បន្ទាប់ពីផ្ទុះការផ្សព្វផ្សាយ ទីតាំងស្នូកឃ័រ នៅខណ្ឌចំការមន មានបង្កប់ល្បែងស៊ីសង សមត្ថកិច្ចចុះទៅមើល អត់ឃើញ សង្ស័យមានអ្នករាយការណ៍ អោយម្ចាស់ដឹងមុន

ភ្នំពេញ ៖ បន្ទាប់ពីផ្ទុះការផ្សព្វផ្សាយ ទីតាំងស្នូកឃ័រ នៅខណ្ឌចំការមន មានបង្កប់ល្បែងស៊ីសង សមត្ថកិច្ចចុះទៅមើល អត់ឃើញ សង្ស័យមានអ្នករាយការណ៍ អោយម្ចាស់ដឹងមុន។ មហាជន ក៏ដូចជា ប្រជាពលរដ្ឋក្នុងមូលដ្ឋានសង្កាត់បឹងត្របែក ខណ្ឌចំការមន បានសំណូមពរដល់អាជ្ញាធរបង្ក្រាបទីតាំងស្នូកយ័រ យីហោ អេលីដ បង្កប់ល្បែងស៊ីសងខុសច្បាប់ ជាច្រើនប្រភេទ មានដូចជា បៀរ និងអាប៉ោង ឲ្យមានប្រសិទ្ធភាព និងសម្ងាត់កុំឲ្យម្ចាស់ទីតាំងដឹងខ្លួនមុន។

ប្រជាពលរដ្ឋដែលរស់នៅក្បែរទីតាំងនោះបានឲ្យដឹងថា ទីតាំងល្បែងស៊ីសងខ្នាតធំមួយនេះ គេមើលឃើញមានអ្នកញៀនល្បែង ចូលលេងទាំងយប់ ទាំងថ្ងៃមិនដាច់នោះទេ ដែលធ្វើឲ្យពួកគាត់មានការព្រួយបារម្ភពាក់ព័ន្ធនឹងបទល្មើសនានាដូចជាចោរលួច ចោរប្លន់ជាដើម និងរំលោភលើគោលនយោបាយភូមិឃុំមានសុវត្ថិភាពរបស់ប្រមុខរដ្ឋាភិបាលផងដែរ។

ពលរដ្ឋបានបង្ហើបឲ្យដឹងថា កន្លងមកកម្លាំងគណៈបញ្ជាការឯកភាពខណ្ឌចំការមន ដែលដឹកនាំដោយលោក កៀង ល័ក្ស អភិបាលខណ្ឌចំការមន បានធ្វើការចុះបង្ក្រាបជាច្រើនលើកច្រើនសារមកហើយដែរ ប៉ុន្តែអ្វីជាចម្ងល់របស់មហាជន រាល់ប្រតិបត្តិការរបស់លោកអភិបាល ម្ចាស់ទីតាំងភាគច្រើនតែងតែដឹងខ្លួនមុនជានិច្ច ដែលធ្វើឲ្យអាជ្ញាធរពិបាកមានចំណាត់ការលើមេខ្លោងល្បែងស៊ីសងទាំងនេះ ហើយនៅពេលស្ថានភាពស្ងប់ស្ងាត់ទៅវិញ ម្ចាស់ទីតាំងក៏បើកដំណើរការជាធម្មតាទៅវិញ។

លោក កៀង ល័ក្ស អភិបាលខណ្ឌចំការមន បានអោយដឹង នៅព្រឹកថ្ងៃទី០៦ ខែមីនា ឆ្នាំ២០២៤ នេះ តាមរយៈប្រព័ន្ធ Telegram ថា លោកបានបញ្ជាអោយកម្លាំង ចុះត្រួតពិនិត្យ ជាក់ស្ដែងកាលពីថ្ងៃទី២៧ ខែកុម្ភៈ ឆ្នាំ២០២៤ ម្ដងរួចមកហើយ តែសង្កេតឃើញថា ពុំមានសម្ភារៈឬសកម្មភាពពាក់ព័ន្ធនឹងការលេង ឬប្រកបល្បែងស៊ីសងខុសច្បាប់ដូចពលរដ្ឋផ្ដល់ព័ត៌មាន នោះទេ៕

ដោយ៖ ជីណា