🔥ទុកកូនតូចនៅចាំផ្ទះម្នាក់ឯងហើយសង្ស័យលេងភ្លើងបង្កជាអគ្គិភ័យឆាបឆេះផ្ទះនៅក្រុងព្រះសីហនុ

ខេត្តព្រះសីហនុ ៖ ក្មេងប្រុសតូចម្នាក់ឪពុកម្តាយឱ្យនៅចាំផ្ទះម្នាក់ឯង ហើយសង្ស័យតែលេងភ្លើងទើបបង្កជាអគ្គិភ័យឆាបឆេះផ្ទះ ផ្អើលអ្នកជិតខាង សមត្ថកិច្ច រថយន្តពន្លត់អគ្គិភ័យចេញទៅជួយអន្តរាគមន៍សង្គ្រោះដោយយកក្មេងចេញពីលើផ្ទះ និងពន្លត់ភ្លើងឱ្យរលត់ទៅវិញភ្លាមៗ ។

    ហេតុការណ៍នេះកើតឡើងកាលពីម៉ោង៥និង២៥នាទីល្ងាចថ្ងៃទី១៨ ខែវិច្ឆិកា ឆ្នាំ២០២៤ នៅសង្កាត់លេខ៣ ក្រុងព្រះសីហនុ ខេត្តព្រះសីហនុ ។

   សមត្ថកិច្ចបានឱ្យដឹងថា ផ្ទះដែលត្រូវអគ្គិភ័យឆាបឆេះនេះសាងសង់អំពីថ្មក្រោម ខាងលើគ្រោងដែកជញ្ជាំងរៀបឥដ្ឋ ប្រក់ស័ង្កសី ទំហំ៤ម៉ែត្រx៨ម៉ែត្រ ភ្លើងឆេះនៅជាន់ខាងលើ ខូចខាតទ្រព្យសម្បត្តិមួយចំនួន បន្ទាប់ពីកម្លាំងសមត្ថកិច្ច រថយន្តពន្លត់អគ្គិភ័យជួយទាន់ ។

   ប្រភពព័ត៌មាននៅកន្លែងកើតហេតុបានឱ្យដឹងថា មុនពេលកើតហេតុ ម្ចាស់ផ្ទះជាឪពុកម្តាយបានទុកកូនប្រុសតូចនៅលើផ្ទះម្នាក់ឯង ហើយពួកគាត់ចេញទៅបាត់ សង្ស័យតែកូនតូចលេងភ្លើងទើបបង្កជាអគ្គិភ័យផ្អើលដល់អ្នកជិតខាង សមត្ថកិច្ច រថយន្តពន្លត់អគ្គិភ័យចេញទៅជួយអន្តរាគមន៍ភ្លាមៗ រំដោះក្មេងតូចបានចុះចេញពីលើផ្ទះ និងបាញ់ទឹកពន្លត់ភ្លើងឱ្យរលត់ទៅវិញភ្លាមៗ មិនរាលដាលដល់ផ្ទះទាំងមូល និងផ្ទះជិតខាងឡើយ គ្រាន់តែខូចខាតទ្រព្យសម្បត្តិក្នុងផ្ទះជាន់លើមួយចំនួន។ សមត្ថកិច្ចជំនាញបន្តធ្វើការស្រាវជ្រាវបន្ថែមទៀត ។

    ជាមួយគ្នានោះដែរសមត្ថកិច្ច អាជ្ញាធរមូលដ្ឋានបានអំពាវនាវដល់មាតា បិតា អាណាព្យាបាល មានកូនចៅតូចៗ កុំទុកឱ្យនៅចាំផ្ទះម្នាក់ឯង ជៀសវាងជួបបញ្ហាណាមួយប្រឈមគ្រោះថ្នាក់បែបនេះទៀត ៕

ដោយ៖ ជ្រោយពេជ្រ