🔥អគ្គិភ័យឆាបឆេះផ្ទះថ្មនៅស្រុកមេមត់បណ្តាលឲ្យមនុស្សប្រុសស្រី៤នាក់រងរបួសធ្ងន់ស្រាល

ខេត្តត្បូងឃ្មុំ៖ អគ្គិភ័យបានឆាបឆេះផ្ទះថ្មកំពស់៣ជាន់ បណ្តាលឲ្យម្ចាស់ផ្ទះរបួសធ្ងន់ស្រាលចំនួន៤នាក់ ។ហេតុការណ៍នេះបង្កឲ្យមានកាតភ្ញាក់ផ្អើលឡើងកាលពីយប់ថ្ងៃទី៦ ខែវិច្ឆិកា  ឆ្នាំ២០២៤ ចំណុចផ្ទះក្នុងភូមិជាំទ្រៀក ឃុំត្រមូង ស្រុកមេមត់ ខេត្តត្បូងឃ្មុំ។

បើតាមការឲ្យដឹងពីនគរបាលស្រុកមេមត់ថា ប៉ុស្តិ៍នគរបាលរដ្ធបាលត្រមូងបានទទួលព័ត៌មានពីប្រជាពលរដ្ធភូមិជាំទ្រៀក ឃុំត្រមូងថា មានគ្រោះថ្នាក់អគ្គិភ័យ១កើតឡើងនៅចំណុចភូមិជាំទ្រៀក ឃុំត្រមូង ស្រុកមេមត់ មានភ្លើងឆេះផ្ទះរបស់ឈ្មោះ ហុក សារិទ្ធ ភេទប្រុស អាយុ៤២ឆ្នាំ រស់នៅភូមិជាំទ្រៀក ឃុំត្រមូង ស្រ្កមេមត់ ខេត្តត្បូងឃ្មុំ បណ្តាលអោយឆេះផ្ទះថ្មបីជាន់ សង់អំពីថ្មទំហំ៥មX២៦ម ប្រក់ក្បឿង ពិដានឈើ បណ្តាលអោយខូចខាតទ្រព្យសម្បត្តិរួមមាន. ខូចខាតផ្ទះ១ខ្នងបីជាន់ ម៉ូតូ១គ្រឿង គ្រឿងសង្ហារឹមមួយចំនួនផងដែរ ។

ករណីអគ្គិភ័យនេះដែរបណ្តាលឲ្យមនុស្សប្រុស្រី៤នាក់ រងរបួស ក្នុងនោះធ្ងន់ចំនួន២នាក់. ១-ឈ្មោះ ហុក សារិទ្ធ ភេទប្រុស អាយុ៤២ឆ្នាំ ជាតិខ្មែរ នៅភូមិជាំទ្រៀក ឃុំត្រមូង ស្រុកមេមត់ ជាម្ចាស់ផ្ទះ ។ ២-ឈ្មោះ លី ស្រីហួង ភេទស្រី អាយុ៣៥ឆ្នាំ ជាតិខ្មែរនៅភូមិ ឃុំ ជាមួយគ្នា ត្រូវជាប្រពន្ធ របួសស្រាលចំនួន២នាក់ ប្រុសស្រាល ជាកូនម្ចាស់ផ្ទះ ។

ហើយករណីឆេះនេះដែរ ត្រូវបានកម្លាំងរដ្ឋបាលស្រុកមេមត់ និងកម្លាំងនៃអធិការដ្ឋាននគរបាលស្រុកមេមត់ជួយពន្លត់យ៉ាងទាន់ហេតុការណ៍ ដោយប្រើរយៈពេល២ម៉ោង និងប្រើរថយន្តពន្លត់អគ្គីភ័យចំនួន៣គ្រឿងផងដែរ ។

សមត្ថកិច្ចបានឲ្យដឹងទៀតថា មូលហេតុដែលបណ្តាលឲ្យមានអគ្គិភ័យនេះឡើងមកពីផ្ទុះហ្គាសដាំបាយ ហើទំហំនៃការខូចខាតទ្រព្យសម្បត្តិមិនទាន់ដឹងថាអស់ទឹកប្រាក់ប៉ុន្មាននោះទេ ដោយជំនាញកំពុងស្រាវជ្រាវបន្ត៕

ដោយ៖ជ្រោយពេជ្រ