សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ថ្លែងនៅក្នុងពិធីប្រកាសជ័យលាភីអង្គភាពផ្ដល់សេវាសាធារណៈគំរូ ក្នុងវិស័យអប់រំ និងសុខាភិបាលឆ្នាំ ២០២៣ និងប្រកាសដាក់ឲ្យអនុវត្តសម្រាប់ឆ្នាំ ២០២៤ នៅព្រឹកថ្ងៃទី ២២ ខែកុម្ភៈ ឆ្នាំ ២០២៤នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបញ្ជាក់ថា រាជរដ្ឋាភិបាល គ្រប់អាណត្តិទាំងអស់ ផ្តោតទៅលើគោលដៅធំពីរ គឺពង្រីកសមិទ្ធផលវិជ្ជមានបន្ថែមជូនប្រជាពលរដ្ឋ និងកាត់បន្ថយរឿងអវិជ្ជមាន។
សម្ដេចធិបតី ថ្លែងថា ការខិតខំនៅក្នុងការពង្រឹង និងពង្រីកសមិទ្ធផលផ្សេងៗ ជូនប្រជាពលរដ្ឋ ជាពិសេសនៅមូលដ្ឋាន គឺជាគោលដៅធំរបស់រាជរដ្ឋាភិបាល។ សម្ដេចនាយករដ្ឋមន្ត្រី តែងតែលើកឡើងថា អ្វីៗមិនមែនស្ថិតនៅលើក្រដាសនោះទេ តែស្ថិតនៅលើលទ្ធផលជាក់ស្ដែងនៅលើដី ហើយលទ្ធផលនេះគឺផ្អែកលើមូលដ្ឋានគ្រឹះនៅតាមភូមិ-ឃុំ និងស្រុក។
សម្ដេចធិបតី ថ្លែងបន្តថា «រាជរដ្ឋាភិបាល គ្រប់អាណត្តិទាំងអស់ ហើយគ្រប់កន្លែងទាំងអស់ គ្រប់ពេលទាំងអស់ ផ្តោតទៅលើគោលដៅធំពីរ ទីមួយពង្រីកសមិទ្ធផលវិជ្ជមានបន្ថែមជូនប្រជាពលរដ្ឋ ទីពីរខិតខំវាយតម្លៃ កែលម្អកាត់បន្ថយរឿងអវិជ្ជមាន តែពីរហ្នឹង ធ្វើតែពីរហ្នឹងបាន គឺបូកចូលគ្នា គឺផលវិជ្ជមានច្រើន»។
សម្ដេចធិបតី លើកឡើងថា ប្រសិនបើគ្រាន់តែធ្វើដើម្បីពង្រីកសមិទ្ធផលវិជ្ជមាន ហើយមិនកាត់បន្ថយនូវអ្វីដែលជាបញ្ហាទេនោះ គឺជារឿងលំបាក ដោយសម្ដេច ថា ដូចវែកចកអញ្ចឹង។
សម្ដេចធិបតី ហ៊ុន ម៉ាណែត បានលើកឡើងបន្ថែមថា៖«អាហ្នឹងពេលខ្លះដូចវែកចក ជួនកាលវាទាញអាផលដែលវិជ្ជមាន មិនឲ្យទៅល្បឿនលឿន ហើយបើយើងផ្ដោតតែទៅលើការដោះស្រាយបញ្ហាអវិជ្ជមាន ផ្តោតតែទៅលើការដោះស្រាយបញ្ហា ភ្លេចពង្រីកនូអ្វីដែលវិជ្ជមាន តម្រូវការប្រជាពលរដ្ឋរីកជាប្រចាំ អញ្ចឹងត្រូវឆ្លើយតបទាំងពីរ»៕
ដោយ៖ តារា
