គាប់ឲ្យសហចុងចម្លើយ សងសំណងជម្ងឺចិត្ត សំណងនៃការខូចខាត និងបង់កម្រៃសេវាមេធាវី ចំនួន ២០០,០០០,០០០ (ពីររយ) លានរៀល មកឲ្យសហដើមចោទឈ្មោះ លន់ អុន និង ឈ្មោះ ទេស សុផា។

៤/ ប្រាក់ប្រដាប់ក្ដីជាបន្ទុករបស់សហចុងចម្លើយ។

៥/ សុំឲ្យតុលាការចេញសាលក្រម និងប្រកាសអនុវត្តជាបណ្តោះអាសន្ន ត្រង់ចំណុចទី១ និងទី២ និងទី៣។

ខ. អង្គហេតុ និងមូលហេតុនៃការទាមទារ៖

សហដើមចោទបានបន្តថា, យើងខ្ញុំ មានកិត្តិយសសូមគោរពជម្រាបជូន លោកប្រធាន មេត្តាជ្រាបថា៖ កាលពីអំឡុងឆ្នាំ២០០៨ យើងខ្ញុំ និងសហចុងចម្លើយឈ្មោះ អ៊ុង លីហេង និងឈ្មោះ តាំង ហ្គេចលៀង ជាសហភាគហ៊ុនរកស៊ីជាមួយគ្នា រួមទាំងមានសមាជិកភាគហ៊ុនសរុបចំនួន ០៦នាក់ផ្សេងទៀត គឺជាម្ចាស់ភាគហ៊ុនលើអលចលនវត្ថុដីទំនេរ ១៦ ឡូត៍ ឬស្មើនឹងទំហំសរុប ចំនួន ២០២.៥៩៩ (ពីរសែនពីរពាន់ប្រាំរយកៅសិបប្រាំបួន) ម៉ែត្រការ៉េ មានទីតាំងស្ថិតនៅ ភូមិបាវិតកណ្តាល ឃុំបាវិត ស្រុកចន្ទ្រា ខេត្តស្វាយរៀង។

ក្រោយមក សហភាគហ៊ុនទាំងអស់បានព្រមព្រៀងគ្នាយកអចលនវត្ថុខាងលើ ទៅចុះបន្ទុកដាក់បញ្ចាំ ជាមួយ ធនាគារកម្ពុជាសាធារណៈ ដើម្បីធានាសិទ្ធិលើបំណុលដើម្បីទទួលបានប្រាក់កម្ចីសរុបចំនួន US$ ៥.០០០.០០០ (ប្រាំលាន) ដុល្លារអាមេរិក ដោយអំឡុងពេលនោះមានសហភាគហ៊ុន ០៣នាក់ ជាអ្នកឈរឈ្មោះក្នុងការ ស្នើប្រាក់កម្ចី ដោយយើងខ្ញុំព្រមទាំងសហភាគហ៊ុនម្នាក់ទៀត ជាអ្នកធានាសិទ្ធិលើបំណុលខាងលើនៅ ធនាគារកម្ពុជាសាធារណៈ។

ការខ្ចីប្រាក់នេះសមាជិកនៃភាគហ៊ុនទាំងមូលត្រូវបានកំណត់បែងចែកជាភាគបំណុលនៃសមាជិកក្រុមហ៊ុននីមួយៗ ទៅតាមភាគហ៊ុនរៀងៗខ្លួន។ ចំណែកភាគហ៊ុនរបស់យើងខ្ញុំ គឺមានចំនួន ២០% (ម្ភៃ) ភាគរយ នៃ ភាគហ៊ុនសរុប និងត្រូវទទួលបន្ទុកបំណុលចំនួន US$ ១.០០០.០០០ (មួយលាន) ដុល្លារអាមេរិក ដោយក្នុងនោះ សហចុងចម្លើយ មានភាគហ៊ុនចំនួន ២៥% (ម្ភៃប្រាំភាគរយ) នៃភាគហ៊ុនសរុបទាំងមូល ហើយសហចុងចម្លើយ មានកាតព្វកិច្ចទទួលបន្ទុកបំណុល ចំនួន US$ ១.២៥០.០០០ (មួយលានម្ភៃប្រាំម៉ឺន) ដុល្លារអាមេរិក។

