សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បើតាមការឱ្យនិយមន័យទូទៅ លិខិតបញ្ជាក់កិច្ចសន្យាជួលដី ផ្ទះ តូប យានជំនិះ ជាលិខិតដែលមានការចុះហត្ថលេខាជាផ្លូវការ និងទទួលស្គាល់ដោយអាជ្ញាធរឃុំ សង្កាត់ ចំពោះសិទិ្ធ និងកាតព្វកិច្ចពាក់ព័ន្ធនឹងការជួលដី ផ្ទះ តូប ឬយានជំនិះ។ លិខិតបញ្ជាក់នេះមិនត្រឹមតែបញ្ជាក់ពីការសំរេចកិច្ចសន្យាជួលទេ ប៉ុន្តែក៏អាចដាក់លក្ខខណ្ឌនានាសម្រាប់ការប្រើប្រាស់ទ្រព្យសម្បត្តិនោះ ដូចជារយៈពេលការជួល តំលៃសំរាប់ការជួល ការទូទាត់ប្រាក់ និងកាតព្វកិច្ចផ្សេងៗទៀតដែលមានសារៈសំខាន់ក្នុងកិច្ចសន្យាជួល។
អ្នកនាំពាក្យរងក្រសួងមហាផ្ទៃ លោកបណ្ឌិត ទូច សុឃៈ បានឱ្យដឹងថា កន្លងមក ម្ចាស់ទ្រព្យ និងអ្នកជួល ច្រើនតែធ្វើឯកសារជាមួយគ្នា ដោយមានសាក្សីម្នាក់ ឬច្រើនជាងនេះ ដោយមិនមានការទទួលស្គាល់ផ្លូវការពីអាជ្ញាធរឃុំ សង្កាត់ឡើយ។ ប៉ុន្តែនៅពេលមានករណីទំនាស់កិច្ចសន្យាណាមួយកើតឡើង ពួកគាត់ក៏នាំបញ្ហានោះមកប្ដឹងគ្នានៅសាលាឃុំ សង្កាត់ ដែលករណីនេះអាចនាំឱ្យមានការពិបាកដោះស្រាយ។
ដើម្បីចៀសវាងបញ្ហានេះ លោកបណ្ឌិត ទូច សុឃៈ បានផ្តល់ការពន្យល់ដោយខ្លីថា យោងតាមប្រកាសអន្តរក្រសួងលេខ ១៤៣៤២ប្រក ចុះថ្ងៃទី ២៩ ខែធ្នូ ឆ្នាំ២០១៦ ប្រជាពលរដ្ឋម្ចាស់ទ្រព្យ និងអ្នកជួល ត្រូវទៅស្នើសុំសេវាលិខិតជួលនៅច្រកចេញចូលតែមួយឃុំ សង្កាត់ ដោយភ្ជាប់មកជាមួយនូវឯកសាររួមមាន អត្តសញ្ញាណប័ណ្ណ (ថតចម្លង) របស់ភាគីទាំងសងខាង និងកិច្ចសន្យាជួលដី ផ្ទះ តូប ឬយានជំនិះ។
លោកបណ្ឌិតបានបន្ថែមថា ផ្អែកតាមប្រកាសអន្តរក្រសួងខាងលើ សម្រាប់ឃុំ-សង្កាត់ក្នុងខេត្តរតនគីរី មណ្ឌលគីរី ស្ទឹងត្រែង ព្រះវិហារ និងខេត្តឧត្តរមានជ័យ សេវាលិខិតបញ្ជាក់កិច្ចសន្យាជួលដី ផ្ទះ តូប យានជំនិះ មានតម្លៃ៥.០០០រៀល ចំណែករាជធានី ខេត្តផ្សេងមានតម្លៃ១០.០០០រៀល ដោយមានរយៈពេល៣ថ្ងៃ នៃថ្ងៃធ្វើការដូចគ្នា ៕
ដោយ ៖ លោក សេង បូលីន មន្រ្តីព័ត៌មានក្រុមអ្នកនាំពាក្យក្រសួងមហាផ្ទៃ
