សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ក្រសួងព័ត៌មាន នៅថ្ងៃទី១៦ ខែឧសភា ឆ្នាំ២០២៤នេះ សូមជូនដំណឹងដល់ ឯកឧត្តម លោកជំទាវ លោកឧកញ៉ា អ្នកឧកញ៉ា លោក លោកស្រី ម្ចាស់អង្គភាពប្រព័ន្ធផ្សព្វផ្សាយ អង្គការសមាគម ដែលធ្វើការលើវិស័យព័ត៌មាន អ្នកសារព័ត៌មាន ជាតិទាំងអស់ដែលមានបំណងចង់សិក្សាវគ្គខ្លី ជ្រាបថា ក្រសួងនឹងរៀបចំបើកវគ្គបណ្តុះបណ្តាលលើមុខវិជ្ជា ជំនាញស្តីពី “ការសរសេរដំណឹងទាន់ហេតុការណ៍» ដែលនឹងប្រព្រឹត្តទៅចាប់ពីថ្ងៃទី២៨ ដល់ថ្ងៃទី៣០ ខែ ឧសភា ឆ្នាំ២០២៤ នៅទីស្តីការក្រសួងព័ត៌មាន (រយៈពេលចំនួន៣ថ្ងៃ សិក្សាពីថ្ងៃអង្គារ ដល់ថ្ងៃព្រហស្បតិ៍ ម៉ោង៨:០០នាទី ដល់ម៉ោង ១២:០០នាទី)។
*ក. លក្ខខណ្ឌនៃការបណ្តុះបណ្តាល៖
-អ្នកសារព័ត៌មានជាតិ ដែលបានចុះបញ្ជីនៅក្រសួងព័ត៌មាន
-វគ្គសិក្សានេះ ទទួលសិក្ខាកាមចំនួន ៥០នាក់ ប៉ុណ្ណោះ។
*ខ. ឯកសារភ្ជាប់រួមមាន៖
-អត្តសញ្ញាណបណ្ណសញ្ជាតិខ្មែរ
-បណ្ណសារព័ត៌មាន ចេញដោយក្រសួងព័ត៌មាន
-លិខិតអនុញ្ញាតបើកអាជីវកម្មចេញដោយក្រសួងព័ត៌មាន (មានសុពលភាព)។
ដូច្នេះអ្នកសារព័ត៌មានជាតិ ដែលមានចំណាប់អារម្មណ៍ចូលរួមសិក្សាវគ្គបណ្តុះបណ្តាលខាងលើ សូមទំនាក់ ទំនងចុះឈ្មោះតាមរយៈ QR Code ខាងក្រោម ចាប់ពីថ្ងៃជូនដំណឹងនេះ រហូតដល់ថ្ងៃទី២៧ ខែឧសភា ឆ្នាំ ២០២៤។
អាស្រ័យដូចបានជម្រាបជូនខាងលើ សូម ឯកឧត្តម លោកជំទាវ លោកឧកញ៉ា អ្នកឧកញ៉ា លោក លោកស្រី ម្ចាស់អង្គភាពប្រព័ន្ធផ្សព្វផ្សាយ អង្គការសមាគម ដែលធ្វើការលើវិស័យព័ត៌មាន អ្នកសារព័ត៌មាន ជាតិទាំងអស់ជ្រាបជាព័ត៌មាន។
សូមបញ្ជាក់៖ ការសិក្សានេះមិនតម្រូវឱ្យបង់ប្រាក់។ ក្រោយបញ្ចប់ការសិក្សាក្រសួងនឹងចេញវិញ្ញាបនបត្រជូន៕
ដោយ៖ តារា
