សមត្ថកិច្ចនគរបាលព្រហ្មទណ្ឌកម្រិតស្រាលឃាត់ខ្លួនជនសង្ស័យម្នាក់ធ្វើសកម្មភាពឆក់ទូរស័ព្ទដៃពីនារីរងគ្រោះម្នាក់ឯង មិនបានសម្រេច

ភ្នំពេញ៖ យោងតាមរបាយការណ៍របស់ការិយាល័យព្រហ្មទណ្ឌកម្រិតស្រាល នៃនាយកដ្ឋាននគរបាលព្រហ្មទណ្ឌ បានឲ្យដឹងនាព្រឹកថ្ងៃទី២៤ ខែកុម្ភៈ ឆ្នាំ២០២៤ នេះថា ដោយអនុវត្តតាមបទបញ្ជារបស់ឯកឧត្តម ឧត្តមសេនីយ៍ឯក ង៉េង ជួ ប្រធាននាយកដ្ឋាននគរបាលព្រហ្មទណ្ឌ និងលោកឧត្តមសេនីយ៍ត្រី វុទ្ធី វង្សវិបុល អនុប្រធាននាយកដ្ឋាន នៅថ្ងៃទី២០ ខែកុម្ភៈ ឆ្នាំ២០២៤ វេលាម៉ោង៨៖១៥នាទីយប់ កម្លាំងការិយាល័យព្រហ្មទណ្ឌកម្រិតស្រាល ដែលមានលោកវរសេនីយ៍ឯក ឡេង ប៊ុនហួរ នាយការិយាល័យ, លោកវរសេនីយ៍ទោ មឿន ដារ៉ារិទ្ធិ នាយរងការិយាល័យ បានដឹកនាំកម្លាំងជំនាញ ចុះល្បាតបណ្តោផ្លូវវេងស្រេង មុខធនាគារ ABA ច្រមុះជ្រូកស្ទឹងមានជ័យ ក្នុងភូមិទ្រា៣ សង្កាត់ ស្ទឹងមានជ័យ១ ខណ្ឌមានជ័យ រាជធានីភ្នំពេញ ក៏ប្រទះឃើញជនសង្ស័យចំនួន២នាក់ ជិះម៉ូតូចំនួន១គ្រឿងបានធ្វើសកម្មភាពឆក់ទូរស័ព្ទដៃពីនារីរងគ្រោះម្នាក់ឯង មិនបានសម្រេចដែលកំពុងជិះម៉ូតូសំដៅទៅផ្ទះ។

ភ្លាមនោះកម្លាំងជំនាញការិយាល័យធ្វេីការប្រដេញនឹង ឃាត់ខ្លួនជនសង្ស័យបានម្នាក់ ឈ្មោះ ថោង វ៉ាន់ដែន អាយុ៣៦ឆ្នាំ មុខរបរមិនពិតប្រាកដទីកន្លែងស្នាក់នៅផ្ទះជួល ភូមិត្រពាំងថ្លឹង សង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញរីឯជនសង្ស័យម្នាក់ទៀត ដែលជាអ្នកបើកម៉ូតូបានរត់គេចខ្លួនបាត់។

សម្ភារៈដកហូតរួមមាន ម៉ូតូ០១គ្រឿង ម៉ាកហុងដា BEAT ពណ៌ខៀវស ពាក់ផ្លាកលេខ ភ្នំពេញ1HP-4412។

បច្ចុប្បន្នកម្លាំងជំនាញបាននាំជនរងគ្រោះ មកដាក់ពាក្យបណ្តឹង នឹងនាំជនសង្ស័យមកនាយកដ្ឋាននគរបាលព្រហ្មទណ្ឌ ដើម្បីសាកសួរ និងកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការតាមនីតិវិធី៕

ដោយ៖ ជ្រោយពេជ្រ