សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បើករថយន្តឡង់គ្រីស័ររេចង្កូតជ្រុលទៅបុកក្បាលព្រួញថ្មពុះចែកទ្រូងផ្លូវទាំងកំរោលស្របពេលមេឃកំពុងតែធ្លាក់ភ្លៀងបណ្តាលឱ្យបាក់រងការខូចខាតអស់៦កង់ ចំណែករថយន្ដរងការខូចខាតយ៉ាងដំណំ ។ ហេតុការណ៍នេះបានកើតឡើងកាលពីវេលាម៉ោង១១និង៤០នាទីយប់ ថ្ងៃទី១៣ ខែធ្នូ ឆ្នាំ២០២៤នៅតាមបណ្តោយមហាវិថីសហព័ន្ធរុស្សុី ស្ថិតនៅក្នុងមូលដ្ឋាននៃសង្កាត់ទឹកថ្លា ខណ្ឌសែនសុខ រាជធានីភ្នំពេញ ។
យោងតាមប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ គេបានឃើញរថយន្តឡង់គ្រីស័រ ពណ៌ត្រេអុី១គ្រឿង ពាក់ផ្លាកលេខ នគរបាល2.6959 បើកបរចុះពីលើស្ពានអាកាស៧មករា ក្នុងទិសដៅពីកើតទៅលិចពេលមេឃកំពុងធ្លាក់ភ្លៀង និងផ្លូវរអិល ។ លុះមកដល់ចំណុចកើតហេតុទល់មុខក្រុមហ៊ុនប៊ូយុង រថយន្តខាងលើក៏បានរេចង្កូតទៅបុកក្បាលព្រួញថ្មពុះចែកទ្រូងផ្លូវបាក់បែកអស់ចំនួន៦កង់ បណ្តាលឱ្យរថយន្តរងការខូចខាតផ្នែកខាងមុខខាងឆ្វេងយ៉ាងដំណំមិនអាចបន្តដំណើរទៅមុខទៀតបាន។
ក្រោយកើតហេតុសមត្ថកិច្ចមូលដ្ឋាន បានទាក់ទងទៅកាន់សមត្ថកិច្ចជំនាញចរាចរណ៍ដើម្បីចុះមកធ្វើការវាស់វែង និងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំម្ចាស់រថយន្តចូលខ្លួនទៅដោះស្រាយតាមនីតិវិធីច្បាប់ នៅពេលក្រោយ៕
ដោយ ៖ ភារ៉ា ដង្កោ
