សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ រថយន្ត kia morning បេីកបត់ឆ្លងផ្លូវក៏ត្រូវរថយន្តតូយ៉ូតាព្រុសមួយគ្រឿងបេីកជ្រុលទៅបុកបណ្តាលឲ្យរថយន្តkia morning ខ្ទាតទៅបុកម៉ូតូ មួយគ្រឿងទៀតដែលជិះបញ្ច្រាសទិសគ្នាធ្វើឲ្យរងការខូចខាត ហើយរថយន្តបង្កបេីករត់គេចបាត់ ។
ហេតុការណ៍នេះបានកេីតឡេីងនៅវេលាម៉ោង១០យប់ថ្ងៃទី៩ខែមករាឆ្នាំ២០២៥ ទល់មុខផ្សារទំនើបសុវណ្ណា ផ្លូវ២៧១ សង្កាត់ទំនប់ទឹក ខណ្ឌបឹងកេងកង រាជធានីភ្នំពេញ ។
តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកេីតហេតុគេបានឃើញបុរសម្នាក់រួមដំណើរជាមួយនឹងនារីម្នាក់បានបេីករថយន្តម៉ាក kia morning ពណ៌ទឹកមាស ពាក់ស្លាកលេខ ភ្នំពេញ 2BG-0752 បេីកតាមបណ្តោយផ្លូវ២៧១ក្នុងទិសដៅពីជើងទៅត្បូង លុះមកដល់ចំនុចកេីតហេតុ ក៍បានបត់ឆ្វេងឆ្លងផ្លូវក្នុងគោលបំណងចូលទៅច្រកផ្សារសុវណ្ណា ហេីយគាប់ជួនពេលនោះ ក៏ស្រាប់តែមានរថយន្តតូយ៉ូតាព្រុសមួយគ្រឿងមិនចាំស្លាកលេខ ដែលបេីកស្របទិសគ្នា បានជ្រុលទៅបុករថយន្ត kia morning ពីក្រោយបណ្ដាលឱ្យរថយន្តជ្រុលទៅបុកម៉ូតូម៉ាក XCENTER ពណ៌សលាយខ្មៅ ពាក់ស្លាកលេខ ភ្នំពេញ 1IA -8034 ដែលជិះដោយបុរសម្នាក់ធ្វើដំណើរតាមបណ្ដោយផ្លូវ២៧១ក្នុងទិសដៅពីត្បូងទៅជេីង បញ្ច្រាសទិសគ្នា បណ្តាលឲ្យម៉ូតូដួលអូសខ្ទាតប្រហែល៥ម៉ែត្ររងការខូចខាតនិងធ្វើអោយមនុស្សរបួសតិចតួច ។
ចំនែករថយន្តkia morning វិញរងការខូចខាតផែ្នកខាងមុខនិងផ្នែកខាងក្រោយ តែមិនគ្រោះថ្នាក់ដល់មនុស្សដែលជិះក្នុងរថយន្តនោះទេ។
ដោយឡែករថយន្ត តូយ៉ូតាព្រុសវិញនៅពេលបង្កគ្រោះថ្នាក់ហើយ ក៏បន្ថែមល្បឿនបេីករត់គេចបាត់ស្រមោលតែម្តង។
ក្រោយពេលកេីតហេតុ នៅសល់តែរថយន្តនិងម៉ូតូ ដែលសុទ្ធសឹងអ្នករងគ្រោះដូចគ្នា ក៏សម្រេចបញ្ចប់រឿងដោយសុខចិត្តយកមធ្យោបាយទៅជួសជុលរៀងៗខ្លួន ៕
ដោយ៖ សុខាសែនជ័យ
