ឥណ្ឌានិងចិនបានចាប់ផ្តើមដកទ័ពចេញពីតំបន់មានជម្លោះ

ចែករំលែក៖

កងទ័ពឥណ្ឌា និងចិនបានចាប់ផ្តើមប្រតិបត្តិការដកទ័ពចេញពីទីតាំងជម្លោះចំនួនពីរនៅតាមបណ្តោយបន្ទាត់នៃការគ្រប់គ្រងជាក់ស្តែង (LAC) នៅភាគខាងកើត Ladakh តំបន់វាលទំនាប Demchok និង Depsang ។ប្រភពពីក្រសួងការពារជាតិឥណ្ឌាបានបញ្ជាក់ព័ត៌មាននេះនៅថ្ងៃទី ២៥ ខែតុលា តាមកិច្ចព្រមព្រៀងរវាងភាគីទាំងពីរ កងទ័ពឥណ្ឌាបានចាប់ផ្តើមដកឧបករណ៍យោធាទៅកាន់ទីតាំងខាងក្រោយនៅតាមតំបន់រៀងៗខ្លួន។
កាលពីថ្ងៃទី 21 ខែតុលា ប្រទេសឥណ្ឌាបានប្រកាសថា ខ្លួនបានឈានដល់កិច្ចព្រមព្រៀងជាមួយប្រទេសចិនលើការល្បាតតាមខ្សែបន្ទាត់នៃការគ្រប់គ្រងជាក់ស្តែង (LAC) រវាងប្រទេសទាំងពីរ ដោយបញ្ចប់ភាពជាប់គាំងផ្នែកយោធាដែលមានរយៈពេលជាង 4 ឆ្នាំ។ ថ្លែងនៅក្នុងព្រឹត្តិការណ៍មួយក្នុងទីក្រុង New Delhi នាថ្ងៃទី 24 ខែតុលា រដ្ឋមន្ត្រីការពារជាតិឥណ្ឌា Rajnath Singh បាននិយាយថា ប្រទេសទាំងពីរបានឈានដល់ការឯកភាពគ្នាដើម្បីស្ដារឡើងវិញនូវ “ស្ថានភាពវាល” ដោយឈរលើគោលការណ៍សន្តិសុខស្មើភាពគ្នា និងផលប្រយោជន៍ទៅវិញទៅមក។
លោក Rajnath Singh បានបន្ថែមថា នេះរួមបញ្ចូលទាំងការស្ដារឡើងវិញនូវ “សកម្មភាពល្បាត នៅតំបន់ប្រពៃណី”។ ភាគីឥណ្ឌាបាននិយាយថា ការវិវឌ្ឍក្នុងទំនាក់ទំនងឥណ្ឌា-ចិន គឺដោយសារតែ “អំណាចនៃការចូលរួមកិច្ចសន្ទនាជាបន្តបន្ទាប់ ពីព្រោះមិនយូរមិនឆាប់ ដំណោះស្រាយនឹងលេចឡើង”។
នាថ្ងៃទី ២៣ ខែតុលា នាយករដ្ឋមន្ត្រីឥណ្ឌា Narendra Modi បានជួបពិភាក្សាទ្វេភាគីជាមួយប្រធានាធិបតីចិន Xi Jinping នៅខាងក្រៅកិច្ចប្រជុំកំពូលលើកទី ១៦ នៃក្រុមប្រទេសមានសេដ្ឋកិច្ចកំពុងរីកចម្រើន (BRICS) នៅប្រទេសរុស្ស៊ី។ មេដឹកនាំជាន់ខ្ពស់ឥណ្ឌា-ចិនបានស្វាគមន៍ចំពោះកិច្ចព្រមព្រៀងដែលសម្រេចបានរវាងប្រទេសទាំងពីរស្តីពីការរៀបចំល្បាតតាមបណ្ដោយ LAC នៅភាគខាងកើត Ladakh ។
នាយករដ្ឋមន្ត្រីឥណ្ឌា លោក Modi បាននិយាយថា ការរក្សាសន្តិភាព និងស្ថិរភាពនៅតាមព្រំដែននៅតែជាអាទិភាពសម្រាប់ប្រទេសទាំងពីរ ហើយការជឿទុកចិត្តគ្នាទៅវិញទៅមកនៅតែជាមូលដ្ឋានគ្រឹះនៃទំនាក់ទំនងទ្វេភាគី។ មេដឹកនាំឥណ្ឌាបាននិយាយថា ទំនាក់ទំនងឥណ្ឌា-ចិនមិនត្រឹមតែមានសារៈសំខាន់សម្រាប់ប្រជាជននៃប្រទេសទាំងពីរប៉ុណ្ណោះទេ ថែមទាំងសម្រាប់សន្តិភាព ស្ថិរភាព និងវឌ្ឍនភាពពិភពលោកផងដែរ៕