សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ មន្ទីរប្រឆាំងបទល្មើសគ្រឿងញៀន នៅថ្ងៃទី២៥ ខែកុម្ភៈ ឆ្នាំ២០២៤ បានបង្ហាញមុខឈ្មួញគ្រឿងញៀនចំនួន៣នាក់ ជាជនជាតិចិន ដែលបានប្រព្រឹត្តបទល្មើសនៅរាជធានីភ្នំពេញ និងរឹបអូសថ្នាំញៀនប្រមាណជាង១៦គីឡូក្រាម ជាប្រភេទថ្នាំគ្រវី ។
ព័ត៌មានបានឲ្យដឹងថា ៖ កម្លាំងសមត្ថកិច្ចនគរបាលការិយាល័យទី៣ នៃមន្ទីរប្រឆាំងបទល្មើសគ្រឿងញៀន ក្រោមការសម្របសម្រួលពីលោក គឹម ហុងសាន ព្រះរាជអាជ្ញារងនៃអយ្យការអមសាលាដំបូងរាជធានីភ្នំពេញ កាលពីថ្ងៃទី២២ ខែកុម្ភៈ ឆ្នាំ២០២៤ បានចុះបង្ក្រាបករណីរក្សាទុក ដឹកជញ្ជូន និងជួញដូរដោយខុសច្បាប់នូវសារធាតុញៀនមួយករណី ដោយបានធ្វើការឃាត់ខ្លួនជនជាតិចិន៣នាក់ ។
កិច្ចបង្ក្រាបនោះដំបូងឡើយកម្លាំងក៣ បានប្រើប្រាស់ជំនាញឃាត់ខ្លួនជនសង្ស័យម្នាក់នៅកោះពេជ្រ សង្កាត់ទន្លេបាសាក់ ខណ្ឌចំការមន រាជធានីភ្នំពេញ និងរឹបអូសសារធាតុញៀនបានមួយចំនួន ។ ក្រោយឃាត់ខ្លួនជនសង្ស័យម្នាក់យកទៅសាកសួរ ទើបបន្តទៅឃាត់បក្ខពួក២នាក់ទៀតដែលកំពុងស្នាក់នៅខុនដូមួយកន្លែង ស្ថិតក្នុងសង្កាត់បឹងកេងកង១ ខណ្ឌបឹងកេងកងរាជធានីភ្នំពេញ និងចាប់យកវត្ថុតាងគ្រឿងញៀនមួយចំនួនធំ ប្រភេទថ្នាំគ្រវីធ្វើឲ្យសប្បាយ ។
សមត្ថកិច្ចមិនទាន់បានធ្វើរបាយការលម្អិត ស្តីពីករណីបង្ក្រាបគ្រឿងញៀននោះនៅឡើយទេ គ្រាន់តែបង្ហើបបឋមឲ្យដឹងថា សារធាតុញៀនដែលដកហូតបានពីឈ្មួញចិន៣នាក់នោះសរុបមានចំនួនជាង១៦គីឡូក្រាម ៕
ដោយ ៖ សិលា