លុះក្រោយមក សហចុងចម្លើយ បានស្នើសុំទិញផ្តាច់នូវចំណែកភាគហ៊ុនរបស់យើងខ្ញុំចំនួន ២០% (ម្ភៃ) ភាគរយ ដែលមាននៅក្នុងក្រុមហ៊ុន ព្រមទាំងយល់ព្រមដោយស្ម័គ្រចិត្តទិញនូវចំណែកសិទ្ធិលើបំណុលរបស់ យើងខ្ញុំផងដែរ តាមរយៈកិច្ចសន្យាស្តីពីការកែប្រែភាគហ៊ុន ចុះថ្ងៃទី២៦ ខែមីនា ឆ្នាំ២០០៩។ ទន្ទឹមនេះយើងខ្ញុំ បាន ស្នើសុំទៅកាន់ ធនាគារកម្ពុជាសារធារណៈ ដើម្បីស្នើសុំកែប្រែឈ្មោះអ្នកធានាបំណុលខាងលើ ឲ្យស្របតាមកិច្ច សន្យាស្តីពីការកែប្រែភាគហ៊ុន ចុះថ្ងៃទី២៦ ខែមីនា ឆ្នាំ២០០៩ វិញ ប៉ុន្តែជាលទ្ធផល ធនាគារកម្ពុជាសាធារណៈ បានបដិសេធសំណើររបស់យើងខ្ញុំ។ ទើបពេលនោះ យើងខ្ញុំ និងសហចុងចម្លើយ ព្រមព្រៀងគ្នាអនុវត្តតាមកិច្ចសន្យា ស្តីពីការកែប្រែភាគហ៊ុន ដោយ សហចុងចម្លើយ មានកាតព្វកិច្ចបង់ប្រាក់ឲ្យធានាគារ នៃចំណែកបំណុលរបស់ខ្លួន ចំនួន ២៥ % (ម្ភៃប្រាំ) ភាគរយ និងចំណែកបំណុលចំនួន ២០% (ម្ភៃ) ភាគរយ ដែលសហចុងចម្លើយបានទិញពី យើងខ្ញុំ គឺសរុបទាំងអស់ចំនួន ៤៥% (សែសិបប្រាំ) ភាគរយ នៃចំនួនភាគហ៊ុនសរុបទាំងមូល។

លុះនៅអំឡុងឆ្នាំ២០០៩ សមាជិកនៃភាគហ៊ុនទាំងអស់ជួបនូវវិបត្តិសេដ្ឋកិច្ច បណ្តាលឲ្យអត់លទ្ធភាព បង់ប្រាក់កម្ចីទៅធនាគារ អំឡុងពេលនោះធានាគារក៏បានដាក់ពាក្យបណ្ដឹងទៅកាន់តុលាការ ដើម្បីរឹបអូសអចលនវត្ថុ ដែលបានដាក់បញ្ចាំជាមួយធានាគារ ដាក់លក់ឡាយឡុងទូរទាត់បំណុលខាងលើ។ ជាក់ស្តែង អចលនវត្ថុដែល តុលាការសម្រេចលក់ឡាយឡុងទាំងអស់ ទូរទាត់មិនគ្រប់ចំនួនបំណុលដែលជំពាក់នោះទេ។

ក្រោយមកនៅអំឡុងឆ្នាំ២០១៨ ចំពោះបំណុលដែលនៅសេសសល់ សមាជិកភាគហ៊ុនដ៏ទៃផ្សេងទៀត បានបង់ប្រាក់ផ្តាច់ឲ្យ ធនាគារកម្ពុជាសារធារណៈ ទៅតាមចំណែករៀងៗខ្លួនរួចរាល់ លើកលែងតែសហចុងចម្លើយ ដែលគេចវេសមិនព្រមអនុវត្តកាតព្វកិច្ចសងបំណុលផ្តាច់ឲ្យធនាគារ។

ដោយមូលហេតុថា បំណុលដែលសហចុងចម្លើយ បានគេចវេសមិនព្រមបង់ផ្តាច់ឲ្យ ធនាគារកម្ពុជា សារធារណៈ គឺជាឈ្មោះរបស់យើងខ្ញុំ ទើបអំឡុងពេលនោះយើងខ្ញុំបានសម្រេចលក់ទ្រព្យសម្បត្តិផ្ទាល់ខ្លួន ដើម្បី យកប្រាក់សរុបចំនួន US$ ៧២០,០០០ (ចិតសិបពីរម៉ឺន) ដុល្លារអាមេរិក ទៅសង ធនាគារកម្ពុជាសាធារណៈ ជំនួសឲ្យសហចុងចម្លើយ។

