ប្រទេសសមាជិកអូតង់ចំនួន ៧ ប្រឆាំងសមាជិកភាពអ៊ុយក្រែន

ចែករំលែក៖

អត្ថបទរបស់ Politico បានផ្សាយថា ប្រទេសមួយចំនួនកំពុងធ្វើតាមការដឹកនាំរបស់សហរដ្ឋអាមេរិក និងអាល្លឺម៉ង់ក្នុងការពន្យារពេលសំណើរបស់អ៊ុយក្រែនក្នុងការចូលរួមជាមួយអង្គការណាតូ។
គេហទំព័រ Politico បានដកស្រង់ប្រភពមកថា ក្រុមដ៏ធំមួយនៃសមាជិកណាតូដែលដឹកនាំដោយសហរដ្ឋអាមេរិក និងអាល្លឺម៉ង់មិនចង់ចេញលិខិតអញ្ជើញឲ្យចូលរួមជាមួយអ៊ុយក្រែនក្នុងពេលឆាប់ៗនេះទេ។
កាលពីសប្តាហ៍មុន ប្រធានាធិបតីអ៊ុយក្រែន លោក Volodymyr Zelensky បានបង្ហាញ “ផែនការជ័យជម្នះ” របស់គាត់ ដែលរួមមានសំណើសុំឱ្យត្រូវបានអញ្ជើញជាបន្ទាន់ទៅក្នុងប្លុកយោធាដឹកនាំដោយសហរដ្ឋអាមេរិក។ ទោះជាយ៉ាងណាក៏ដោយ អត្ថបទរបស់ Politico បានដកស្រង់សម្តីមន្ត្រីអាមេរិកនិងអង្គការណាតូ ដែលមិនបញ្ចេញឈ្មោះចំនួនបួននាក់ ដែលនិយាយថា ទីក្រុងប៊ែរឡាំង និងទីក្រុងវ៉ាស៊ីនតោន “ពន្យារពេលដោយចេតនា” សំណើនេះ ដោយបន្ថែមថា “សមាជិកសំខាន់ៗនៃសម្ព័ន្ធភាពមានការព្រួយបារម្ភអំពីការចូលទៅក្នុងសង្រ្គាមជាមួយរុស្ស៊ី” ។
ឯកអគ្គរដ្ឋទូតអាមេរិកប្រចាំអង្គការ NATO លោក Julianne Smith បានប្រាប់ Politico ថា ប្លុកនេះ «មិនទាន់ឈានដល់ចំណុចដែលខ្លួនត្រៀមជាស្រេចក្នុងការផ្តល់ជូន ឬពង្រីកការអញ្ជើញសមាជិកភាពទៅកាន់អ៊ុយក្រែននៅឡើយ»។ ជាមួយគ្នានេះ នាយករដ្ឋមន្ត្រីអាល្លឺម៉ង់ លោក Olaf Scholz ធ្លាប់បាននិយាយថា បេសកកម្មរបស់លោកគឺដើម្បីការពារជម្លោះអ៊ុយក្រែនមិនឱ្យកើនឡើងទៅជាសង្គ្រាមពេញលេញរវាងរុស្ស៊ី និងអង្គការណាតូ ដោយបន្ថែមថាក្រុងកៀវនឹងក្លាយជាផ្នែកមួយនៃប្លុកនៅពេលក្រោយនៅពេលដែលលក្ខខណ្ឌជាក់លាក់ត្រូវបានបំពេញ៕ ដោយ៖ ធីរីណា