សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានធ្វេីសកម្មភាពលួចម៉ូតូកង់បីឥណ្ឌាមួយគ្រឿងបានសម្រេចកាលពីវេលាម៉ោង ០៤ និង ៣០នាទីរសៀលថ្ងៃទី ១២ ខែ កុម្ភៈ ឆ្នាំ ២០២៤ ស្ថិតនៅភូមិព្រៃទា សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ហេីយព្យាយាមបេីកគេចខ្លួនតែត្រូវបានសមត្ថកិច្ចតាមចាប់យកមកវិញដេីម្បីចាត់ការតាមនីតិវិធី។
ជនសង្ស័យឈ្មោះ ញ៉ែម ផល្លា ភេទប្រុស អាយុ ៣៦ឆ្នាំ ជនជាតិខ្មែរ មុខរបរមិនពិតប្រាកដ ទីលំនៅបច្ចុប្បន្នស្ថិតនៅភូមិ ១០ សង្កាត់បឹងសាឡាង ខណ្ឌទួលគោក រាជធានីភ្នំពេញ។
ចំណែកជនរងគ្រោះឈ្មោះ សយ សង់ភ្លឺ ភេទប្រុស អាយុ១៩ឆ្នាំ ជនជាតិខ្មែរ មុខរបរ រត់ម៉ូតូកង់បីឥណ្ឌា ទីលំនៅបច្ចុប្បន្នស្ថិតនៅភូមិព្រៃទា សង្កាត់ ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឱ្យដឹងថា កាលពីថ្ងៃទី១២ ខែកុម្ភៈ ឆ្នាំ ២០២៤ វេលាម៉ោង ០៤ និង៣០នាទីរសៀល មុនពេលកើតហេតុជនរងគ្រោះបានត្រឡប់ពីដឹកភ្ញៀវបានទុកម៉ូតូកង់បីឥណ្ឌាមួយគ្រឿងពាក់លេខ ភ្នំពេញ 1R-3018 នៅខាងមុខផ្ទះ រួចក៏បានចូលទៅសម្រាកដូចរាល់ដង លុះជនរងគ្រោះក្រោកពីដំណេកមកមើលស្រាប់តែបាត់ម៉ូតូកង់បីតែម្តង។
បន្ទាប់មកជនរងគ្រោះបានទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី៣ដេីម្បីសុំកិច្ចអន្តរាគមន៍។
ក្រោយពីទទួលបានពាក្យបណ្តឹងរបស់ជនរងគ្រោះ និងដោយមានការចង្អុលបង្ហាញពីលោកវរសេនីយ៍ឯក ម៉ន វុធី អធិការនគរបាលខណ្ឌពោធិ៍សែនជ័យ កម្លាំងសមត្ថកិច្ចប៉ុស្តិ៍នគរបាលរដ្ឋបាលចោមចៅទី៣បានសហការជាមួយនឹងសមត្ថកិច្ចនៃអធិការដ្ឋាននគរបាលស្រុកឈូកបានចុះស្រាវជ្រាវឃាត់ខ្លួនជនសង្ស័យខាងលើរួមនឹងវត្ថុតាងនៅចំណុចផ្លូវជាតិលេខ៣ ស្ថិតនៅភូមិ បឹង ឃុំបឹងនិមល ស្រុកឈូក ខេត្តកំពត នៅវេលាម៉ោង៦និង៣០នាទីល្ងាច ថ្ងៃខែដដែល យកមកសួរនាំនៅប៉ុស្តិ៍នគរបាលរដ្ឋបាលចោមចៅទី៣តែម្តង។
វត្ថុតាងចាប់ យក ១. ម៉ូតូកង់បីឥណ្ឌា ចំនួន០១គ្រឿង (ប្រគល់ជូនរងគ្រោះវិញ)។ ២. ម្សៅក្រាមពណ៌សថ្លាចំនួន ០១កញ្ចប់ និងឧបករណ៏ប្រើប្រាស់គ្រឿងញៀនមួយចំនួន ។ ៣ កាំបិតកន្ទុយអន្ទង់ចំនួន ០១ ។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការតាមនីតិវិធី៕
ដោយ៖សុខាសែនជ័យ