សហដើមចោទបានបន្តថាលើពាក្យបណ្តឹងថា៖ លោកប្រធាន ជាទីគោរព! គិតចាប់ពីកាលបរិច្ឆេទដែលយើងខ្ញុំបានយកប្រាក់ខាងលើទៅសង ធនាគារសាធារណៈ ជំនួសឲ្យសហចុងចម្លើយឈ្មោះ អ៊ុង លីហេង និងឈ្មោះ តាំង ហ្គេចលៀង រហូតមកដល់ បច្ចុប្បន្ននេះ សហចុងចម្លើយ នៅមិនទាន់សងប្រាក់ខាងលើមកឲ្យ យើងខ្ញុំនៅឡើយទេ។ កន្លងមកយើងខ្ញុំ បានព្យាយាមដាស់តឿនតាមគ្រប់មធ្យោបាយទៅកាន់សហចុងចម្លើយ តាមរយៈទំនាក់ទំនងដោយផ្ទាល់ផង និងតាមរយៈលិខិត ជូនដំណឹងផង ដើម្បីទាមទារឲ្យសហចុងចម្លើយ សងប្រាក់សរុបចំនួន US$ ៧២០,០០០ (ចិតសិបពីរម៉ឺន) ដុល្លារអាមេរិក មកឲ្យយើងខ្ញុំវិញ ប៉ុន្តែសហចុងចម្លើយ មិនព្រមអនុវត្តកាតព្វកិច្ចដើម្បីសងប្រាក់មកឲ្យយើងខ្ញុំវិញ ។
សូមរម្លឹកថា៖ ម្នាក់ៗ មានឈ្មោះបោះសំឡេង ល្បីណាស់ខាងគ្រូជោគជ័យ ជាសេដ្ឋី រកចំណូលបានខ្ពស់ សំដីយកមេឃ ទ្រាបគូទអង្គុយ ចុងក្រោយ ក្លាយទៅជាមានរឿងបែបនេះ សឹងតែមិនជឿ ព្រោះ លោកស្រី តាំង ហ្គេចលៀង អំនួតកប់ពពក ធ្លាប់ដៀលដល់អ្នកក្រ ចុងក្រោយចឹងទេអី …?
ពាក់ព័ន្ធករណីនេះ អង្គភាព មជ្ឈមណ្ឌលព័ត៌មាន«នគរវត្ត» មិនអាចធ្វើការទំនាក់ទំនងសុំការបំភ្លឺបានទេពី ឈ្មោះ អ៊ុង លីហេង និងប្រពន្ធឈ្មោះ តាំង ហ្គេចលៀង ជំពាក់លុយសហដើមចោទ ដល់ ចំនួន US$ ៧២០,០០០ (ចិតសិបពីរម៉ឺន) ដុល្លារអាមេរិក ដោយគ្មានលេខទូរស័ព្ទ ។ ប៉ុន្តែនៅផេក ឈ្មោះ (Tang Gechleing ) ដែលគេសង្ស័យថា៖ ផេក លោកស្រី តាំង ហ្គេចលៀង បានបង្ហោះសារមុននេះ៣ម៉ោងថា៖ Tik Tok ផេកមួយថ្មីនេះ ហេតុតែចង់បានlike យករូបខ្ញុំមក ប្រឌិតរឿងមិនពិត អ្នកធ្វេីចឹងដឹងថាវាមានទោសហេីយបាបណាស់ ម្ចាស់ផេក ?
រឿងមួយនេះមិនពិតទេ នាងខ្ញុំសូមច្រានចោលទាំងស្រុង សូមអ្នកទស្សនា កុំជឿអោយសោះ ដោយសារតែចង់បានlike ហ៊ានប្រឌិតរឿង ធ្វេីបាបអ្នកដ៏ទៃ , ខ្ញុំមិនដឹងអីសូម្បីតែបន្តិច ។
បងប្អូនអ្នកលេងបណ្តាញសង្គមអេីយ ករណីនេះ គឺជាឧទាហរណ៍យ៉ាងច្បាស់ រឿងជាច្រេីន គឺមិនពិតទេ សូមមេីលដោយវិចារណញ្ញាណផង
រឿងណាគួរជឿ រឿងខ្លះកុំសូម្បីតែមេីល ។
គ្រាន់តែយករូបថតបីបួនសន្លឹក កាត់តចំរៀង គ្មានភស្តុតាង គ្មានឯកសារ គ្មានការពិត តេីជឿបានដោយសារអ្វីទៅ អ្នកទស្សនា ?
ម្ចាស់ផេកចាំទទួលខុសត្រូវផ្លូវច្បាប់ផង ។
ជុំវិញបញ្ហានេះ ! អង្គភាព មជ្ឈមណ្ឌលព័ត៌មាន«នគរវត្ត» នឹងរង់ចាំការបកស្រាយណាមួយ ចំពោះភាគីពាក់ព័ន្ធទាំងអស់ រៀងរាល់ម៉ោងរដ្ឋបាល ប្រសិនបើមានហេតុផលណាមួយ ៕

ដោយ ៖ មជ្ឈមណ្ឌលព័ត៌មាន«នគរវត្ត»