សារព័ត៌មាន នគរវត្ត តែងតែនាំមុខគេជានិច្ច
ក្លិបបិសាចក្រហម Manchester United នឹងសម្លឹងរកការនាំយកមូលនិធិពីការលក់កីឡាករក្នុងខែមករា ហើយនឹងទទួលយកការផ្ទេរដ៏សមរម្យមួយសម្រាប់ខ្សែប្រយុទ្ធ Marcus Rashford ទោះបីជាការដេញថ្លៃទំនងជានឹងមកដល់នៅរដូវក្តៅក្រោយក៏ដោយ។
Man Utd កំពុងសម្លឹងមើលការបន្ថយកីឡាករដែលមានអាយុជាមធ្យម ក្នុងការងាកទៅចុះហត្ថលេខាលើកីឡាករវ័យក្មេងដែលមានការសន្យាដូចជា Diego Leon និងដកអ្នកដែលមិនជាផ្នែកមួយនៃផែនការរយៈពេលវែងរបស់ក្លិប។ មានការទទួលយកថា ការលក់កីឡាករនឹងត្រូវបានទាមទារសម្រាប់ក្លិបបិសាចក្រហមដើម្បីប្រជែងកៅអី Champions League ម្តងទៀត ហើយចុងក្រោយប្រជែងដណ្តើមពាន។
ដើម្បីមានភាពខ្លាំងក្លានៅក្នុងទីផ្សារក្នុងរយៈពេលខ្លីក្លិបនឹងត្រូវស្វែងរកថ្លៃសេវាពីកន្លែងណាមួយ ជាពិសេសដោយសារតែមានភាពតឹងតែងពីច្បាប់ប្រាក់ចំណេញ និងនិរន្តរភាពរបស់ក្លិប។ ទាក់ទងនឹង Rashford នេះមិនមែនជាស្ថានភាពដែលគាត់ត្រូវបានគេចុះបញ្ជីជាផ្លូវការនោះទេ ប៉ុន្តែដោយសារឥឡូវនេះគាត់មានអាយុ២៧ឆ្នាំហើយ Man Utd កំពុងស្ថិតក្នុងការចរចារជាមួយគាត់ជាមួយនឹងកិច្ចសន្យារហូតដល់ឆ្នាំ២០២៨ ប្រសិនបើការផ្តល់ជូនត្រឹមត្រូវចូលមក បិសាចក្រហមនឹងពិចារណាយ៉ាងយកចិត្តទុកដាក់។
តម្លៃខ្លួនរបស់គាត់នឹងអាស្រ័យលើកត្តាមួយចំនួន គេយល់ថា Man Utd នឹងទាមទារអប្បបរមា៤០ទៅ៤៥លានផោនដើម្បីពិចារណាការលក់ខ្សែប្រយុទ្ធរូបនេះផងដែរ។ ផ្ទុយពីរបាយការណ៍ Rashford មិនត្រូវបានបង្ខំឱ្យចេញពីក្លិបទេ។ គ្រូបង្វឹកថ្មីលោក Amorim បានដកគាត់ចេញពីក្រុមសម្រាប់ការប្រកួត Manchester Derby រួមជាមួយ Alejandro Garnacho ប៉ុន្តែអ្នកចាត់ការរូបនេះចង់ឃើញពីប្រតិកម្មផងដែរ។ យ៉ាងណាមិញ Rashford បានចាប់ផ្តើមការប្រកួតចំនួន២ក្នុងចំណោម៥ប្រកួតនៅ Premier League ក្រោមការដឹកនាំរបស់លោក Amorim ដោយស៊ុតបញ្ចូលទីបាន២គ្រាប់។
លោក Amorim នៅតែវាយតម្លៃក្រុមរបស់គាត់ ហើយការសម្រេចចិត្តដក Rashford ចេញពី Manchester Derby មិនមែនជាការចាប់ផ្តើមនៃការបញ្ចប់នោះទេ ព្រោះគ្រូបង្វឹករបស់ Man Utd រូបនេះនឹងរំពឹងថានឹងឃើញការឆ្លើយតបជាវិជ្ជមាន។ អ្វីដែលក្រមរបស់ Man Utd កំពុងធ្វើគឺអនុញ្ញាតឱ្យលោក Amorim ផ្លាស់ប្តូរវប្បធម៌របស់ក្លិបតាមការជ្រើសរើសក្រុម និងមធ្យោបាយផ្សេងទៀត។
លោក Amorim មានអំណាចដើម្បីធ្វើការសម្រេចចិត្តទាំងឡាយ ទោះបីជាគាត់មិនមានសិទ្ធិជ្រើសរើសបុគ្គលិកផ្លូវការដូចអតីតគ្រូបង្វឹកលោក Erik ten Hag ក៏ដោយ។ គាត់បានបញ្ជាក់យ៉ាងច្បាស់ថា ប្រសិនបើកីឡាករមិនបង្ហាញអាកប្បកិរិយាត្រឹមត្រូវក្នុងការហ្វឹកហាត់ ពួកគេនឹងមិនត្រូវបានជ្រើសរើសឡើយ ទោះបីជាកេរ្តិ៍ឈ្មោះរបស់ពួកគេធំប៉ុណ្ណាក៏ដោយ ហើយការសង្ឃឹមនេះគឺបង្កើតអារម្មណ៍ថាគាត់រឹងមាំ ប៉ុន្តែយុត្តិធម៌។
