សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់ស្រវឹងស្រាឡេីងជោកបេីករថយន្តយ៉ាងលឿនជ្រុលទៅបុកម៉ូតូស្កុបពីមួយគ្រឿងពីក្រោយនិងរថយន្តទំនេីបមួយគ្រឿងទៀតបណ្ដាលឱ្យរងការខូចខាតទាំងសងខាងយ៉ាងដំណំ ព្រមទាំងបង្កឱ្យបុរសពីរនាក់រងរបួសធ្ងន់និងស្រាល កាលពីវេលាម៉ោង១១ និង៤០នាទីយប់ ថ្ងៃទី៥ ខែមករា ឆ្នាំ២០២៣ នៅចំណុចគល់ស្ពានភ្លោះកោះនរា ក្នុងសង្កាត់និរោធ ខណ្ឌច្បារអំពៅ រាជធានីភ្នំពេញ ។
តាមប្រភពព័ត៌មានពីកន្លែងកេីតហេតុឱ្យដឹងថា មុនកេីតហេតុ មានរថយន្តស៊េរីទំនេីបម៉ាក BYD ATTO 3 ពណ៌ប្រផេះ ពាក់ផ្លាកលេខ ភ្នំពេញ 2BR-9148 ធ្វេីដំណេីរចេញពីកោះនរា រួចឆ្លងស្ពានបំណងមកផ្លូវជាតិលេខ១ ក្នុងនោះក៏មានម៉ូតូម៉ាក ហុងដាស្កុបពីមួយគ្រឿង ពណ៌ស ពាក់ផ្លាកលេខ ស្វាយរៀង 1P-9377 បានធ្វេីដំណេីរពីក្រោយរថយន្តទំនេីបម៉ាកBYD ATTO 3 ស្រាប់តែត្រូវរថយន្តបង្កម៉ាក Toyota corolla ពណ៌ប្រផេះ ពាក់ផ្លាកលេខ ភ្នំពេញ 2AC-5034 បេីកបរដោយបុរសម្នាក់ស្ថិតក្នុងស្ថានភាពស្រវឹងស្រាឡេីងជោកជាំបេីកមកបុកម៉ូតូពីក្រោយពេញទំហឹង ផ្លោងទៅបុករថយន្តទំនេីបម៉ាក BYD ATTO 3 ពីក្រោយដូចគ្នារងការខូចខាតទាំងរថយន្តបង្កនិងរថយន្ត ,ម៉ូតូដែលរងគ្រោះយ៉ាងដំណំ ។ ក្នុងករណីនេះក៏បណ្ដាលឱ្យបុរសម្នាក់រងរបួសធ្ងន់ និងគ្នីគ្នាម្នាក់ទៀតរងរបួសស្រាល ត្រូវបានរថយន្តសាមុយដឹកបញ្ចូនទៅកាន់មន្ទីរពេទ្យដេីម្បីសង្គ្រោះទាំងពីរនាក់ ។
ក្រោយកេីតហេតុ សមត្ថកិច្ចមូលដ្ឋានបានចុះមកដល់កន្លែងកេីតហេតុ ព្រមទាំងសហការជាមួយមន្ត្រីជំនាញចរាចរណ៍ធ្វេីការវាស់វែងយករថយន្តបង្កព្រមទាំងរថយន្តនិងម៉ូតូរងគ្រោះទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញដេីម្បីរង់ចាំដោះស្រាយគ្នាតាមនីតិវិធីនាពេលក្រោយ ៕
ដោយ ៖ ភារ៉ា ដង្កោ
