សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ស្ពឺ៖ ជនសង្ស័យម្នាក់ជាមុខសញ្ញាជួញដូរគ្រឿងញៀនយ៉ាងសកម្មត្រូវបានកម្លាំងនគរបាលស្រុកសំរោងទង ធ្វើការឃាត់ខ្លួនបាន ដកហូតម្សៅក្រាមពណ៌សថ្លាចំនួន៤៤កញ្ចប់។
ការឃាត់ខ្លួនមុខសញ្ញាជួញដូរគ្រឿងញៀនបានកាលពីវេលាម៉ោង០៣និង៤០នាទីរសៀលថ្ងៃទី០៣ ខែមករា ឆ្នាំ២០២៥ នៅចំណុចអូរក្រាំងអំបិល ភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ។
នគរបាលស្រុកសំរោងទងបាននិយាយឱ្យដឹងថា នៅមុនពេលឃាត់មុខសញ្ញាជួញដូរគ្រឿងញៀនខាងលើ គឺកម្លាំងនគរបាលផ្នែកប្រឆាំងគ្រឿងញៀនស្រុកសំរោងទង បានធ្វើការឃាត់ខ្លួនមុខសញ្ញាជួញដូរគ្រឿងញៀនបានចំនួនម្នាក់ និងដកហូតគ្រឿងញៀន៤៤កញ្ចប់ ដោយមានការសម្របសម្រួលពីលោក រ៉ា លីសួន ព្រះរាជអាជ្ញារង អមសាលាដំបូងខេត្តកំពង់ស្ពឺ និងមានការចង្អុលដឹកនាំពីលោក ស្នងការនគរបាលខេត្តកំពង់ស្ពឺ បញ្ជាផ្ទាល់ពីលោកស្នងការរងទទួលផែន កម្លាំងផ្នែកប្រឆាំងគ្រឿងញៀនស្រុក បានបង្រ្កាបមុខ សញ្ញាជួញដូរដោយខុសច្បាប់នូវសារធាតុញៀនបានម្នាក់មាន ឈ្មោះ ចត់ ចាន់ដួងចិត្ត ភេទប្រុស អាយុ៣១ឆ្នាំមុខរបរមិនពិតប្រាកដ រស់នៅភូមិអូរក្រាំងអំបិល ឃុំត្រពាំងគង ស្រុកសំរោងទង ខេត្តកំពង់ស្ពឺ ។
នគរបាលដដែលបានបញ្ជាក់ថា ក្រោយឃាត់ខ្លួនជនសង្ស័យដកហូតវត្ថុតាងរួមមាន÷ ម្សៅក្រាមពណ៌សថ្លាសង្ស័យជាគ្រឿងញៀនចំនួន៤៤កញ្ចប់ ( មធ្យម ០១កញ្ចប់ ) ទូរស័ព្ទដៃ០១គ្រឿង និងឧបករណ៍សម្រាប់ប្រើប្រាស់គ្រឿងញៀនមួយចំនួនថែមទៀតផង ។
បច្ចុប្បន្នជនសង្ស័យរួមជាមួយវត្ថុតាងខាងលើ នគរបាលជំនាញបានធ្វើការសាកសួរ និងកសាងសំណុំរឿងបញ្ជូនទៅកាន់ការិយាល័យជំនាញនៃស្នងការដ្ឋាននគរបាលខេត្ត ដើម្បីចាត់ការបន្តតាមនីតិវិធីច្បាប់៕
ដោយ៖ សូរិយា
