រថយន្តមួយគ្រឿងបើកមិនប្រយ័ត្នរេចង្កូតទៅបុកក្បាលព្រួញពុះចែកទ្រូងផ្លូវបណ្ដាលឱ្យបាក់ចំនួន៣កង់

ភ្នំពេញ៖ បុរសម្នាក់បើករថយន្ត Mitsubishi Triton មួយគ្រឿងទៅបុកក្បាលព្រួញពុះចែកទ្រូងផ្លូវបាក់ចំនួន៣កង់និងបណ្តាលឱ្យរថយន្ដរងការខូចខាតផ្នែកពីមុខយ៉ាងដំណំ។

ហេតុការណ៍នេះបានកើតឡើងកាលពីវេលាម៉ោង១០ និង១០នាទីយប់ ថ្ងៃទី០៦ ខែវិច្ឆិកា ឆ្នាំ២០២៤ ទីតាំងកើតហេតុស្ថិតតាមបណ្ដោយផ្លូ២៨៩ នៅខាងជើងរបងសាលាបឋមសិក្សាទួលគោក ក្នុងសង្កាត់បឹងកក់ទី១ ខណ្ឌទួលគោក ។

យោងតាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុ គេបានឃើញរថយន្តម៉ាក Mithsubishi Triton ពណ៌ទឹកប្រាក់ ពាក់ស្លាកលេខ ភ្នំពេញ 2N-1560 បើកបរដោយបុរសម្នាក់ រួមដំណើរដោយមនុស្សប្រុសស្រី៣នាក់បានធ្វើដំណើរតាមបណ្តោយផ្លូវ ២៨៩ ទិសដៅពីជើងទៅត្បូង ។ លុះមកដល់ចំណុចកើតហេតុ រថយន្តក៏បានរេចង្កូតទៅបុកក្បាលព្រួញពុះចែកទ្រូងផ្លូវទាំងកំរោល បណ្តាលឲ្យរងការខូចខាតបាក់ចំនួន៣កង់ ចំណែករថយន្តនៅមិនទាន់អស់ល្បឿន ក៏បានបើកទៅម្ខាងផ្លូវឡើងខឿនទល់មុខរបងសាលាបឋមសិក្សាទួលគោកបើកទៅមុខទៀតលែងរួច ដោយរងការខូចខាតមួយចំហៀងខាងមុខ ។

តាមប្រភពពីពលរដ្ឋបានបន្ថែមថា ម្ចាស់រថយន្តព្យាយាមបើកវ៉ាជែងរថយន្តដឹកសំរាម១គ្រឿង តែរថយន្តដឹកសំរាមនោះមិនព្រមឱ្យវ៉ាជែង ទើបរថយន្តរបស់គាត់ចូលគន្លងកណ្តាលជិតដល់របាំងថ្មបាត់ទៅហើយ ទើបបន្ថយល្បឿនមិនទាន់បណ្តាលឲ្យបុកទ្រូងផ្លូវពេញទំហឹងតែម្តង ។

ក្រោយកើតហេតុសមត្ថកិច្ចមូលដ្ឋានបានទាក់ទងទៅកាន់សមត្ថកិច្ចជំនាញចរាចរណ៍ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់៕​

ដោយ​ ៖​ ភារ៉ា​ ដង្កោ