សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍២កន្លែងផ្សេងគ្នា បណ្ដាលឱ្យមនុស្សរងរបួសធ្ងន់ស្រាល៣នាក់នៅស្រុកកំពង់រោទិ៍និងស្រុកស្វាយទាប។
យោងតាមសមត្ថកិច្ចនគរបាលបានឱ្យដឹងថា៖
ករណីទី១. បានកើតឡើង នៅវេលាម៉ោង១០និង៥៥នាទី ថ្ងៃទី១២ខែមេសាឆ្នាំ២០២៤ ស្ថិតនៅចំណុចភូមិស្វាយអាណាត ឃុំញរ ស្រុកកំពង់រោទិ៍ ខេត្តស្វាយរៀងលេីផ្លូវជាតិលេខ៣១៤Dមានម៉ូតូ មួយគ្រឿងម៉ាក ហុងដា វ៉េវ ពណ៌ខ្មៅ ពាក់ស្លាកលេខ ស្វាយរៀង 1O-3038 បេីកបរដោយឈ្មោះ រាជ សុភី ភេទប្រុស អាយុ ២៩ឆ្នាំ មុខរបរកម្មកររោងចក្រ មានទីលំនៅភូមិកោះត្រាច ឃុំថ្មី ស្រុកកំពង់រោទិ៍ ខេត្តស្វាយរៀង ក៏បុកជាមួយ ម៉ូតូម៉ាកហុងដា ពណ៌ខ្មៅពាក់ស្លាកលេខ ស្វាយរៀង 1N-3277 បើកបរដោយឈ្មោះ ញ៉ែម ដារ៉ា ភេទប្រុស អាយុ២៩ឆ្នាំមុខរបរកសិករ មានទីលំនៅភូមិស្វាយអាណាត ឃុំញរ ស្រុកកំពង់រោទិ៍ ខេត្តស្វាយរៀង ពេញទំហឹងបង្កការភ្ញាក់ផ្អើលតែម្ដង។
សមត្ថកិច្ចបានបញ្ជាក់មូលហេតុ:ដោយសារតែ អ្នកបើកបរម៉ូតូពាក់ស្លាកលេខ ស្វាយរៀង 1O-3038 បើកបរក្នុងស្ថានភាពស្រវឹង ១.១៨៤ mg/L ។
បច្ចុប្បន្ន: ម៉ូតូចំនួន ០២គ្រឿងត្រូវបានសមត្ថកិច្ច វាស់វែងនិងអូស យកមករក្សាទុកនៅប៉ុស្តិ៍នគរបាលរដ្ឋបាលញរដេីម្បីរង់ចាំធ្វើដោះស្រាយតាមច្បាប់។
ករណីទី២. បានកើតឡើងកាលពីវេលាម៉ោង២និង៤៥នាទីរសៀល ថ្ងៃទី១២ ខែមេសា ឆ្នាំ២០២៤ ស្ថិតនៅចំណុចភូមិអង្គតាមោគ ឃុំប្រសូត ស្រុកស្វាយទាប ខេត្តស្វាយរៀង លេីផ្លូវជាតិលេខ៣១៤D មានរថយន្ដម៉ាក Luxus330 ពណ៌ទឹកប្រាក់ ពាក់ស្លាកលេខ ភ្នំពេញ 2AW-4982 អ្នកបេីកបរ មិនត្រូវបានស្គាល់អត្តសញ្ញាណ បានបុកជាមួយ ម៉ូតូម៉ាកហុងដា ពណ៌ខ្មៅពាក់ស្លាកលេខ ស្វាយរៀង 1O-1754 បើកបរដោយឈ្មោះ ឡាញ់ ភាក់ ភេទប្រុសអាយុ២៦ឆ្នាំមុខរបរកម្មកររោងចក្រមានទីលំនៅភូមិញរ ឃុំញរ ស្រុកកំពង់រោទិ៍ ខេត្តស្វាយរៀងពេញទំហឹងបណ្ដាលឱ្យ រងរបួសធ្ងន់ត្រូវបានយកទៅព្យាបាលនៅមន្ទីរពេទ្យបង្អែកស្រុកស្វាយទាប។
សមត្ថកិច្ចបានបញ្ជាក់ថា មូលហេតុ អ្នកបើកបរម៉ូតូពាក់ស្លាកលេខ ស្វាយរៀង 1O-1754 មិនប្រកាន់ស្តាំ ។
បច្ចុប្បន្ន មធ្យោបាយទាំង២គ្រឿងត្រូវសមត្ថកិច្ចបានយកមករក្សាទុកនៅ អធិការដ្ឋាននគរបាលស្រុកកំពង់រោទិ៍ ដេីម្បីកសាងសំណុំរឿងតាមច្បាប់ ៕
ដោយ៖ សុថាន
