🔴មិនមែនសន្មត់ថា ! អ្នកមានមុខមាត់ជាបុគ្គលល្អទេ ទីបំផុតក្លាយទៅជាជនប្រព្រឹត្តបទឧក្រិដ្ឋសោះ

ភ្នំពេញ ៖ បើយោងតាមឯកសារ មានជនជាតិ សិង្ហបុរី មួយរូប គឺ លោក Phua Gek Seng បាន ដាក់ពាក្យបណ្ដឹង ប្ដឹងឈ្មោះ ហេង សិទ្ធី ពីបទ បរិហារកេរ្តិ៍ និង គំរាមកំហែង ទារប្រាក់ !

តាមខ្លឹមសារ ក្នុងពាក្យបណ្ដឹង ដែលអង្គភាពមជ្ឈមណ្ឌលព័ត៌មាន «នគរវត្ត» ទទួលបាននៅល្ងាចថ្ងៃទី១៥ ខែធ្នូ ឆ្នាំ២០២៤ បានបញ្ជាក់ថា ៖ នៅថ្ងៃ ទី ១៨ ខែវិច្ឆិកា ឆ្នាំ ២០២៤ ឈ្មោះ ហេង សិទ្ធី បាន ផ្ញេីសារជំរឹតទារលុយជនរងគ្រោះ ចំនួន ២លានដុល្លារ ដោយទុកពេល អោយជនរងគ្រោះ ៣០នាទី ដេីម្បី វេរលុយទៅ ។

ដោយជនរងគ្រោះ មិនព្រមប្រគល់លុយទៅតាមការជំរឹតទារ របស់ ឈ្មោះ ហេង សិទ្ធី នៅថ្ងៃទី ២១ ខែ វិច្ឆិកា ឆ្នាំ ២០២៤ ឈ្មោះ ហេង សិទ្ធី បាន បង្ហោះ រូបថត ជនរងគ្រោះ នៅលេី បណ្ដាញសង្គម ហ្វេសប៊ុក និង TikTok ធ្វើការ បរិហារកេរ្តិ៍ ចោទប្រកាន់ មួលបង្កាច់ ជនរងគ្រោះ ថារកស៉ីហ្គេមអនឡាញ ខុសច្បាប់ទៅវិញ ។

ដោយមេីលឃេីញ ទង្វើ របស់ ឈ្មោះ ហេង សិទ្ធី ធ្វើ អោយប៉ះពាល់ដល់ កិត្តិយស និង សេចក្ដី ថ្លៃថ្នូរ របស់ខ្លួន នៅថ្ងៃទី ២២ ខែ វិច្ឆិកា ឆ្នាំ ២០២៤ ជនរងគ្រោះបានដាក់ ពាក្យបណ្ដឹងមកស្នងការដ្ឋាននគរបាល រាជធានីភ្នំពេញ ដើម្បីចាត់ការតាមច្បាប់ ។  

រឿងឧកញ៉ា high show ហេង សិទ្ធី ដែល បង្ហោះ អួតយន្តហោះឯកជនថាជារបស់ខ្លួននោះ ធាតុពិតជាក់ស្ដែង មិនមែនជាយន្តហោះផ្ទាល់ខ្លួនរបស់គាត់ទេ ។  ប្រភពមួយទៀតបង្ហេីបប្រាប់ថា គោរមងារ អ្នកឧកញ៉ា របស់ ឈ្មោះ ហេង សិទ្ធី ក៏ ត្រូវបានបញ្ចប់ផងដែរ ។  ពេលនេះឈ្មោះ ហេង សិទ្ធី កំពុងរត់គេចខ្លួនទៅក្រៅប្រទេស ។

យោងតាមព្រះរាជក្រឹត្យ ព្រះករុណាព្រះបាទសម្តេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា បានចេញព្រះរាជក្រឹត្យ បញ្ចប់ គោរមងារ អ្នកឧកញ៉ា ពី អ្នកឧកញ៉ា ហេង សិទ្ធី ! នៅថ្ងៃទី២ ធ្នូ ឆ្នាំ២០២៤ (យោងតាមសេចក្ដីក្រាបបង្គំទូលថ្វាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា) ។

ចំពោះព័ត៌មានលម្អិតអង្គភាពមជ្ឈមណ្ឌលព័ត៌មាន«នគរវត្ត» នឹងផ្សាយតាមពេលក្រោយ ៕ 

ដោយ ៖ សុខ ខេមរា