សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ លោកឧបនាយករដ្ឋមន្ត្រី ហ៊ុន ម៉ានី ផ្តាំផ្ញើដល់និស្សិតដែលនឹងចេញទៅសិក្សានៅក្រៅប្រទេស ឱ្យបណ្តុះទម្លាប់គិតគូរ និងមានមោទនភាពចំពោះប្រទេសជាតិ ហើយខិតខំប្រឹងប្រែងរៀនសូត្រ ដើម្បីយកចំណេះជំនាញចូលរួមអភិវឌ្ឍប្រទេសជាតិ ឱ្យកាន់តែរីកចម្រើន។
សូមបញ្ជាក់ថា ៖ លោក ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ បានអនុញ្ញាតឱ្យនិស្សិតជ័យលាភីអាហារូបករណ៍ JICA ប្រទេសជប៉ុន ចំនួន ១០រូប (ស្រី ៣រូប) និងអាហារូបករណ៍សាធារណរដ្ឋបារាំង ចំនួន ១រូប ដើម្បីចូលជួបសម្តែងការគួរសម និងទទួលយកនូវអនុសាសន៍ណែនាំមុនពេលចេញទៅសិក្សានៅក្រៅប្រទេស នាព្រឹកថ្ងៃទី១៧ ខែកញ្ញា ឆ្នាំ២០២៤ នៅសាលាភូមិន្ទរដ្ឋបាល។
នៅក្នុងជំនួបសំណេះសំណាលនេះ លោកឧបនាយករដ្ឋមន្ត្រី បានផ្តល់វេទិកាដល់ថ្នាក់ដឹកនាំក្រសួងមុខងារសាធារណៈ ចែករំលែកជាមួយនិស្សិតអាហារូបករណ៍ នូវបទពិសោធមួយចំនួនដែលក្នុងនាមជារាមច្បង បានឆ្លងកាត់ ដើម្បីជាមូលដ្ឋានដល់និស្សិតជ័យលាភីទាំងអស់ ត្រៀមសម្រាប់ការសិក្សារបស់ខ្លួននាពេលដ៏ខ្លីខាងមុខ។ ទន្ទឹមនេះ លោកឧបនាយករដ្ឋមន្ត្រីផ្ទាល់ក៏បានលើកឡើងនូវចំណុច០៣ សំខាន់ ជូនដល់ក្រុមនិស្សិត ផ្ដើមពីការកោតសរសើរ និងអបអរសាទរចំពោះកិច្ចខិតខំប្រឹងប្រែង និងឆ្លងកាត់ឧបសគ្គនានា មុននឹងឈានដល់ការទទួលបានឱកាសអាហារូបករណ៍នេះ។
លោកឧបនាយករដ្ឋមន្ត្រី ក៏បានលើកទឹកចិត្តឱ្យមានការត្រៀមខ្លួនជាស្រេច ទៅលើសិក្សាស្រាវជ្រាវពីមូលដ្ឋាន ឬតំបន់ដែលត្រូវទៅសិក្សា និងរស់នៅ ជាពិសេសការស្វែងយល់ពីរបៀបរបបរស់នៅ និងប្រពៃណីរបស់ប្រទេសនីមួយៗ ព្រមទាំងដឹងពីកន្លែងដែលគួរឬមិនគួរទៅ។ ចំណុចចុងក្រោយ គឺការណែនាំឱ្យនិស្សិតគ្រប់ៗរូបធ្វើការស្វែងយល់ឱ្យបានកាន់តែស៊ីជម្រៅពីដំណើរប្រវត្តិសាស្រ្តរបស់កម្ពុជា ដែលបានឆ្លងកាត់ និងវិធីសាស្ត្រនៃការដឹកនាំប្រទេស ដើម្បីនាំមកនូវសុខសន្តិភាពដូចបច្ចុប្បន្ន និងឆ្ពោះទៅមុខ។ ចំណុចដែលលោកឧបនាយករដ្ឋមន្រ្តី បានសង្កត់ធ្ងន់នោះ គឺការបណ្ដុះទម្លាប់ក្នុងការគិតគូរឱ្យតម្លៃ និងមានមោទនភាពចំពោះសង្គមជាតិរបស់ខ្លួនឯងឱ្យបានកាន់តែច្រើនបន្ថែម។
ចុងបញ្ចប់នៃជំនួបនេះ លោកឧបនាយករដ្ឋមន្ត្រី បានជូនពរដល់និស្សិតជ័យលាភីទាំងអស់ឱ្យទទួលបានជោគជ័យក្នុងការសិក្សា និងជួបតែសុខសុវត្ថិភាពក្នុងការធ្វើដំណើរ ៕
ដោយ ៖ សិលា
