ចិនគ្រោងនឹងបញ្ជូនអ្នកទេសចរទៅកាន់ទីអវកាសនៅឆ្នាំ២០២៨

ចែករំលែក៖

ក្រុមហ៊ុនអវកាសពាណិជ្ជកម្មរបស់ចិនបាននិយាយកាលពីពេលថ្មីៗនេះថា ខ្លួននឹងដាក់ឱ្យដំណើរការយានទេសចរណ៍អវកាសដំបូងគេក្នុងឆ្នាំ២០២៧ និងហោះហើរបញ្ជូនអ្នកទេសចរទៅកាន់លំហអាកាសនៅឆ្នាំ២០២៨ ។
សេចក្តីថ្លែងការណ៍ខាងលើត្រូវបានបង្ហោះដោយក្រុមហ៊ុន China Aerospace Exploration Technology Co., Ltd. (CAS Space) ដែលមានមូលដ្ឋាននៅទីក្រុងក្វាងចូវនៅលើគណនី WeChat ផ្លូវការរបស់ខ្លួនដែលមានឈ្មោះថា “International Rocket Launch” ។
CAS Space បានប្រកាសថា វិស័យទេសចរណ៍អវកាសនឹងប្រើប្រាស់រ៉ុក្កែតដំណាក់កាលតែមួយជាមួយនឹងកាប៊ីនធ្វើដំណើរដែលមានបង្អួចបែប Panoramic ចំនួនបួន ហើយអាចផ្ទុកអ្នកដំណើរចំនួន 7 នាក់នៅលើជើងហោះហើរនីមួយៗដែលរំពឹងថានឹងមានរយៈពេលប្រហែល 10 នាទី។ អ្នកដំណើរអាចទទួលបានអារម្មណ៍នៃការស្រកទម្ងន់រយៈពេល ៣-៥ នាទី ហើយអាចគយគន់ទេសភាពខាងក្រៅលំហ។ នៅពេលដែលការធ្វើដំណើរបញ្ចប់ យានទេសចរណ៍អវកាសនឹងចុះចតដោយឆត្រយោង។
វាត្រូវបានគេដឹងថា ក្រុមហ៊ុនគ្រោងនឹងរៀបចំការបាញ់បង្ហោះរៀងរាល់ 100 ម៉ោងពីសួនកម្សាន្តអវកាស។ យានជំនិះចំនួន 10 គ្រឿងនឹងប្តូរវេនដឹកអ្នកដំណើរទៅកាន់គែមនៃលំហ។
ទន្ទឹមនឹងនេះ យោងតាមបណ្តាញសេដ្ឋកិច្ចចិន លោក Truong Hoai Minh អគ្គនាយករងនៃ CAS Space បាននិយាយថា បច្ចុប្បន្នមានអតិថិជនមកក្រុមហ៊ុនចង់ធ្វើការកក់ទុក។ ក្រុមហ៊ុនក៏បានចុះហត្ថលេខាលើកិច្ចព្រមព្រៀងសហប្រតិបត្តិការយុទ្ធសាស្ត្រជាមួយក្រុមហ៊ុនទេសចរណ៍ចិនផងដែរ។ នៅពេលអនាគត ក្រុមហ៊ុននេះនឹងមិនត្រឹមតែកំណត់គោលដៅទីផ្សារក្នុងស្រុករបស់ចិនប៉ុណ្ណោះទេ ប៉ុន្តែថែមទាំងទាញយកទីផ្សារទេសចរណ៍អន្តរជាតិដូចជាអាស៊ីអាគ្នេយ៍ ឬមជ្ឈិមបូព៌ាផងដែរ។
យោងតាមក្រុមហ៊ុន ជើងហោះហើរនីមួយៗត្រូវបានគេរំពឹងថានឹងមានតម្លៃពី 2 លានទៅ 3 លានយន់ (ជិត 277,000 ដុល្លារដល់ជាង 415,000 ដុល្លារ) ក្នុងមនុស្សម្នាក់៕ ដោយ៖ ធីរីណា