ការតវ៉ាបានក្លាយទៅជាហិង្សានៅប្រទេសកេនយ៉ា ដែលបង្កការព្រួយបារម្ភពីសហគមន៍អន្តរជាតិ

ចែករំលែក៖

រដ្ឋាភិបាលកេនយ៉ាកាលពីម្សិលមិញ (២៥ មិថុនា) បានសន្យាថានឹងស្តារសណ្តាប់ធ្នាប់ឡើងវិញ បន្ទាប់ពីកុបកម្មដ៏ធ្ងន់ធ្ងរមួយបានកើតឡើងនៅអគារសភារបស់ប្រទេសនេះ ដែលបណ្តាលឱ្យមានអ្នកស្លាប់និងរបួសជាច្រើននាក់។ ហេតុការណ៍នេះត្រូវបានគេនិយាយថា កើតចេញពីការតវ៉ាប្រឆាំងនឹងការដំឡើងពន្ធក្នុងប្រទេសអាហ្វ្រិកនេះ។ ការវិវឌ្ឍធ្ងន់ធ្ងរនៅប្រទេសកេនយ៉ាបានបង្កឱ្យមានការព្រួយបារម្ភជាសាធារណៈ។
នៅក្នុងសុន្ទរកថាជាតិតាមទូរទស្សន៍ លោកប្រធានាធិបតីកេនយ៉ា William Ruto បានសម្តែងការព្រួយបារម្ភអំពីកុបកម្មកាលពីម្សិលមិញ។ ប៉ូលិសត្រូវបានបង្ខំឱ្យបើកការបាញ់ប្រហារ នៅពេលដែលក្រុមអ្នកតវ៉ាបានព្យាយាមសម្រុកចូលសភារបស់ប្រទេស ខណៈដែលសមាជិកសភាកំពុងបោះឆ្នោតលើច្បាប់ដំឡើងពន្ធ។ ការប៉ះទង្គិចគ្នារវាងប៉ូលិស នឹងបាតុករដែលបានផ្ទុះឡើងនៅពេលក្រោយបានធ្វើឱ្យបាតុករយ៉ាងតិច ១០នាក់ស្លាប់ និង៥០ នាក់រងរបួស ខណៈដែលហេដ្ឋារចនាសម្ព័ន្ធជាច្រើនត្រូវបានដុតបំផ្លាញ។
បើតាមលោក រូតូ ព្រឹត្តិការណ៍ដែលកើតឡើងក្នុងពេលថ្ងៃគឺជាការគំរាមកំហែងយ៉ាងធ្ងន់ធ្ងរដល់សន្តិសុខជាតិ។ លោកបានសន្យាថានឹងមានការឆ្លើយតបយ៉ាងឆាប់រហ័សចំពោះហេតុការណ៍នេះ៖
“កេនយ៉ា បានជួបប្រទះការវាយប្រហារដែលមិនធ្លាប់មានពីមុនមកលើលទ្ធិប្រជាធិបតេយ្យ នីតិរដ្ឋ និងសុចរិតភាពនៃស្ថាប័នរដ្ឋធម្មនុញ្ញរបស់ខ្លួន។ ការវាយប្រហារនៅថ្ងៃនេះលើបទបញ្ជារដ្ឋធម្មនុញ្ញរបស់ប្រទេសកេនយ៉ា បានបណ្តាលឱ្យបាត់បង់ជីវិត បាត់បង់ទ្រព្យសម្បត្តិ និងការប្រមាថដល់ស្ថាប័ន និងនិមិត្តសញ្ញានៃអធិបតេយ្យភាពរបស់យើង។ ពួកគេសម្គាល់ចំណុចរបត់ដ៏សំខាន់មួយនៅក្នុងរបៀបដែលយើងឆ្លើយតបទៅនឹងការគំរាមកំហែងធ្ងន់ធ្ងរដល់សន្តិសុខជាតិរបស់យើង។ ខ្ញុំធានាដល់ប្រជាជាតិថា រដ្ឋាភិបាលនឹងកៀរគរធនធានទាំងអស់ក្នុងសមត្ថភាពរបស់ជាតិ ដើម្បីធានាថា ស្ថានភាពបែបនេះមិនកើតឡើងទៀតទេ»។
ភ្លាមៗបន្ទាប់ពីការប្រកាសរបស់លោកប្រធានាធិបតី William Ruto រដ្ឋមន្ត្រីការពារជាតិកេនយ៉ា លោក Aden Duale បាននិយាយថា កងទ័ពត្រូវបានដាក់ពង្រាយដើម្បីជួយប៉ូលិសក្នុងការដោះស្រាយភាពអាសន្នផ្នែកសន្តិសុខ។
ការតវ៉ានៅក្នុងប្រទេសកេនយ៉ាបានចាប់ផ្តើមនៅថ្ងៃទី 18 ខែមិថុនា មុនពេលរីករាលដាលទូទាំងប្រទេសនៅថ្ងៃទី 20 ខែមិថុនា។ ក្រុមអ្នកតវ៉ាបានតវ៉ាចំពោះគម្រោងរបស់រដ្ឋាភិបាលក្នុងការប្រមូលពន្ធបន្ថែមទៀត ដើម្បីកាត់បន្ថយឱនភាពថវិកា និងកាត់បន្ថយបំណុល៕ ដោយ៖ ធីរីណា