ទាក់ទងនឹងការចាកចេញដ៏មានសក្តានុពលសម្រាប់ Rashford ប្រភពបានឲ្យដឹងថា ការផ្លាស់ប្តូរទំនងជាសម្រាប់គាត់នៅរដូវក្តៅក្រោយជាជាងនៅក្នុងខែមករា បើទោះបីជាការចាកចេញចុងក្រោយនេះមិនអាចត្រូវបានគេរំពឹងទាំងស្រុងប្រសិនបើការផ្តល់ជូនអាចទទួលយកបាន។
អ្នកដែលជិតស្និទ្ធនឹង Rashford បានបដិសេធមិនធ្វើអត្ថាធិប្បាយអំពីស្ថានភាព ឬអនាគតរបស់គាត់ ក្រៅពីការបញ្ជាក់ពីចំណុចត្រឹមត្រូវដែលកីឡាករពីរនាក់ត្រូវបានដកចេញពេលប្រកួតជាមួយ Manchester City ហើយប្រហែលជា Garnacho មិនសូវមានការរំពឹងច្រើនថានឹងចាកចេញនោះទេ។
ក្លិប Paris Saint-Germain និងក្លិបមកពី Saudi Pro League ត្រូវបានទាក់ទងយ៉ាងខ្លាំងជាមួយ Rashford ក្នុងប៉ុន្មានសប្តាហ៍ និងខែថ្មីៗនេះ។ ក្រុមជើងឯក Ligue 1 បានពិភាក្សាគ្នាយ៉ាងហោចណាស់ពីរលើកជាមួយ Rashford ទាំងមុន និងក្រោយពេលដែលគាត់បានចុះកុងត្រាថ្មីនៅ Old Trafford ក្នុងខែកក្កដា ឆ្នាំ២០២៣។ ទាំងពីរលើកនេះក្លិបម្ចាស់ជើងឯកបារាំងមានអារម្មណ៍ថា ខ្សែប្រយុទ្ធរូបនេះត្រូវបានដាក់ជាអាទិភាព ប៉ុន្តែមិនមានគម្រោងជំរុញអ្វីនោះទេ លុះត្រាតែ Rashford ប្រាប់ PSG ថាគាត់ចង់ចាកចេញ។
លោក Luis Campos ទីប្រឹក្សាកីឡារបស់ក្លិប PSG ដឹងពីស្ថានភាពរបស់ Rashford ប៉ុន្តែប្រសិនបើកិច្ចព្រមព្រៀងមួយត្រូវបានធ្វើឡើងជាមួយ PSG ប្រធាន Nasser Al-Khelaifi នឹងដឹកនាំការពិភាក្សានៅទីបំផុត ខណៈដែលគាត់មានទំនាក់ទំនងវិជ្ជមានជាមួយ Rashford ។
ទន្ទឹមនឹងនេះដែរ ភាគីខាងក្រុម Al-Qadsiah និង Al-Ittihad នៅលីកកំពូល Saudi Pro League ក៏ធ្លាប់បានបង្ហាញពីចំណាប់អារម្មណ៍លើ Rashford ផងដែរ តាមរយៈការជូនដំណឹងរបស់ក្លិបទាំងពីរនេះ។ មន្ត្រីក្លិបរបស់អារ៉ាប៊ីសាអ៊ូឌីតជឿជាក់ថា Rashford នឹងមិនពិចារណាការផ្លាស់ប្តូរទៅកាន់ប្រទេសអារ៉ាប៊ីសាអ៊ូឌីតរហូតដល់ឆ្នាំ២០២៦ ក្នុងពេលឆាប់បំផុត ខណៈដែលគាត់ចង់បន្តនៅ Manchester United ឬនៅអឺរ៉ុបដើម្បីផ្តល់ឱកាសដ៏ល្អបំផុតសម្រាប់កៅអីជម្រើសជាតិអង់គ្លេសនៅ World Cup។
Rashford ប្រឈមមុខនឹងភាពមិនប្រាកដប្រជាខ្លះនៃឆ្នាំ២០២៥ ប៉ុន្តែលោក Amorim នៅតែរៀបចំផែនការជាមួយ និងមិនមែនដោយគ្មានគាត់នោះទេ ខណៈដែលគាត់នៅតែអាចបន្តក្នុងជម្រើស១១នាក់ចំពេលមានភាពស្រពិចស្រពិលចំពោះតារាក្នុងក្រុមមួយចំនួនផងដែរ៕
ដោយ៖ ភារៈ(រូបភាព ៖ teamtalk/guardian)
