🔥ផ្ទះ១ខ្នងត្រូវបានភ្លើងឆាបឆេះអស់ទាំងស្រុងដោយសារស្ត្រីម្ចាស់ផ្ទះប្រើប្រាស់ចង្កៀងប្រេងសាំងហើយពេលដេកជើងប៉ះចង្កៀងធ្វើឱ្យដួលរលំ

ខេត្តប៉ៃលិន៖ នៅវេលាម៉ោង០៦និង៣០នាទីព្រឹកថ្ងៃទី៣០ ខែ កក្កដា ឆ្នាំ២០២៤ កម្លាំងប៉ុស្តិ៍នគរបាលរដ្ឋបាលស្ទឹងកាច់បានទទួលសេចក្តីរាយការណ៍ពីប្រជាពលរដ្ឋថា មានករណីអគ្គិភ័យភ្លើងឆេះផ្ទះចាំចម្ការចំនួន១ករណីនៅចំណុចបន្ទាយទាហានល្បាត១ ស្ថិតនៅក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន។   

សមត្ថកិច្ចជំនាញបានបន្តថា៖ ក្រោយពីទទួលបានព័ត៌មានភ្លាមៗ កម្លាំងប៉ុស្តិ៍បានចុះទៅដល់ឃើញផ្ទះរបស់គាត់ត្រូវភ្លើងឆេះខូចខាតទាំងស្រុង និងបានសាកសួរទៅទាហានឈ្មោះឆៃ ដែលគាត់បានឈរជើងនៅទីនោះបាននិយាយថា៖ ផ្ទះនេះឆេះតាំងពីវេលាម៉ោងប្រហែល ០២និង០០នាទីយប់រំលងអធ្រាត្រ ដោយគាត់ឃើញភ្លើងឆេះក៏ពុំហ៊ានចូលជួយនោះទេ និងបានទូរស័ព្ទទៅម្ចាស់ផ្ទះដែលជាឪពុកក្មេកក៏មិនលើក ទើបបណ្ដាលឱ្យផ្ទះនេះឆេះអស់ទៅ។

សមត្ថកិច្ចបានបន្តទៀតថា៖ អ្នកស្នាក់នៅផ្ទះចាំចម្ការឈ្មោះ ហួន វ៉ាន់ឌី ភេទស្រី អាយុ ៣០ឆ្នាំ មានទីលំនៅភូមិផ្សារព្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន និងកូនស្រី១នាក់ឈ្មោះ ក្រឹម ដាលិន អាយុ០៥ឆ្នាំ។ 

បើតាមការរៀបរាប់ពីស្ត្ត្រីដែលស្នាក់នៅផ្ទះនោះបានប្រាប់សមត្តកិច្ចថា៖ មូលហេតុនៃការឆេះបណ្ដាលមកពីអ្នកស្នាក់នៅគាត់បានប្រើប្រាស់ចង្កៀងប្រេងសាំង ហើយពេលគាត់ដេកក៏វាសជើងប៉ះបណ្ដាលឱ្យដួលរួចក៏ឆាបឆេះទៅ។ ដោយឃើញភ្លើងឆេះខ្លាំងពន្លត់មិនរលត់ក៏បានពកូនរត់គេចខ្លួនទៅពួននៅចម្ការដំឡូងតែម្តង។

សូមបញ្ជាក់ថា៖ ករណីនេះបណ្ដាលឱ្យឆេះខូចខាតដូចខាងក្រោម ៖

– ឆេះផ្ទះ១ខ្នងទំហំ ៤ម៉ែត្រ x ៥ ម៉ែត្រ ធ្វើពីឈើ ប្រក់ស័ង្កសី

– ឆេះម៉ូតូ១គ្រឿងម៉ាក ហុងដាឌ្រីម ស៊េរីឆ្នាំ២០២០៕

ដោយ៖ ស សារ៉េត