សារព័ត៌មាន នគរវត្ត តែងតែនាំមុខគេជានិច្ច
ខ្សែការពារសញ្ជាតិអ៊ីតាលី Marco Curto ត្រូវបានហាមប្រាមចំនួន១០ប្រកួតពីបទបំពានពូជសាសន៍លើខ្សែប្រយុទ្ធកូរ៉េខាងត្បូង Hwang Hee-chan ពេលលេងឱ្យក្រុម Como ទល់នឹង Wolverhampton Wanderers ក្នុងការប្រកួតមិត្តភាពមុនបើករដូវកាលក្នុងខែកក្កដា។
កីឡាករ Curto ដែលបច្ចុប្បន្នកំពុងខ្ចីជើងពីក្លិប Como ទៅក្លិប Cesena ក្នុងលីកលំដាប់ទី២អ៊ីតាលី Serie B នឹងត្រូវបានពិន័យពាក់កណ្តាលភ្លាមៗ ហើយពាក់កណ្តាលទៀតត្រូវព្យួររយៈពេល២ឆ្នាំ។
អ្នកនាំពាក្យរបស់ FIFA បាននិយាយថា “កីឡាករ Marco Curto ត្រូវបានរកឃើញថាទទួលខុសត្រូវចំពោះអាកប្បកិរិយារើសអើង និងត្រូវបានពិន័យដោយការព្យួរការប្រកួតចំនួន១០។អ្នកលេងត្រូវបានបញ្ជាឱ្យផ្តល់សេវាសហគមន៍ និងឆ្លងកាត់ការបណ្តុះបណ្តាល និងការអប់រំជាមួយអង្គការដែលត្រូវបានអនុម័តដោយ FIFA”។
Wolves បានប្រកាសថា ក្លិបនឹងដាក់ពាក្យបណ្តឹងទៅ UEFA បន្ទាប់ពីឧប្បត្តិហេតុនៅក្នុងរមណីយដ្ឋានអេស្ប៉ាញ Marbella ដែលបង្កឱ្យមានការឆ្លើយតបខឹងសម្បារពីមិត្តរួមក្រុមរបស់ Hwang និងនាំឱ្យមានការបណ្តេញខ្សែបម្រើស្លាប Daniel Podence សម្រាប់ការដាល់កីឡាករ Como។
នាយកផ្នែកបាល់ទាត់នៃក្លិប Premier League លោក Matt Wild បាននិយាយនៅក្នុងសេចក្តីថ្លែងការណ៍មួយថា “យើងស្វាគមន៍ការសម្រេចចិត្តរបស់ FIFA ក្នុងការដាក់ទណ្ឌកម្ម Marco Curto បន្ទាប់ពីឧប្បត្តិហេតុរើសអើងក្នុងអំឡុងពេលការប្រកួតមិត្តភាពមុនរដូវកាលរបស់យើងទល់នឹង Como។ ការព្យួរដែលចេញដល់កីឡាករ ផ្ញើសារយ៉ាងច្បាស់ថា ការប្រកាន់ពូជសាសន៍ និងការរើសអើងនឹងមិនត្រូវបានអត់ឱនឱ្យនៅក្នុងបាល់ទាត់ ឬសង្គមឡើយ។ ក្រុម Wolves នឹងតែងតែឈរយ៉ាងរឹងមាំប្រឆាំងនឹងការរើសអើងជាតិសាសន៍ និងការរើសអើងក្នុងគ្រប់រូបភាព ហើយយើងនៅតែប្តេជ្ញាចិត្តយ៉ាងពេញទំហឹងក្នុងការបង្កើតបរិយាកាសមួយដែលមនុស្សគ្រប់គ្នាមានអារម្មណ៍គោរព និងរាប់បញ្ចូល”។
កាលពីខែកក្កដា ខណៈពេលដែលថ្កោលទោសការរើសអើងជាតិសាសន៍ លោក Como បាននិយាយថា Curto បានហៅ Hwang ថាជា “Jackie Chan” ដែលជាតារាភាពយន្ដហុងកុង បន្ទាប់ពីបានឮអ្នកលេង Wolves ហៅមុខដោយរហស្សនាមរបស់គាត់ថា “Chany”។ ក្លិបបានអះអាងថា “តាមក្លិបយើងបារម្ភកីឡាកររបស់យើងមិនបាននិយាយអ្វីក្នុងលក្ខណៈប្រមាថនោះទេ។ យើងខកចិត្តដែលប្រតិកម្មរបស់កីឡាករ Wolves មួយចំនួនបានឃើញឧបទ្ទវហេតុផ្ទុះឡើងមិនស្មើគ្នា”។
នៅឯសមាជចុងក្រោយរបស់ FIFA នៅទីក្រុងបាងកកកាលពីខែឧសភា ប្រធាន Gianni Infantino បានចាប់ផ្ដើមនូវអ្វីដែលគាត់បានពិពណ៌នាថា ជាជំហរជាសកលប្រឆាំងនឹងការរើសអើងជាតិសាសន៍។ ស្ថាប័នគ្រប់គ្រងបានសន្យានូវសកម្មភាពចំនួន៥រួមទាំងការដាក់ទណ្ឌកម្មជាកាតព្វកិច្ចចំពោះឧប្បត្តិហេតុនៃការរើសអើងជាតិសាសន៍នៅក្នុង ឬជុំវិញការប្រកួត។
លោក Infantino បានប្រាប់ក្រុមមន្ត្រីកីឡាបាល់ទាត់មកពីជុំវិញពិភពលោកថា “ការរើសអើងជាតិសាសន៍គឺជាគ្រោះមហន្តរាយដែលមាននៅក្នុងសង្គមរបស់យើង ហើយក៏ជាការជ្រៀតចូលទៅក្នុងបាល់ទាត់ផងដែរ។ អស់រយៈពេលជាយូរពេក យើងមិនអាចដោះស្រាយវាតាមរបៀបសមរម្យបានទេ។ យើងត្រូវក្រោកឈរឡើង ហើយប្រយុទ្ធប្រឆាំងនឹងការរើសអើងជាតិសាសន៍ និងកម្ចាត់ការរើសអើងជាតិសាសន៍ទាំងអស់គ្នា”៕
ដោយ៖ ភារៈ (រូបភាព ៖ Reuters/CNA)
