អុីស្រាអែលវាយប្រហារតំបន់ហ្គាហ្សាស្ទ្រីប សម្លាប់អ្នកកាសែត៥នាក់

កាលពីថ្ងៃទី 26 ខែធ្នូ យោងតាម CNN មន្ទីរពេទ្យមួយនៅហ្គាហ្សាបាននិយាយថា អ្នកកាសែត 5 នាក់ត្រូវបានសម្លាប់នៅក្នុងការវាយប្រហារតាមអាកាសរបស់អុីស្រាអែលកាលពីយប់ថ្ងៃទី 25 ខែធ្នូ (ម៉ោងក្នុងតំបន់) នៅតំបន់ហ្គាហ្សាស្ទ្រីប។
រថយន្តដែលគ្រប់គ្រងដោយទូរទស្សន៍ Al-Quds Today ត្រូវបានចតនៅខាងក្រៅមន្ទីរពេទ្យ Al-Awda នៅពេលដែលវាត្រូវបានវាយប្រហារ។
អ្នកកាសែត ៥នាក់ រួមមាន Ayman Al-Jadi, Faisal Abu Al-Qumsan, Mohammed Al-Lada’a, Ibrahim Al-Sheikh Ali និង Fadi Hassouna សុទ្ធតែបានដេកនៅក្នុងរថយន្ត នៅពេលដែលការវាយប្រហារតាមអាកាសបានកើតឡើង។ ទូរទស្សន៍ Al-Quds Today គឺជាប៉ុស្តិ៍ទូរទស្សន៍មួយដែលមានទំនាក់ទំនងជាមួយក្រុមសកម្មប្រយុទ្ធប៉ាឡេស្ទីនអ៊ិស្លាមជីហាត។
ទូរទស្សន៍ Al-Quds Today បានថ្កោលទោសការវាយប្រហារនេះ ហើយបាននិយាយថា មនុស្ស 5 នាក់បានស្លាប់ខណៈពេលដែលកំពុងបំពេញបេសកកម្មផ្នែកសារព័ត៌មាន និងមនុស្សធម៌។
កាលពីដើមខែនេះ ការវាយប្រហារតាមអាកាសរបស់អុីស្រាអែលនៅតំបន់ហ្គាហ្សាបានសម្លាប់អ្នកថតរូប Al-Jazeera ។ យោងតាមមន្ទីរពេទ្យ Al-Awda ជនរងគ្រោះគឺ Ahmad Al-Louh អាយុ 39 ឆ្នាំ ដែលត្រូវបានសម្លាប់នៅក្នុងការវាយប្រហារតាមអាកាសមួយសំដៅទៅលើការិយាល័យការពារជនស៊ីវិលក្នុងតំបន់ Nuseirat Camp នៅកណ្តាលហ្គាហ្សា។
យោងតាមគណៈកម្មាធិការការពារអ្នកសារព័ត៌មាន (CPJ) ចាប់ពីខែកក្កដា ឆ្នាំ 2023 រហូតមកដល់ពេលនេះ អ្នកកាសែត 141 នាក់បានស្លាប់នៅក្នុងតំបន់មជ្ឈិមបូព៌ា៕

ដោយ៖ ធីរីណា(រូបថត​៖ Saigon)