សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការចេញផ្សាយរបស់សារព័ត៌មាន CNA កាលពីថ្ងៃទី១៥ ខែឧសភា ឆ្នាំ២០២៤ លោក គីម ជុងអ៊ុន មេដឹកនាំកូរ៉េខាងជើង ក្នុងអំឡុងពេលត្រួតពិនិត្យប្រព័ន្ធបាញ់មីស៊ីលថ្មី ក៏បានអំពាវនាវឲ្យមានវិវត្តខ្លួនដើម្បីត្រៀមធ្វើសង្រ្គាម ខណៈកូរ៉េខាងជើងទើបតែសម្រេចបាននូវគោលដៅផលិតអាវុធជាបន្តបន្ទាប់ ។
បេីតាមទីភ្នាក់ងារសារព័ត៌មានកូរ៉េ KCNA បាននិយាយថា ក្នុងអំឡុងពេលត្រួតពិនិត្យប្រព័ន្ធបាញ់មីស៊ីលយុទ្ធសាស្ត្រ លោក គីម បានសម្តែងការពេញចិត្តយ៉ាងខ្លាំងចំពោះលទ្ធផលផលិតកម្មដែលបានចុះបញ្ជីដោយសហគ្រាសឧស្សាហកម្មការពារជាតិនៅឆ្នាំនេះ ។ ជាពិសេសលោកបានសង្កត់ធ្ងន់លើតម្រូវការក្នុងការផ្លាស់ប្តូរឲ្យកាន់តែទំនើបបន្ថែមទៀតដើម្បីត្រៀមធ្វើសង្គ្រាម និងអនុវត្តផែនការផលិតកម្មអាវុធសម្រាប់ឆ្នាំ២០២៤នេះដោយជោគជ័យ ។
ជាមួយគ្នានោះ អ្នកវិភាគមួយចំនួននិយាយថា កូរ៉េខាងជើងអាចនឹងធ្វើតេស្ត និងបង្កើនការផលិតកាំភ្លើងធំ និងមីស៊ីលដើម្បីបញ្ជូនទៅរុស្ស៊ីសម្រាប់ប្រើប្រាស់ក្នុងប្រទេសអ៊ុយក្រែន ប៉ុន្តែ KCNA បានបញ្ជាក់វិញថា គ្រឿងសព្វាវុធទាំងប៉ុន្មានដែលផលិតក្នុងឆ្នាំនេះ គឺប្រើសម្រាប់តែអង្គភាពយោធានៅភាគខាងលិចរបស់ប្រទេសប៉ុណ្ណោះ ។
សូមជម្រាបថា កាលពីពេលថ្មីៗនេះ ប្រទេសកូរ៉េខាជើង បានពង្រឹងទំនាក់ទំនងយោធាជាមួយរុស្ស៊ី ហើយទីក្រុងព្យុងយ៉ាងបានថ្លែងអំណរគុណដល់ទីក្រុងមូស្គូកាលពីខែមុនចំពោះការប្រើប្រាស់ការវេតូរបស់ក្រុមប្រឹក្សាសន្តិសុខអង្គការសហប្រជាជាតិដើម្បីរារាំងក្រុមអ្នកជំនាញរបស់អង្គការសហប្រជាជាតិមិនឲ្យតាមដានកាដាក់ទណ្ឌកម្មអាវុធលើរដ្ឋាភិបាលលោក គីម ។
ដោយឡែក កូរ៉េខាងត្បូង និងសហរដ្ឋអាមេរិក ក៏បានចោទប្រកាន់កូរ៉េខាងជើងដែរថា ជាអ្នកផ្គត់ផ្គង់សព្វាវុធដល់រុស្ស៊ី ទោះបីជាមានការដាក់ទណ្ឌកម្មរបស់អង្គការសហប្រជាជាតិហាមឃាត់សកម្មភាពបែបនេះក៏ដោយ ខណៈទំនាក់ទំនងអន្តរកូរ៉េគឺឈានដល់ចំណុចក្ដៅគគុកក្នុងរយៈពេលប៉ុន្មានឆ្នាំមកនេះ ៕
ដោយ៖ តារា
