ពលរដ្ឋហ្គាហ្សារស់នៅក្រោមគំនរបាក់បែក សហរដ្ឋអាមេរិកប្រាប់អ៉ីស្រាអែលកុំបង្កការបំផ្លិចបំផ្លាញលីបង់ដូចនៅហ្គាហ្សា

ចែករំលែក៖

បន្ទាប់ពីជម្លោះអស់រយៈពេលមួយឆ្នាំមក កម្ទេចថ្មគំនរបាក់បែកនៅតំបន់ហ្គាហ្សាបានក្លាយទៅជាបញ្ហាដែលនឹងត្រូវចំណាយអស់ 1.2 ពាន់លានដុល្លារដើម្បីសម្អាត ប៉ុន្តែបើយោងតាមអ្នកជំនាញ វាចាំបាច់ត្រូវចាប់ផ្តើមឆាប់ៗដើម្បីសង្គ្រោះជីវិតមនុស្ស។
ក្នុងពេលនេះដែរ សហរដ្ឋអាមេរិក កាលពីថ្ងៃពុធ ទី៩ ខែតុលា បានព្រមានអ៉ីស្រាអែលឱ្យបញ្ចៀសរាល់ការធ្វើសកម្មភាពយោធាទាំងឡាយណា នៅក្នុងប្រទេសលីបង់ ដែលនាំទៅរកវិនាសកម្មដូចនៅតំបន់ហ្កាហ្សា បន្ទាប់ពីលោកនាយករដ្ឋមន្ត្រី Benjamin Netanyahu បានគំរាមលីបង់ថាអាចនឹងមានវាសនាដូចហ្កាហ្សា។
នាយករដ្ឋមន្ត្រីអ៉ីស្រាអែល លោក Benjamin Netanyahu បានគំរាមកាលពីថ្ងៃអង្គារកន្លងទៅថា លីបង់អាចប្រឈមមុខនឹងការបំផ្លិចបំផ្លាញដូចជាហ្កាហ្សា ខណៈកងទ័ពអ៉ីស្រាអែលពង្រីកប្រតិបត្តិការវាយលុកថ្មើរជើងប្រឆាំងក្រុមហេសបូឡាហ៍នៅភាគខាងត្បូងលីបង់។ «ពួកអ្នកមានឱកាស ដើម្បីសង្រ្គោះលីបង់ មុននឹងលីបង់ធ្លាក់ចូលក្នុងសង្រ្គាមមួយដែលនឹងនាំទៅរកការបំផ្លិចបំផ្លាញ និងការឈឺចាប់ដូចដែលបានកើតឡើងនៅហ្កាហ្សា … ខ្ញុំផ្ដាំទៅកាន់ពួកអ្នក ប្រជាជនលីបង់ នោះគឺរំដោះប្រទេសរបស់ពួកអ្នក ចេញពីហេសបូឡាហ៍ ព្រោះថាធ្វើដូច្នេះទើបសង្រ្គាមអាចបញ្ចប់»។ នេះជាការលើកឡើងរបស់លោក Netanyahu នៅក្នុងសុន្ទរកថាជាវីដេអូមួយទៅកាន់ប្រជាជនលីបង់។
ពាក់ព័ន្ធនឹងការគំរាមរបស់លោក Netanyahu នេះដែរ អ្នកនាំពាក្យក្រសួងការបរទេសអាមេរិក លោក Matthew Miller បានគូសបញ្ជាក់ប្រាប់អ្នកសារព័ត៌មានដូច្នេះថា «វាមិនគួរឱ្យកើតមានឡើយនូវសកម្មភាពយោធានៅលីបង់ ដូចដែលបានកើតឡើងនៅក្នុងតំបន់ហ្កាហ្សា និងបន្សល់ទុកនូវលទ្ធផលដូចនៅហ្កាហ្សា»។ ប៉ុន្តែ មិនបានប៉ុន្មានម៉ោងផង ប្រមុខការទ័ពអ៉ីស្រាអែល លោក Herzi Halevi បានប្ដេជ្ញាថា កងទ័ពអ៉ីស្រាអែលនឹងបន្តបង្កើនការទម្លាក់គ្រាប់បែក លើមូលដ្ឋាន របស់ក្រុមហេសបូឡាហ៍ ដោយមិនបន្ធូរដៃទុកឱកាសឱ្យចលនាប្រដាប់អាវុធមួយនេះដកដង្ហើមបានស្រួល ឬអាចប្រមូលផ្ដុំកម្លាំងឡើងវិញនោះទេ។
អ៉ីស្រាអែល បានចាប់ផ្ដើមបើកការវាយប្រហារតាមផ្លូវអាកាសទ្រង់ទ្រាយធំជាបន្តបន្ទាប់ ប្រឆាំងមូលដ្ឋានរបស់ក្រុមហេសបូឡាហ៍ ក្នុងប្រទេសលីបង់ កាលពីថ្ងៃ២៣ ខែកញ្ញាកន្លងទៅនេះ ដោយបានសម្លាប់មនុស្សយ៉ាងហោចណាស់១១៥០នាក់ និងបង្ខំឱ្យមនុស្សច្រើនជាង១លាននាក់ភៀសខ្លួនចេញពីផ្ទះសម្បែង របស់ពួកគេ។ អ៉ីស្រាអែល បច្ចុប្បន្ន កំពុងវាយប្រហារដោយផ្ដោតជាសំខាន់លើមូលដ្ឋានរបស់ហេសបូឡាហ៍នៅភាគខាងត្បូង និងភាគខាងកើតលីបង់ ព្រមទាំងភាគខាងត្បូងនៃរដ្ឋធានីបេរូត៕ដោយ៖ ធីរីណា