សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ស្នងការដ្ឋាននគរបាលខេត្តបាត់ដំបង នៅរសៀលថ្ងៃទី១៩ ខែតុលា ឆ្នាំ២០២៤នេះ បានឱ្យដឹងថា កម្លាំងនគរបាលស្រុកមោងឫស្សី បានឃាត់ខ្លួនជនដៃដល់ម្នាក់ ក្រោយពួកគេហូបចុកជុំគ្នា ដល់ពេលស្រវឹងរំលឹករឿងចាស់ទៅដាស់រឿងថ្មីឱ្យកេីតឡេីង ក្លាយជាហិង្សាម្នាក់ចូលពេទ្យនិងម្នាក់ទៀតចូលគុក។
ប្រភពដដែលបន្តថា ហេតុការណ៍ខាងលេីនេះ បានកេីតឡេីងកាលពីយប់ថ្ងៃទី១៨ ខែតុលា ឆ្នាំ២០២៤ វេលាម៉ោង ១៩ និង៣០នាទីនៅចំណុចព្រៃរនាមក្រោម ស្ថិតក្នុងក្រុមទី១៤ ភូមិកូនខ្លុង ឃុំព្រៃតូច ស្រុកមោងឫស្សី ខេត្តបាត់ដំបង មានករណីហិង្សាដោយចេតនាមានស្ថានទម្ងន់ទោសមួយបានកើតឡើងប្រព្រឹត្តដោយជនសង្ស័យម្នាក់ឈ្មោះ ពៅ ផលគា ភេទប្រុស អាយុ៣៤ឆ្នាំ រស់នៅភូមិតាតុក១ ឃុំមោង ស្រុកមោងឫស្សី ខេត្តបាត់ដំបង (មានមុខរបរស៊ីឈ្នួលឃ្វាលក្របី)នៅចំណុចកើតហេតុប្រដាប់ដោយកូនកាំបិតចុងស្រួច បានធ្វើសកម្មភាពចាក់ទៅលើជនរងគ្រោះឈ្មោះ ខយ ចាន់ ភេទប្រុស អាយុ៤៤ឆ្នាំ រស់នៅភូមិព្រៃដំរី ឃុំព្រៃតូច ស្រុកមោង ឫស្សី ខេត្តបាត់ដំបង(ស្នាក់នៅក្រាំងក្របីចំណុចកើតហេតុ) បណ្ដាលឱ្យរងរបួសកំភួនដៃស្ដាំ០២កន្លែង,កំភួនដៃឆ្វេង០៤កន្លែង, ក្រោមក្លៀកខាង ស្ដាំ០១កន្លែង និងក្រោមក្លៀកខាងឆ្វេង ០១កន្លែង ត្រូវបាននាំយកទៅសង្រ្គោះនៅមន្ទីរពេទ្យ។
ពេលកេីតហេតុនិងទទួលបានព័ត៌មាននេះ ក្រោមយោបល់ដឹកនាំរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តបាត់ដំបង លោកវរសេនីយ៍ឯក ស គឹមឡុង អធិការនគរបាលស្រុកមោងឫស្សី បានដឹកនាំកម្លាំងធ្វេីការឃាត់ខ្លួនជនសង័្សយខាងលេី និងដកហូតវត្ថុតាងនាំមកធ្វេីការសាកសួរនៅអធិការដ្ឋាននគរបាលស្រុក។
តាមរយៈការសាកសួរនេះបានឱ្យដឹងថា មូលហេតុនៃករណីហិង្សានេះគឺបណ្តាលមកពីទំនាស់ពាក្យសម្តីគ្នានៅពេលហូបគ្រឿងស្រវឹងជុំគ្នារួចផ្តេីមរំលឹករឿងចាស់កាលនៅឃ្វាលក្របី ក៏ផ្តើមបង្កេីតទៅជារឿងថ្មីតែម្តងទៅ។
ពេលនេះអធិការដ្ឋាននគរបាលស្រុកមោងឫស្សីបានកសាងសំណុំរឿងបញ្ជូនទៅអនុវត្តតាមនីតិវិធីច្បាប់ហេីយ៕
ដោយ៖ អរុណរះ
