សារព័ត៌មាន នគរវត្ត តែងតែនាំមុខគេជានិច្ច
ប្រទេសឡាវ ៖ គណៈប្រតិភូសភាកម្ពុជា បានអញ្ជើញចូលរួមកិច្ចប្រជុំសមាជិកសភាស្រ្តីអាយប៉ា(WAIPA) នៅរសៀលថ្ងៃទី១៩ ខែតុលា ឆ្នាំ២០២៤ ម្សិលមុិញ ដែលជាថ្ងៃទី៣ នៃដំណើរការមហាសន្និបាតប្រចាំឆ្នាំលើកទី៤៥ របស់អាយប៉ា ដែលរដ្ឋសភាប្រទេសឡាវធ្វើជាម្ចាស់ផ្ទះ។
លោកស្រី ឡោក ខេង ប្រធានគណៈកម្មការសុខាភិបាល សង្គមកិច្ច អតីតយុទ្ធជន យុវនីតិសម្បទា ការងារ បណ្តុះបណ្តាលវិជ្ជាជីវៈ និងកិច្ចការនារី នៃរដ្ឋសភា និងលោកស្រី ចាន់ សុទ្ធាវី ប្រធានគណៈកម្មការនីតិកម្ម និងយុត្តិធម៌ នៃព្រឹទ្ធសភា តំណាងសភាកម្ពុជាចូលរួមកិច្ចប្រជុំនេះ។ លោក សាយសំភូន ភូមិវិហាន (Xaysomphone Phomvihane) ប្រធានរដ្ឋសភាឡាវ និងជាប្រធានអាយប៉ាលើកទី៤៥ បានអញ្ជើញថ្លែងសុន្ទរកថាបើកកិច្ចប្រជុំ។
កិច្ចប្រជុំគណៈកម្មាធិការសមាជិកសភាស្រ្តីអាយប៉ា ពិភាក្សាលើសេចក្តីព្រាងសេចក្តីសម្រេចចំនួនពីរ រួមមាន សេចក្ដីព្រាងសេចក្ដីសម្រេចស្ដីពីការជំរុញការឆ្លើយតបរបស់សភាទៅនឹងយេនឌ័រសម្រាប់ភាពធន់ ការតភ្ជាប់ និងបរិយាបន្នរបស់សហគមន៍អាស៊ាន និងសេចក្ដីព្រាងសេចក្ដីសម្រេចស្ដីពីការលើកកម្ពស់ការលុបបំបាត់អំពើហិង្សាលើស្ត្រី និងក្មេងស្រីក្នុងតំបន់អាស៊ាន ដែលស្នើឡើងដោយសភាប្រទេសវៀតណាម ៕
ដោយ ៖ សិលា
