សារព័ត៌មាន នគរវត្ត តែងតែនាំមុខគេជានិច្ច
កីឡាករ Sebastien Haller គឺជាវីរបុរសសម្រាប់ប្រទេសកូតឌីវ័រម្តងទៀត ខណៈដែលម្ចាស់ផ្ទះមួយនេះបានតាមពីក្រោយដើម្បីផ្តួលនីហ្សេរីយ៉ា និងឈ្នះការប្រកួតវគ្គផ្តាច់ព្រ័ត្រ Africa Cup of Nations ឆ្នាំ២០២៣ នៅលើទឹកដីខ្លួនឯង។
ខ្សែប្រយុទ្ធដែលបានស៊ុតបាល់បញ្ចូលទីអ្នកឈ្នះវគ្គពាក់កណ្តាលផ្តាច់ព្រ័ត្រត្រឹមតែ១៣ខែប៉ុណ្ណោះពីការវិលត្រឡប់ពីជំងឺមហារីកពងស្វាសនោះ បានទាត់ចូលការបញ្ជូនរបស់ Simon Adingra ដោយនៅសល់រយៈពេល៩នាទីទៀតចប់ការប្រកួតដើម្បីបញ្ចប់ការនាំមុខនៅតង់ទី២ និងធ្វើឱ្យមានការអបអរយ៉ាងខ្លាំងនៅក្នុងកីឡដ្ឋានប្រទេសរបស់ខ្លួន។
កីឡាករ William Troost-Ekong បានជួយឲ្យនីហ្សេរីយ៉ានាំមុខមុន៧នាទីមុនចប់តង់ទីមួយ នៅពេលដែលខ្សែការពារកណ្តាលរូបនេះបានស៊ុតបាល់បញ្ចូលទីពីការបញ្ជូនបាល់ពីជ្រុងពីចម្ងាយ។ Franck Kessie បានហក់តែតបញ្ចូលទីឲ្យក្រុមម្ចាស់ផ្ទះកូតឌីវ័រតាមស្មើនៅតង់ទី២នាទីទី៦២ ពីការបញ្ជូនបាល់របស់កីឡាករ Adingra។បន្ទាប់ពីការប្រកួតយ៉ាងស្វិតស្វាញឡើងទៅកាន់វគ្គផ្តាច់ព្រ័ត្រ ដែលរាប់បញ្ចូលទាំងការចាកចេញរបស់គ្រូបង្វឹកលោក Jean-Louis Gasset បន្ទាប់ពីការបរាជ័យពីរលើកក្នុងវគ្គចែកពូល ក្រុមកូតឌីវ័របានលើកពានទ្វីបទី៣ជាមួយនឹងជ័យជម្នះដែលសមនឹងទទួលបាន។
កូតឌីវ័របានបន្ថែមការឈ្នះពាន Nations Cup ពីមុនរបស់ពួកគេក្នុងឆ្នាំ១៩៩២ និងឆ្នាំ២០១៥ ហើយក្លាយជាម្ចាស់ផ្ទះការប្រកួតដំបូងគេដែលឈ្នះចាប់តាំងពីអេហ្ស៊ីបលើកពានកាលពីឆ្នាំ២០០៦។
គ្រូបង្វឹកបណ្ដោះអាសន្នលោក Emerse Fae បានដឹកនាំកូតឌីវ័រតាមរយៈវគ្គជម្រុះដែលរួមបញ្ចូលការទទួលជ័យជម្នះយ៉ាងខ្លាំងលើក្រុមការពារតំណែងជើងឯកសេណេហ្គាល់ និងម៉ាលី បន្ទាប់ពីស្មើគ្នានៅចុងការប្រកួតទាំងពីរ។
កូតឌីវ័របានចំណាយប្រាក់ជាង១ពាន់លានដុល្លារ សម្រាប់ការធ្វើជាម្ចាស់ផ្ទះការប្រកួត ដោយបានវិនិយោគចំនួនទឹកប្រាក់ស្រដៀងគ្នាលើការកែលម្អហេដ្ឋារចនាសម្ព័ន្ធនៅក្នុងប្រទេស ហើយប្រធានាធិបតីកូតឌីវ័រ Alassane Outtara បានចូលរួមក្នុងការប្រារព្ធពិធីក្រោយការប្រកួតនៅក្នុងកីឡដ្ឋានដែលមានឈ្មោះរបស់គាត់។
ម្ចាស់ជើងឯកកូតឌីវ័រដែលគ្រងជើងឯកទទួលបានប្រាក់រង្វាន់៧លានដុល្លារ ខណៈដែលនីហ្សេរីយ៉ាទទួលបាន៤លានដុល្លារដោយសហព័ន្ធបាល់ទាត់អាហ្រ្វិក។
កូតឌីវ័រក្លាយជាប្រទេសម្ចាស់ផ្ទះទាំង១២ដើម្បីឈ្នះពាន Nations Cup ខណៈដែលនីហ្សេរីយ៉ាបានជួបការបរាជ័យជាលើកទី៥ក្នុងការប្រកួតវគ្គជម្រុះ និងលើកទី២របស់ពួកគេនៅទីក្រុង Abidjan បន្ទាប់ពីចាញ់កាមេរូនក្នុងឆ្នាំ១៩៨៤ ៕
ដោយ៖ ភារៈ(រូបភាព ៖ BBC Sport)
