🔥អគ្គិភ័យ​លេបត្របាក់​ផ្ទះឈើលើថ្មក្រោម ០១ខ្នង, និងហាងលក់ទូរស័ព្ទចំនួន ០២ហាង អស់ទាំងស្រុង

ភ្នំពេញ​៖​ ស្នងការដ្ឋាន​នគរបាល​រាជធានី​ភ្នំពេញ​ នៅព្រឹក​ថ្ងៃ​សុក្រ​ទី​២៧​ ខែធ្នូ​ ឆ្នាំ​២០២៤នេះ​ បានឱ្យដឹងថា​ មានករណីអគ្គិភ័យមួយ​កន្លែងកើតឡើងនៅវេលាម៉ោង២០:០៥នាទីយប់ ថ្ងៃទី២៦ ខែធ្នូ ឆ្នាំ២០២៤ ស្ថិត​ត្រង់​ចំណុច ផ្លូវ៣៣BT ក្រុម២ ភូមិសន្សំកុសល៣ សង្កាត់បឹងទំពន់១ ខណ្ឌមានជ័យ​ បណ្ដាលឱ្យ​ផ្ទះឈើលើថ្មក្រោម ០១ខ្នង, និងហាងលក់ទូរស័ព្ទចំនួន ០២ហាង អស់ទាំងស្រុង និងហាងលក់ទូរស័ព្ទជាច្រេីនផងដែរ។ 

ហេតុការណ៍​អគ្គិភ័យឆាបឆេះនេះ សមត្ថកិច្ចកំពុងស្រាវជ្រាវ។ អគ្គិភ័យនេះធ្វើឱ្យឆេះផ្ទះឈើលើថ្មក្រោមចំនួន ០១ខ្នង, ហាងលក់ទូរស័ព្ទចំនួន ០២ហាង អស់ទាំងស្រុង រួមទាំងទូរស័ព្ទ, គ្រឿងសម្ភារទូរស័ព្ទអស់មួយចំនួនធំ ហើយរាលដាលឆេះហាងលក់ទូរស័ព្ទចំនួន ០១ហាងខូចខាតដំបូល, ពិដាន និងឆេះរោលដល់ផ្ទះថ្មចំនួន ០១ខ្នង (ខូចខាតអស់១០%)។

 នៅវេលាម៉ោង២១:៥០នាទីយប់ ថ្ងៃទីខែឆ្នាំដដែល អគ្គិភ័យនេះត្រូវបានពន្លត់បានទាំងស្រុង ដោយប្រើប្រាស់រថយន្តការិយាល័យអគ្គិភ័យរាជធានីភ្នំពេញ ចំនួន ១៨គ្រឿង ប្រេីប្រាស់ទឹកអស់ចំនួន ១៨ឡាន ស្មើរនឹង  ៧២ម៉ែត្រគូប, រថយន្តអគ្គិភ័យក្រសួងមហាផ្ទៃចំនួន ០៣គ្រឿងពុំបាន ប្រើប្រាស់ទឹក, រថយន្តអគ្គិភ័យកងរាជអាវុធហត្ថចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៤ម៉ែត្រគូប, រថយន្តអគ្គិភ័យក្រមហ៊ុនស្រាបៀរកម្ពុជាចំនួន ០១គ្រឿង ប្រើប្រាស់ទឹកអស់ចំនួន ០១ឡាន ស្មើនឹង ០៦ម៉ែត្រគូប, រថយន្តអគ្គិភ័យOCICទីក្រុងកោះពេជ្រចំនួន ០៣គ្រឿង ប្រើប្រាស់ទឹកអស់ចំនួន ០៣ឡាន ស្មើនឹង ១២ម៉ែត្រគូប៕

ដោយ​៖ តារា​