🔥ឆេះទីតាំងស្តុកក្រដាសកាតុងអេតចាយ យ៉ាងសន្ធោសន្ធៅ

ភ្នំពេញ៖ អគ្គិភ័យបានឆាបឆេះ ឃ្លាំងដាក់ក្រដាសកាតុងអេតចាយនៅក្នុងរោងចក្រខ្វាន់ទុម មួយកន្លែងយ៉ាងសន្ធោសន្ធៅបណ្តាលឲ្យខូចខាតសម្ភារៈនៅក្នុងនោះអស់មួយចំនួន។ 

ហេតុការណ៍គ្រោះអគ្គិភ័យនេះបានកើតឡើង កាលពីវេលាម៉ោង ១២និង០០នាទីយប់រំលងអធ្រាត្រឈានចូល ថ្ងៃទី០៩ ខែសីហា ឆ្នាំ២០២៤ ស្ថិត នៅ ក្នុងសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ ។

តាមការបញ្ជាក់ពីពលរដ្ឋនៅកន្លែងកើតហេតុបានឲ្យដឹងថា នៅមុនពេលកើតហេតុគេឃើញមានផ្សែងហុយចេញពី ទីតាំងស្តុកក្រដាសដាក់កាតុងអេតចាយលាយឡំនិងអណ្តាតភ្លើងយ៉ាងសន្ធោសន្ធៅចេញពីក្នុងរោងចក្រខាងលើ ភ្លាមនោះដែរពលរដ្ឋជិតខាងរួមទាំងសន្តិសុខ បាននាំគ្នាទាញទុយោទឹកបាញ់ពន្លត់មួយជំហ៊ានសិនក្រោយមកក៏ឃើញមានរថយន្តពន្លត់អគ្គិភ័យប្រចាំរោងចក្រមកដល់មួយគ្រឿងមុនគេ ក្រោយមកទៀតក៏ឃើញមានរថយន្តពន្លត់អគ្គិភ័យ របស់ស្នងការដ្ឋាននគបាលរាជធានីភ្នំពេញនិងរថយន្តពន្លត់អគ្គិភ័យកងកម្លាំងសង្រ្គោះ ៧១១ចុះមកជួយអន្តរាគមន៍បាញ់ពន្លត់ជាច្រើនគ្រឿងទើបរលត់ទៅវិញ នៅយប់ថ្ងៃដដែល។

ក្រោយកម្លាំងបង្ការពន្លត់អគ្គិភ័យចុះមកអន្តរាគមន៍បាញ់ពន្លត់បានប្រើប្រាស់រថយន្តអស់ជាច្រើនគ្រឿងនៅក្នុងនោះដែរមិនមានអ្នករងរបួសនិងស្លាប់នោះទេ ខូចខាតសម្ភារៈនៅក្នុងរោងចក្រអស់មួយចំនួនតែប៉ុណ្ណោះ៕

ដោយ៖ សុខាសែនជ័យ